7
Dadi mga kolasahan ku,
pasal song mga janjiꞌ nok Tuhan koyon dinita,
sumboy sutsihon ta og ginawa-baran ta tidu song mga mokolomuꞌ nog ginang bug pikilan.
Pogmuhut-muhutan ta nog jumukup ok kosutsi dunut gondok ta sok Tuhan.
Og Loliyag ni Pol
2 Pongonihon ku diniyu,
bukaoy niyu ok pongatoyan niyu dinami poꞌ daꞌdun ok tow nog ininangan nami nok kolaatan.
Daꞌdun da sop ok pisimoy nami sok kotombaꞌ,
bu daꞌdun og dinupang nami.
3 Ondaꞌ u kini taluoy bagun sallaon amu,
poꞌ tinaluꞌ u na nong molasa ami tokodoy diniyu.
Dadi daꞌdun mokopokposuwoy dinita,
bisan sok kotubuꞌ atawa sok kopatoy.
4 Mingandolu tokodoy diniyu,
bu bantugon ku amu nok tantu.
Pilasig niyu ok pongatoyan ku,
bu bisan sok kodakol nok kobinsanaan nok kibiyanan nami,
miponuꞌ ok pongatoyan ku nog loliyag.
5 Pogdatong nami dini song Makedonya,
daꞌdun og gulali nami,
poꞌ mikonanam ami nog ginis-ginisan nok kobinsanaan.
Sinasow ami nong mga tow nong mogdaawa dinami,
bu dinatongan ami da sop nog gondok.
6 Tibuwa ok Tuhan ong mikpobogan nok pongatoyan song mga mikkosusahan,
piboganin da sop ok pongatoyan nami biyan sok pogdatong ni Titusa.
7 Kanaꞌ tibuwa ok pogdatong ni Titus ong mikpobogan nok pongatoyan nami,
sugaid sampoy da sop ok suksuganin dinami nok pibogan niyu ok pongatoyanin.
Miksuksug yanin nog gindowon niyu akon.
Taluꞌ in nong misusa amu song miinang,
bu mimologbog amu dinakon.
Dadi ningkomun labi tokodoy og loliyagu.
8 Na pasal sok sulat kituꞌ nok pinoyitu diniyu,
daꞌdun na ok susunan ku.
Song motudin miksusun ku tagnaꞌ poꞌ mikposusa u diniyu bisan dona podaliꞌ.
9 Tibuwa ningkomun linoliyagu,
kanaꞌ pasal sok kibogoyan ku amu nok kosusahan,
sugaid pasal ok kosusahan ong mikopokpotowbat diniyu.
Poꞌ misusa amu mounut sok kolegan nok Tuhan,
dadi ondaꞌ amu da kobolongoy nog bisan olo sok sulat nami kituꞌ.
10 Poꞌ bilaꞌ mosusa ong mga tow pasal sog dusa nilon,
moyit ilon sok poktowbat.
Yonin koyon ok kolegan nok Tuhan,
poꞌ ok kodoksuanin ok pogawon nog daꞌ poksusunoy nog bisan sima.
Sugaid ok kosusahan bug sasow nok pokpodatongon nong manusiyaꞌ sog ginawa-baran nilon biyan sog dusa nog diꞌ nilon towbatan,
ok kodoksuanin ok kosiksaan sok kopatoy.
11 Dadi tontong niyu ba ong mobais nok kodoksuan nok kosusahan nok pibatik diniyu nok Tuhan,
pasal sok tow kituꞌ nong mikodusa diyon sok tumpukan niyu moktotombaꞌ.
Poꞌ pitongow niyu nog ikhlas ok pongatoyan niyu.
Bug ponoy ok kosolag nog leg niyu mokpotongow nog daꞌdun og gampuꞌ niyu sog dusa nok tow kituꞌ!
Bug ponoy ok kolingit niyu pasal sok kodusahan nog ininangin!
Bug ponoy ok kopokpodinsamaꞌ niyu mokpaat dun.
Bug ponoy og gondok niyu sok Tuhan,
ok pomologbog niyu,
bu ok poggindow niyu dinakon!
Sog lam nituꞌ pitongow niyu nog diꞌ amu kotuntutan song miinang kituꞌ.
12 Saan sinulatu ok sulat kituꞌ kanaꞌ sabap sok tow kituꞌ nong mikinang nok kolaatan,
atawa pasal sok tow kituꞌ nog ininangan nok kolaatan.
Tibuwa sinulatu para mokohampit amu dun bagun motampal diyon diniyu bug andun kosolag ok pomologbog niyu dinami sok ponontong nok Tuhan.
13 Dadi tidu sog ininang niyu koyon,
mipobogan niyu ok pongatoyan nami,
bu labi pa tokodoy migloliyag ami pasal sog loliyag nok pisampoy niyu ni Titus poꞌ mipobogan nog lam niyu ok pongatoyanin.
14 Sog ondaꞌ pa angoy si Titus sok Kurintu,
pigbantugu amu diyanin.
Bu mitongowin nong motud ok tinaluꞌ u kituꞌ pasal diniyu,
mamaꞌ nong motud da sop og lam nok piktaluꞌ nami diniyu.
Dadi ondaꞌ u kosipogoy sok kopogbantugu kituꞌ pasal diniyu.
15 Na migidud ok kolasa ni Titus diniyu,
bilaꞌ mopondomin nong migunut amu kotanan song mga suguanin,
bu tinumabuk amu diyanin dunut gondok bug pogaddat.
16 Landuꞌ tokodoy og loliyagu poꞌ kopongandolan ku amu sog lam nituꞌ.