Ok Pokpodinsamaꞌ nok Totabangan para song mga Moktotombaꞌ sog Jerusalem
9
Na pasal sok totabangan para sog duma ta niyu sukuꞌ nok Tuhan dituꞌ sog Jerusalem,
diꞌ u na amu sumboy sulatan.
2 Poꞌ kiosunan ku bug ponoy og leg niyu tumabang.
Pigbantugu pa tanan amu song mga moktotombaꞌ dini song Makedonya.
Tinaluan ku ilon nok tidu pa song miniyan tahun,
mikpodinsamaꞌ amu diyon sok probinsiya Akaya tumabang.
Dangan midongog nilon pasal sok kopomologbog niyu,
mingatas da sop ok kodakolan dinilon mogbogoy.
3 Na pangoyon ku diyon diniyu ong mga koilugan ta nok siloꞌ Titus bagun sagad-sagad ok totabangan niyu mounut sok pigbantugu song mga taga Makedonya.
4 Poꞌ bilaꞌ mogunut dinakon og duma nok koilugan ta tidu song Makedonya,
sokaliꞌ sunoy kanaꞌ pa sagad ok totabangan niyu,
moluman ami ma pasal sok pogbantug nami diniyu.
Na amu pa taꞌ?
5 Saan mipikilu nong mobais pongonihon ku song mga koilugan ta nong moguna ilon mangoy diniyu bagun mopodinsamaꞌ na asal ok sinosaꞌ niyu nok totabangan.
Dadi ongon na asal mipondinsamaꞌ ok pomogoy niyu tidu sog ikhlas nok pongatoyan bu kanaꞌ tidu sok togol.
6 Na pasal sok pomogoy,
pondomon niyu ok tow nong mongodok.
Bilaꞌ mikaan ok pongodokin,
mikaan da sop og ganihonin.
Tibuwa bilaꞌ modakol ok pongodokin,
modakol da sop og ganihonin.
7 Dadi ong monolokotow diniyu,
sumboy bogoyonin mounut sog ikhlas nok pongatoyanin,
kanaꞌ kitogolan,
poꞌ molasa ok Tuhan song mga tow loliyagon mogbogoy.
8 Bu mokogaus ok Tuhan mogbogoy diniyu nok kobaisan bisan pa labi sok kogunahan niyu.
Dadi bisan olo waktuhoy bug olo ok kobotang-botang niyu,
koongonan amu nog lam nok kogunahan niyu bu labi pa bagun kopobaisan niyu da sop ok pokasi niyu tow.
9 Mamaꞌ nong misulat sog diyalom nok Kitab,
“Motawal yanin momogoy song mga miskinan,
soumul-tahun diꞌ kolingowan ok kobaisina.”
10 Poꞌ ok Tuhan ong mogbobogoy nog boniꞌ bug kan song mga polongodok,
yanin da sop ong mogbogoy diniyu nog olo-olo nituꞌ,
bu podakolonin pa bagun songkuan amu tidu song mga mobais nog ginang niyu.
11 Bogoyan amu nok Tuhan nong miglabi-labi pa bagun lolayun amu mokobogoy sog duma niyu.
Dadi tidu sok totabangan nok poyiton niyu biyan dinami,
modakol ong moksarang-sukul sok Tuhan.
12 Na sok poktolagad niyu kini,
kanaꞌ amu hadja moktabang sok kosigpitan nong mga sukuꞌ nok Tuhan dituꞌ sog Jerusalem,
sugaid kini da sop og dalanan nong modakol ong mokposarang-sukul sok Tuhan.
13 Ok totabangan niyu kini,
yonin na og gindanan nok tumombaꞌ amu,
bu diꞌ amu mosipog mangkon nong mogunut amu song Mobais nok Suksugan pasal sog Al-Masih.
Dadi potason ok Tuhan pasal sok kotawal niyu song mga koilugan niyu sok kotombaꞌ bu sok kotanan nok tow.
14 Bu pongoni-ngonihan nilon amu dunut poglasa nilon diniyu pasal song miglabi-labi nok kolasa-kololat nog binogoy nok Tuhan diniyu,
bagun motabang niyu ong mga kodumahan niyu.
15 Dadi moksukul ita niyu sok Tuhan pasal sok pogbogoyin dinita ok kolasa-kololatin nog diꞌ tokodoy motokkad nok pikilan nong manusiyaꞌ.