11
Saan na mamaꞌ nok kopogdogilingu ni Isa Al-Masih,
pogdogiling amu sok pongaddatan ku.
Pasal sok Poktodung
2 Sinanglitan ku amu poꞌ lolayun niyu akon pondomon bu binologbogan niyu og lam nok ponintuluꞌ nog winakilu diniyu.
3 Sugaid ongon pa ok kolegan ku posabuton diniyu,
yonin na ok Tuhan mamaꞌ sopantun nog gulu ni Isa Al-Masih,
bu og Al-Masih yonin na mamaꞌ nog gulu nog laki,
bu og laki yonin na mamaꞌ nog gulu nog libunin.
4 Dadi bilaꞌ ongon og laki nong mongoni-ngoni atawa mokposampoy nok taluꞌ nok piponog diyanin nog Ruh nok Tuhan,
sokaliꞌ moktodung yanin nog gulu nin mamaꞌ nong mga kolibunan,
mamaꞌ nog ondaꞌ in pogaddatoy ok kounutanin nog yonin na og Al-Masih.
5 Sugaid bilaꞌ og libun mongoni-ngoni atawa mokposampoy nok taluꞌ nok piponog diyanin nog Ruh nok Tuhan,
sokaliꞌ daꞌ in todungoy og gulu nin,
ondaꞌ in pogaddatoy og laki nin,
mamaꞌ da nok tinukungan og gulu nin.
6 Na bilaꞌ og libun diꞌ meleg moktodung,
golom pa putukonin og bukin.
Sugaid bilaꞌ mokosipog sog libun moktukung,
sumboy yanin moktodung.
7 Og laki sumboy diꞌ mogdungmaꞌ nog gulu nin,
poꞌ biyan diyanin potongowon ok kotas nok Tuhan,
bu pibatuk-batukin diyanin.
Og libun tibuwa mokpotongow nok kotas nog laki nin.
8 Poꞌ og laki ondaꞌ poongonoy tidu sog libun,
sugaid og libun piongon tidu sog laki.
9 Ondaꞌ sop poongonoy nok Tuhan og laki sabap sog libun,
sugaid piongonin og libun bagun moimung duma nog laki.
10 Saan na sumboy ong mga libun moktodung nog gulu nilon,
og gindanan nog binogoyan ilon nok kopatut mongoni-ngoni bu mokposampoy nok taluꞌ nok Tuhan poꞌ piktontong ilon nong mga malaikat.
11 Sugaid dinita mga sukuꞌ ni Panghuꞌ Isa Al-Masih sumboy moktinabangoy ita niyu,
poꞌ kogunahan nog laki og libun,
bu og libun,
kogunahanin og laki.
12 Poꞌ bisan sooy og libun piongon tidu sog laki,
tidu dituꞌ og lam nog laki binataꞌ nong mga kolibunan.
Bu og lam nituꞌ,
ok Tuhan ok piktiduhanin.
13 Pikil niyu ba,
tolopon taꞌ og libun mongoni-ngoni sok Tuhan nog daꞌdun ok todungin?
14 Sugaid bilaꞌ ong mga kolakihan,
kanaꞌ taꞌ motampal nong mokosipog sog laki bilaꞌ moyabaꞌ og bukin?
15 Tibuwa bilaꞌ moyabaꞌ og buk nog libun,
poksanglitan yanin dun.
Poꞌ binogoy koyon diyanin nok Tuhan tabang dungmaꞌ nog gulu nin.
16 Tibuwa bilaꞌ ongon meleg lumugat sok tintuluan kini,
daꞌ ami kolayam lumugat dun,
bu yonin da sop kini og gaddat nok kodumahan nami moktotombaꞌ sog Al-Masih,
ong mga jomaa nok Tuhan ayin-ayin.
Ok Pokorodjaan Pomondoman sok Panghuꞌ
17 Na muwal diyon ongon pa ok taluon ku diniyu.
Ok poglumpuk-lumpuk niyu kanaꞌ dow mokobogoy diniyu nok kobaisan,
sugaid mokopoglaat tanan diniyu.
Diꞌ u amu kosanglitan pasal dun.
18 Poꞌ muna-muna midongogu nog bilaꞌ moglumpuk-lumpuk amu moksombahayang,
mibahagiꞌ-bahagiꞌ amu,
bu song niyatu mamaꞌ nok taga komotud ok taluꞌ kini,
19 poꞌ sumboy dodaꞌ mobahagiꞌ-bahagiꞌ amu bagun motampal bug sima og ikhlas ok kotombaꞌ in mokososuat sok Tuhan.
20 Midongogu nog bilaꞌ moglumpuk amu kuman sok pomondoman nok piglillaꞌ ni Panghuꞌ Isa ok kotubuꞌ in para dinita,
kanaꞌ niyu yanin pondomon poꞌ og gawoy niyu kuman hadja.
21 Poꞌ og duma diniyu mogdaliꞌ-daliꞌ kuman nog balun nilon bu ondiꞌ mogbogoy dun sok pokasi nilon.
Dadi og duma kigutoman,
bu og duma milangu na.
22 Daꞌdun taꞌ buwan og baloy niyu bagun dituꞌ amu kuman bu minum?
Sog ginang niyu kini binabaꞌ-babaꞌ niyu og ummat nok Tuhan bu mokposipog koyon song mga miskinan.
Olo buwan ong motaluꞌ u diniyu?
Sangliton ku taꞌ amu sog ginang niyu kini?
Ondiꞌ mogdadi!
23 Na popondomon ku diniyu ok ponintuluꞌ nok tinabuku ni Panghuꞌ Isa nog inuwakilu da sop diniyu.
Si Panghuꞌ Isa,
sog gobi nituꞌ nok tinipu yanin,
minalap yanin nok pan.
24 Pogdoksuꞌ in miksukul sok Tuhan,
pinitak-pitakin,
bu miktaluꞌ yanin,
“Niyat niyu nog yonin na kini og lawasu nog binogoy para diniyu.
Kan niyu kini ok pomondoman dinakon.”
25 Domikkiyan,
pogdoksuꞌ nilon kuman,
minalap yanin nok tasa taga ginumon,
bangka poktaluꞌ,
“Og gungod nok tasa kini,
og gindanan nog bogu pogjanjian nok Tuhan diniyu pobiyan sog duguꞌ u nong mobuyus para diniyu.a
Pondom niyu akon kada waktu nog inumon niyu kini.”
26 Poꞌ mga koilugan ku sok kotombaꞌ,
kada waktu nong mokpokorodjaan amu kuman nok pan kini bu minum nog ginumon mamaꞌ nini,
posampoyon niyu ok kopatoy ni Panghuꞌ Isa para song mga dusa ta sampoy sok pokpuliꞌ in sog dunya.
27 Dadi sima-sima ok kuman nok pan bu minum nog ginumon sok pomondoman para sok Panghuꞌ,
sugaid diꞌ in halgaan,
na mikodusa yanin poꞌ diꞌ in poggaddatan og lawas bug duguꞌ ni Panghuꞌ Isa.
28 Saan na sumboy poligsaon poguna nong monolokotow diniyu ok pongatoyanin sog diꞌ pa yanin kuman nok pan bu minum nog ginumon sok pomondoman kini.
29 Poꞌ bilaꞌ kuman yanin nok pan nok Panghuꞌ bu minum nog ginumon koyon nog daꞌ in halgaoy ok poglillaꞌ nok Panghuꞌ sog lawasin,
migoyit yanin nok siksaꞌ sog lawasin.
30 Saan na modakol diniyu miglamma bu miksaki,
bu ong mga duma tanan minatoy na.
31 Sugaid bilaꞌ lilingon ta poguna og ginawa-baran ta bilaꞌ mikodusa ita bangka pongoni nog ampun,
na diꞌ ita da siksaon nok Tuhan.
32 Na bilaꞌ siksaon ita nok Tuhan ningkomun,
ong maana nin gantaꞌ pokpaatin dinita bagun diꞌ ita mosunuꞌ siksaon loma-dinglag dunut song mga tow sog dunya nog daꞌ tombaꞌ diyanin.
33 Saan na mga koilugan ku sok kotombaꞌ,
bilaꞌ moglumpuk-lumpuk amu kuman sok pomondoman nok piglillaꞌ ni Panghuꞌ Isa ok kotubuꞌ in,
sumboy mogbinagadoy amu kuman.
34 Bilaꞌ ginutom amu,
kan amu poguna sog baloy niyu bagun diꞌ amu na mokodusa,
bu diꞌ amu na podatongan nok siksaꞌ nok Tuhan.
Pasal sop sog duma nong mga pokposun,
suguon ku da diniyu olo og inangon niyu bilaꞌ matongu na diyon.