Sinuguꞌ ni Pol Moktowbat ong mga Moktotombaꞌ
13
Dadi yonin na kini og ikotolu kali gangoyu montow diyon diniyu.
Na bilaꞌ ongon og intoman nong miginang nong molaton,
unuton ta ok sinulat sok Kitab nok sumboy ongon og duwaꞌ atawa tolu kotow nong mokpomotud dun,
bangka pogbotang nog hukuman.a
2 Sog ikoduwaꞌ kali u kituꞌ mangoy diyon diniyu,
pidinsamaan ku ong mga mikodusa nok sumboy ilon moktowbat.
Ningkomun pidinsamaan ku da sop ilon bug lam nok kodumahan niyu nog bilaꞌ matongu na diyon diniyu,
botangan ku na nog hukuman ok sosuku nong mikodusa bu daꞌ pa pokotowbat.
3 Tinaluꞌ u nog inangon ku kini poꞌ tinopak niyu akon mokpomotud nong moktaluꞌ og Al-Masih biyan dinakon.
Daꞌ yanin poglamma-lamma sok pokpaatin diniyu,
poꞌ mokowasa yanin diyon diniyu.
4 Motud nong molamma og Al-Masih dangan milansang yanin sok kayu,
sugaid mitubuꞌ yanin sok kowasa nok Tuhan.
Dadi ami da sop kini nong misolobuk diyanin,
mamaꞌ nong molamma.
Sugaid bilaꞌ diyon ami na diniyu,
diyon niyu na kosunan nong mitubuꞌ ami dunut diyanin sok kowasa nok Tuhan.
5 Na amu koyon,
suloyoy niyu lumiling og ginawa-baran niyu bilaꞌ motud taꞌ dodaꞌ ok kotombaꞌ niyu sog Al-Masih,
bu diyon yanin sok pongatoyan niyu.
Sugaid bilaꞌ kanaꞌ diyon diniyu si Isa Al-Masih,
maana nin dinag amu da sok poksuloy nok kotombaꞌ niyu.
6 Mura-murahan sabuton niyu na bosiya nog ami kini mattan mga kiwakilan nok Tuhan.
7 Na pongoni-ngonihon nami sok Tuhan nog diꞌ amu da mokinang nong molaat.
Dadi mura-murahan diꞌ ami na sumboy mokpotongow nok kopatut nami moghukum diniyu.
Poꞌ ok polabihon nami,
kanaꞌ mokpotongow nok kiwakilan ami nok Tuhan,
sugaid nong moginang amu nok kobaisan.
8 Poꞌ diꞌ ami mokogaus sumaggaꞌ sok kosobonnalan,
sugaid kolegan nami mogunut sok kosobonnalan.
9 Saan na loliyagon ami bisan molamma ami,
basta mopagas amu.
Bu pongoni-ngonihon nami nog boguhan nok Tuhan ok pongatoyan niyu toktob diꞌ amu na kotuntutan.
10 Saan na sinumulatu diniyu sog bon nog daꞌ u pa diyon bagun moktowbat na ong mga mikodusa.
Dadi mura-murahan diꞌ u na sumboy usalon ok kopatutu moktaluꞌ nong mokahang diniyu bilaꞌ matongu.
Poꞌ binogoy nok Panghuꞌ ok kopatut kini dinakon,
bagun popagonon ok kotombaꞌ niyu dun,
kanaꞌ bagun laaton amu.
Mga Pomilin-milin bu Pongoni-ngoni
11 Dadi mga koilugan ku,
dini na toktob ok sulatu.
Pogloliyag amu,
poglokotubuꞌ amu nong mologdong,
unut niyu ok tinintuluꞌ u diniyu,
poksolobuk amu,
bu poksulut-sulut amu!
Dadi diyon diniyu ok Tuhan nog yonin na ok tobud nok kosannangan bug kolasa.
12 Pogjara-jarahoy amu nong mosutsi.
13 Ok kotanan nong mga tow sukuꞌ nok Tuhan dini kini,
simalam-duwaa ilon diniyu.
14 Na bung mayan ok kololat ni Panghuꞌ Isa Al-Masih,
ok kolasa nok Tuhan bu ok poksolobuk niyu sog Ruh Mahasutsi lolayun diyon diniyu kotanan.
Wassalam