Ok Totabangan para song mga Moktotombaꞌ sog Jerusalem
8
Na mga koilugan nami,
kolegan nami posunon diniyu pasal sok kolasa-kololat nog binogoy nok Tuhan song mga jomaa nong mga moktotombaꞌ dini sok probinsiya Makedonya.
2 Poꞌ bisan landuꞌ ok poksuloy nok pogbinsanaꞌ nong mosugat dinilon,
landuꞌ kosolag og loliyag nilon,
bu tidu diyon miglabi ok kotawal nilon minsan miskinan ilon tokodoy.
3 Kisaksian ku nog binogoy nilon ong mogaga nilon,
bu labi pa tanan mounut sok kolegan nilon.
4 Mingoni ilon tokodoy nok kumboyon ilon da sop mogbogoy nok totabangan song mga kodumahan nilon sukuꞌ nok Tuhan dituꞌ sok siyudad nog Jerusalema.
5 Bu labi pa sok pigdodamahan nami og binogoy nilon,
poꞌ muna-muna piglillaꞌ nilon sok Panghuꞌ og ginawa-baran nilon,
doksuꞌ bangka pa dinami mounut sok kolegan nok Tuhan.
6 Tidu sok ponginangon nong mga moktotombaꞌ song Makedonya,
mingoni ami ni Titus nong mokpuliꞌ yanin diyon diniyu.
Mingoni ami diyanin bagun doksuonin ok pokpongalap nok totabangan niyu nok tinagnaanin na.
7 Miglabi-labi amu sok kotanan,
sok kotombaꞌ,
sok pognasihat bu sok kokosun,
sok kotugos niyu tumabang song mga pokasi niyu bu sok poglasa niyu dinami.
Dadi moglabi-labi amu da sop momogoy nok totabangan kini.
8 Ondaꞌ u kini taluoy bagun suguon ku amu,
sugaid miksuksugu diniyu pasal sok koikhlas nok pomologbog nong mga duma bagun mokpomotud nog ikhlas da sop ok poglasa niyu.
9 Poꞌ kiosunan niyu bug ponoy ok kolasa bug kololat nok Panghuꞌ ta niyu Isa Al-Masih nong mikpotimaluy yanin nong manusiyaꞌ.
Bisan diyon diyanin og lam nog daya sok surgaꞌ,
mikpomiskin yanin bagun biyan dun koongonan amu nok kosannangan solama-lama nog yonin ong mosobonnal nog daya.
10 Dadi sok ponontongu,
mobais bilaꞌ doksuon niyu ok poglumpuk nok totabangan para song mga kodumahan ta niyu moktotombaꞌ.
Tahun miniyan amu tokodoy ong mikuna meleg moksodokka,
bu moktagnaꞌ amu mongalap dun.
11 Dadi mamaꞌ nok pogapas niyu tumagnaꞌ dun,
pogapasoy niyu dumoksuꞌ ok totabangan niyu mounut song mogaga niyu.
12 Poꞌ bilaꞌ ikhlas ok pongatoyan niyu,
tolimaon nok Tuhan ayin-ayin na ong mogaga niyu bogoyon.
Ondiꞌ amu pobogoyon nog diꞌ niyu mogaga.
13 Ondiꞌ u meleg nong moksigpit amu pasal sok kotabang niyu sok kotubuꞌ-tubuꞌ nog duma.
Tibuwa mobais moktinabangoy ita niyu mga moktotombaꞌ bagun mogbatuk-batuk ok kotubuꞌ-tubuꞌ ta niyu.
14 Song ningkomun kini ongon-ongonan amu,
saan mobais nok tabangan niyu ong mga kodumahan niyu nong mikkogunahan.
Na sunoy bolombula ongon-ongonan ilon,
dadi mokotabang da sop ilon diniyu bilaꞌ mikkogunahan amu bagun mogbatuk-batuk ok kotubuꞌ-tubuꞌ niyu.
15 Poꞌ maꞌ nini ong misulat sog diyalom nok Kitab,
“Ok tow nong mingalap nong modakol,
ondaꞌ poglabi,
bu ong mingalap nong mikaan,
daꞌ da sop poglokulang.”b
Piuna siloꞌ Titus sok Kurintu
16 Moksukul ami sok Tuhan nog binotangin sok pongatoyan ni Titus og ikhlas nog leg tumabang diniyu mamaꞌ dinami.
17 Poꞌ meleg yanin sok pingoni nami nog bontowonin amu puliꞌ.
Migloliyag yanin dun,
poꞌ dinsamaꞌ ok koleganin mokpuliꞌ diyon diniyu.
Dadi miandam na yanin mopanow.
18 Podunuton nami da sop diyon ni Titus ok solobuk gilug ta niyu sok kotombaꞌ.
Pigaddatan yanin sog lam nog jomaa nog Al-Masih pasal sok pokposampoyin nong Mobais nok Suksugan.
19 Bu kanaꞌ hadja koyon,
og gilug ta niyu da sop kini ong mipiliꞌ nong mga jomaa nong mga moktotombaꞌ mogunut dinami mogoyit nok totabangan song mga koilugan ta moktotombaꞌ sog Jerusalem.
Mogoyit ami nok totabangan kini bagun potason ok Tuhan,
bu mikpomotud kini og leg ta niyu tumabang nok koilugan ta sok kotombaꞌ.c
20 Dadi bilaꞌ mogoyit ami nok totabangan kini,
mogunut yanin duma ni Titus dinami bagun kohallian nami nok kotuntutan pasal sok pogwakil nami song mosolag nok totabangan kini.
21 Saan na mokpotubud ami,
poꞌ ok kolegan nami mokinang nong mokososuat kanaꞌ hadja sok ponontong nok Tuhan,
sugaid sampoy da sop sok ponontong nong mga tow.
22 Na ongon pa og duma nog gilug ta nok podunuton nami da sop niloꞌ Titus.
Sanu kali nami na yanin pigliling song miglologinis nok pobiyan,
bu kisaksian nami nok kopongandolan yanin bu motugos lolayun tumabang.
Ningkomun mogdungag pa ok pomologbogin tumabang diniyu,
poꞌ mosolag ok pongandolin diniyu.
23 Dadi pasal ni Titus,
pondom niyu nog yanin og duma u mogoginang diyon diniyu.
Bu og duwaꞌ kotow koilugan ta nok kodumahanin,
ilon ong mikogantiꞌ song mga jomaa nong mga moktotombaꞌ sok probinsiya nong Makedonya bug Akaya.
Biyan sok kotubuꞌ nilon,
mokobogoy ilon nok kotas diyon ni Isa Al-Masih.
24 Dadi potongow niyu og lasa niyu song mga tow kini bagun motongow nong mga duma jomaa nong mga moktotombaꞌ nong motud ok pogbantug nami diniyu.