Ok Pokpodinsamaꞌ bagun diꞌ ita Mokodugtul sok Tuhan
10
Dadi mga koilugan,
kolegan ku popondom diniyu ok kobiyan-biyan nong mga pingapuꞌ ta niyu kituꞌ song masa ni Nabi Musa.
Pitontulan ilon nok Tuhan biyan sog gabun,
bu tinabanganin ilon tumolipag sog Dagat Pula.
2 Dadi biyan sok kotolipag nilon sog dagat bu sok kopogunut nilon sog gabun kituꞌa,
mamaꞌ ilon piliguꞌ tandaꞌ sop nok tinumombaꞌ ilon ni Nabi Musa.
3 Bu kotanan nilon koyon kinuman nong mobarakat nok kan tidu sok Tuhan.b
4 Bu mininum ilon kotanan song mobarakat nok tubig.
Poꞌ ininum nilon ok tubig nok pitubud nok Tuhan tidu song mobarakat nog batu.c
Na ong migmaana sog batu koyon,
yonin na si Isa Al-Masih nong migunut-unut dinilon bisan ayin ilon angoy.
5 Sugaid bisan modakol na ok tabang nok Tuhan song mga tow,
ok kodakolan dinilon miginang nok kanaꞌ mokososuat sok ponontong nok Tuhan.
Saan na mimatoy ilon,
bu ong mga bangkoy nilon mikanat sog ginlupaan mimala.
6 Mga kobiyan-biyanan koyon,
mga pomintangan dinita,
bagun diꞌ ita mognapsu monginang nok kolaatan mamaꞌ nog ininang nilon.
7 Diꞌ amu tokodoy mogdogiling song mga tow kituꞌ nong miksumba song mga tuhan-tuhan.d
Poꞌ tinaluꞌ sok Kitab Sutsi,
“Ong mga tow miglami-lami kuman bug moginum,
bangka indog mongigal.”
8 Ondiꞌ ita na sop mogdogiling sok pinginang nong mga duma dinilon nong migjinae,
saan na mimatoy og duwaꞌ puluꞌ bu tolu ngibu kotow sog diyalom sondow.
9 Diꞌ ta niyu suloyan ok Tuhanf,
mamaꞌ na nog ininang nog duma nok pingapuꞌ ta tagnaꞌ,
saan na mimatoy ilon biyan sok toktuk nong mamak.g
10 Naꞌ amu mogdogiling song mga pongaddatan nog duma dinilon nong migdomuk-domuk,
saan na pimatoy ilon nong Malakal Mawt.h
11 Mikobiyan kini song mga pingapuꞌ ta bu sinulat gantaꞌ pomintangan dinita niyu nong miglokotubuꞌ sog waktu nog diꞌ na mobon ok kodoksuan nog dunya.
12 Dadi sima-sima towoy nong mongniyat nong mopagon na ok kopongandolin,
mokpotubud yanin bagun diꞌ yanin moyit nok sassat.
13 Pondom niyu nong mosugat da sop sok kodumahan ta niyu manusiyaꞌ ong mga poksuloy nong minatong diniyu.
Bu moliunungoy ok Tuhan,
diꞌ in amu potiyangan nok poksuloy nog diꞌ niyu mogaga.
Sugaid bilaꞌ kodatongan amu nok poksuloy,
mogbogoy yanin diniyu nok kopagas bagun kotiggolan niyu bu mokopuwas amu dun.
Poghalliꞌ amu song mga tuhan-tuhan
14 Dadi mga koilugan ku nok kolasahan,
diꞌ amu tokodoy mampuꞌ sok poksumba song mga tuhan-tuhan.
15 Amu koyon mga tow nok taga kokosun.
Pongonihon ku diniyu,
asi-asi niyu ong mga tinaluꞌ u.
16 Bilaꞌ mokpulun-pulun ita niyu mga moktotombaꞌ sok pokorodjaan ta pokpondom sok kopatoy ni Panghuꞌ Isa para dinita niyui,
ongon og inumon ta bu ongon ok kanon ta.
Kanaꞌ taꞌ buwan og inumon ta kituꞌ nok piksarang-sukulan ta na sok Tuhan,
og gindanan nong miksolobuk ita ni Isa Al-Masih,
poꞌ og duguꞌ in mibunag para dinita niyu?
Bu bilaꞌ mokpitak-pitak ita bangka kuman nok pan,
kanaꞌ taꞌ buwan koyon og gindanan nok sukuꞌ ita ni Panghuꞌ Isa,
bu mamaꞌ sopantun nok kibahagian ita sog lawasin?
17 Pagga solobuk da ok panj nok poksalu-saluhan ta kuman sog waktu koyon,
motampal nong mamaꞌ ita niyu nok solobuk lawas bisan modakol ita.
18 Dadi pikil niyu ba ong mga gaddat nong mga tow Israel,
bilaꞌ mokkurban ilon.
Ok kotanan nok kuman nong mga kinurban para sok Tuhan,
mosunuꞌ da sop ilon sumumba diyanin.
19 Na olo na ong maana u pasal sok kan nok kurbanon song mga tuhan-tuhan?
Ong mga tuhan-tuhan kanaꞌ motud,
bu ok kan nog dulangon dinilon,
kanaꞌ selen tidu sog duma nok kan.
20 Sugaid bilaꞌ moksolobuk mokkurban ong mga tow song mga tuhan-tuhan,
og dulangan nilon kanaꞌ og bonnal nok Tuhan,
sugaid ong mga soytan.
Bu diꞌ u meleg nok sumolobuk amu song mga soytan.
21 Bilaꞌ moglimud-limud amu moksalu kuman bu minum para pondomon niyu ok kopatoy ni Panghuꞌ Isa Al-Masih para dinita niyu,
diꞌ amu sop mokopoksalu kuman bu minum sok pokkurban para song mga tuhan-tuhan.
Poꞌ bilaꞌ inangon niyu,
migmaana koyon nong mogunut amu song mga soytan.
22 Olo buwan,
kolegan ta niyu taꞌ nok polingiton ta ok Tuhan?
Tantu kanaꞌ ita niyu mopagas pa tidu sok Tuhan.
Inangon ta ok Kotanan bagun Potason ok Tuhan
23 Na ongon og duma moktaluꞌ,
long nilon,
“Moluhaya ita na moginang nok kolegan ta,
ondaꞌ ita na sog diyaloman nok saraꞌ.”
Motud koyon,
sugaid kanaꞌ kotanan ginang mogbogoy nok kobaisan dinita niyu.
Moluhaya ita niyu,
sugaid kanaꞌ og lam nog ginang mokotabang mokpopagas nok kotombaꞌ.
24 Kanaꞌ amu mogapas nok kopiyahan nog ginawa-baran niyu,
sugaid pogapas amu nok kopiyahan nok pokasi niyu manusiyaꞌ.
25 Mokan niyu ok kotanan nok sosumbalion diyon pigdagang sok tabuꞌ.
Diꞌ niyu sumboy sakon bilaꞌ bakas taꞌ kinurban song mga tuhan-tuhan.
Ondiꞌ amu mogduwaꞌ-duwaꞌ kuman dun.
26 Poꞌ tinaluꞌ sog diyalom nok Kitab,
“Og dunya kini bu ok kotanan nog olo-olo dun,
ok Tuhan og gapuꞌ in.”k
27 Dadi bilaꞌ ongon ok tow nog daꞌ tombaꞌ sog Al-Masih mongonggat diniyu kuman,
bu meleg amu da sop,
na kan niyu og olo-olo nog binotang diniyu.
Diꞌ amu mogduwaꞌ-duwaꞌ kuman dun bu moksak bug ayin tidu.
28 Sugaid bilaꞌ ongon moktaluꞌ diniyu nog bakas dinulang koyon posunguꞌ sok tuhan-tuhan,
na diꞌ niyu kanon bagun pogaddatan niyu ok tow kituꞌ nong mikposun diniyu bu bagun daꞌdun da ong mobogat sok pongatoyan.
29 Ok tinaluꞌ u kini nog diꞌ niyu kanon kanaꞌ bagun daꞌdun ong mobogat sok pongatoyan niyu,
sugaid bagun daꞌdun ong mobogat sok pongatoyan nok tow kituꞌ nong mikposun diniyu.
Na sunoy ongon moksak,
“Manu mogbayaꞌ ma og duma nok tow sok koluhaya u moginang nok kolegan ku?
30 Bilaꞌ miksukulu sok Tuhan sok kokan nog binogoy dinakon koyon,
manu silaon ku pa ma sok kan nok piksarang-sukulan ku?”
31 Dadi yonin kini ok taluon ku song mga tow nong moktaluꞌ nong maꞌ niyon:
Bisan pa olo ok kanon bug inumon niyu,
bu sog lam nog inangon niyu,
sumboy moginang amu para potason ok Tuhan dun.
32 Poglokotubuꞌ amu nog diꞌ mokosallaꞌ dun ong mga pokasi niyu tow,
mga Yahudi,
mga kanaꞌ Yahudi bug mga duma niyu moktotombaꞌ sog Al-Masih,
og jomaa nok Tuhan.
33 Akon sooy,
pongmuhut-muhutan ku nok kosuatan ok kotanan nok pokasi u tow sog lam nog ginangu.
Ondaꞌ u pogapasoy ok kopiyahan nog ginawa-baran ku,
sugaid ok kopiyahan nong mga pokasi u bagun ilon moawon.