6
Pagga og duma ami nok Tuhan sog ginangin kini,
pongonihon nami tokodoy diniyu nog diꞌ niyu pogastahan ok poktabuk niyu nok kolasa-kololat nog binogoy nok Tuhan diniyu.
2 Poꞌ miktaluꞌ ok Tuhan sok Kitab,
“Miginongogu dinika sog ginantaꞌ nog waktu,
tinabangan ku ika sog gondow pogawon.”a
Dadi poginongog amu!
Ningkomun kini og waktu nog ginantaꞌ nok Tuhan potongowon diniyu ok kolasa bug kololatin.
Ningkomun kini og gondow nong moawon amu nok Tuhan.
Ok Kobinsanaan niloꞌ Pol
3-4 Sog lam nog ginang nami,
potongowon nami nong mga sosuguon ami nok Tuhan.
Ondaꞌ ami ponginang nong mokopoglaat sok kopongandol nog bisan sima towoy bagun diꞌ silaon nong mga tow ok poktolagad sok Tuhan.
Sandalan nami tokodoy og ginisan nok kobinsanaan,
kosusahan bug kologonan.
5 Pinglakpos ami,
pinirisu bu sinasow ami nok towanan nong molingit dinami.
Sumolingka landuꞌ tokodoy ok tiksaan nami,
bu kibiyanan nami nog diꞌ mokotulug bu diꞌ mokokan.
6 Tibuwa mamaꞌ nog dait song mga sosuguon nok Tuhan,
mokpohatul ami biyan sok kosutsihan,
kokosun,
poktiggol bug kololat sok pokasi,
potontulon ami nog Ruh Mahasutsi bu ikhlas ok kolasa nami.
7 Pisampoy nami pahatul ok kosobonnalan biyan sok kowasa nok Tuhan,
bu ok kologdongan mopononggiꞌ sog bosi sog lintu-bibang komot nami nong mokotabang bu mokotaming dinami sog ginang kini.
8 Moktotolagad ami sok Tuhan bisan pogaddatan ami atawa posipogon,
bu bisan mobais atawa molaton og dongogan nami.
Ok taluon nami ok kosobonnalan,
sugaid tinaluan ami nong mga duma nong mokposimoy ami dun song mga tow.
9 Ondaꞌ ami bilang-bilangoy nong mga duma tow,
bisan modakol da ong mikokilala dinami.
Lolayun ami sog diyalom komulahan nok kopatoy,
sugaid totubuꞌ ami da.
Pogbinasahon ami,
sugaid ondaꞌ ami pa patoy dun.
10 Bisan sog diyalom ami nok kosusahan,
og loliyag sok pongatoyan nami,
daꞌ da pokkulang.
Miskinan ami,
sugaid biyan sok pokposampoy nami modakol ok kobogoyan nog daya nog daꞌdun ok kodoksuanin sok surgaꞌ.
Daꞌdun sog dunya nong motawag nog dinami dun,
sugaid dinami kotanan,
poꞌ sukuꞌ ami nok Tuhan.
11 Sok taluꞌ nami kini,
daꞌdun ok pigbuni nami diniyu.
Na mga koilugan nami sok siyudad nok Kurintu,
kolasahan nami tokodoy amu.
12 Ondaꞌ da kokulangoy ok poglasa nami diniyu,
sugaid mamaꞌ nok kulang ok poglasa niyu dinami.
13 Pinikilu amu nok piglogumbataan ku,
saan pingoni u diniyu nong mogidud da sop ok poglasa niyu dinami.
Ong mga Moktotombaꞌ ni Panghuꞌ Isa, sumboy diꞌ Mokpoikot song mga ondaꞌ Tombaꞌ
14 Diꞌ amu mokpokawing atawa mokpoikot sok tow nog diꞌ tumombaꞌ ni Isa,
poꞌ kanaꞌ amu dait.
Poꞌ ponoy buwan ok kopoksulut nong mologdong nok tow sok kanaꞌ,
bu ponoy sop poksolobuk ok kodolag sok kodolom?
15 Mokopoksolobuk taꞌ si Isa Al-Masih bu og Iblisb?
Atawa olo og bahagiꞌ nog daꞌ tombaꞌ song moktotombaꞌ?
16 Ong mga tuhan-tuhan diꞌ da sop moksolobuk baloy sog Baloy nok Tuhan.
Na ita mamaꞌ nog baloy pogonongan nok Tuhan ok totubuꞌ,
mamaꞌ na nok tinaluꞌ in,
“Mogonongu bu mogdunut-dunutu dinilon.
Akon na ok Tuhan nilon,
bu ilon ong mga piktowan ku.”c
17 Dadi taluꞌ nok Tuhan,
“Sumboy mokpolayuꞌ amu dinilon
bu suwoy amu tidu dinilon,
bu diꞌ amu mampuꞌ nog ginang nilon nong mokosammal.
Dadi tabukon ku amu.”d
18 Miktaluꞌ sop ok Tuhan Mokowasa,
“Moimungu nog Gommaꞌ niyu,
bu moimung amu nong mga gumbataꞌ u nog laki bug libun.”e