Sinugutan ni Pol ok Kopatutin Moktolagad
10
1-2 Ongon dow ong moktaluꞌ nong mondoku moktaluꞌ bilaꞌ diyon ku na diniyu,
sugaid motowakkalu dow moktaluꞌ sok sulat nok pinoyitu diniyu.
Saan na dunut pokpobabaꞌ bug molunok nok pongatoyan mamaꞌ nok pitongow dinita nog Al-Masih,
ongon ok taluꞌ u diniyu.
Akon si Pol mikpokilolat diniyu nok kanaꞌ niyu akon togolon moktaluꞌ nong motowakkal pogdatongu puliꞌ diyon diniyu.
Bung mayan diꞌ u na sumboy mokpotongow nok kotowakkalu sog gadapan nong mga mingintom kituꞌ nog inunutan nami ong napsu nog ginawa-baran nami.
3 Motud nog ami kini manusiyaꞌ da,
sugaid ok pongatu nami sok pononduꞌ nok sumaggaꞌ sok kosobonnalan,
kanaꞌ mamaꞌ nok pongatu nong mga tow kododunyahoy.
4 Poꞌ ok pongatu nami dun,
ok kowasa nok Tuhan,
kanaꞌ ong mga bosi dini sog dunya.
Ok kowasa nin mokolubu song mga molikoꞌ nok pikilan bug kokosun nong mga tow nok sumaggaꞌ sok kopandoyan nok Tuhan.
5 Tidu diyon,
dagon nami ok pononduꞌ nok kanaꞌ mosobonnal pasal sok Tuhan,
bu ong mga miglologinis nong motas goyitan bagun mokokilala ilon sok Tuhan.
Pogmuhut-muhutan nami ilon moyit bagun poglillaon ong mga pikilan nilon bangka ilon pogunut sog Al-Masih.
6 Dadi bilaꞌ mogunut amu na tokodoy sok kolegan nog Al-Masih,
mopodinsamaꞌ nami botangan nog hukuman sosuku nog dumugtul.
7 Pikil-pikil niyu ong motampal na.
Bilaꞌ ongon diyon diniyu motantu nong mosukuꞌ yanin sog Al-Masih,
sumboy da sop pikilonin nok sukuꞌ ami da sop sog Al-Masih.
8 Diꞌ u mosipog bisan mamaꞌ nog labi-labi ok kopogbantugu sok kopatut nog binogoy nok Tuhan dinami.
Poꞌ binogoy nami ok kopatut kini bagun popagonon ok kotombaꞌ niyu dun,
kanaꞌ bagun laaton amu.
9 Diꞌ u meleg nong mopikil niyu nok pongondok ong mga sulatu diniyu.
10 Poꞌ ongon dow moktaluꞌ nong mobogat bu taga kopatut ok taluꞌ u sok sulat,
sugaid bilaꞌ diyon ku na diniyu,
molamma u dow,
bu daꞌdun og halgaꞌ nok taluꞌ u.
11 Dadi sumboy da sop kosunan nong mga tow nong miktaluꞌ nong mamaꞌ niyon,
nog olo-olo na ong misulat nami,
yonin da sop ong moinang nami bilaꞌ madap ami na diniyu.
12 Na tantu diꞌ ami mokotowakkal moktaluꞌ nog batuk ami song mga tow nong migbantug nog ilon koyon motas tokodoy.
Sugaid bilaꞌ mokpobatuk ilon bug sima ong motas,
bu ok topongan nog ginamit nilon ok kobatuk nilon tow mogbantug-bantug,
na miawam ilon.
13 Na bilaꞌ ami,
ondaꞌ ami poglabi nok taluꞌ nami pasal sog ginang nok kiwakilan dinami,
sugaid piunut nami sok toktoban nog binogoy nok Tuhan dinami.
Bu song motudin,
kiwakilanin ami nong misaut ami tanan mokposampoy diyon diniyu.
14 Bilaꞌ bosiya ondaꞌ ami sibon pokangoy diyon diniyu,
mogdadi nilon taluon nog labi-labi ok taluꞌ nami.
Sugaid mikosaut ami buwan bisan diyon diniyu mokposampoy nong Mobais nok Suksugan pasal sog Al-Masih.
15 Saan na ondaꞌ ami da pogbantug nog gulasin-salaꞌ nog duma nog daꞌdun og labot nami dun.
Sugaid mosolag og leg bug pogdodama nami nong mogidud ok kotombaꞌ niyu bagun mogidud nok ponginangon nami diyon diniyu mounut sog inuwakil dinami nok Tuhan.
Dadi modakol pa ong mga tow nok koposampoyan nami nong Mobais nok Suksugan.
16 Na bung mayan mosaut ami pa mokposampoy nong Mobais nok Suksugan song mga kobonuwahan sog gunahan pa diniyu sok Kurintu nog daꞌdun pa ong mikoposampoy diyon.
Poꞌ diꞌ ami meleg mangkon sog ginang nog inuwakil nok Tuhan sog duma.
17 Mamaꞌ nong misulat sog diyalom Kitab,
“Bilaꞌ mogbantug amu,
og ginang tibuwa nok Tuhan,
og bantugon niyu.”a
18 Poꞌ ok tow nong mokpotas sog ginawa nin,
ondiꞌ tolimaon nok Tuhan,
sugaid bilaꞌ ok tow potason nok Tuhan,
tolimaon yanin.