1 Kurintu 9

Ong mga Kopatut nong mga Tow nok Kiwakilan ni  Al-Masih

Kanaꞌ taꞌ buwan nong moluhaya u moginang nok kolegan ku? Kanaꞌ taꞌ buwan solobuku kiwakilan mokpoposampoy? Kanaꞌ taꞌ buwan mikpotongow tokodoy dinakon ok Panghuꞌ ta Isa Al-Masih? Kanaꞌ taꞌ miimung amu pasal sog ginangu biyan sok tabang nok Panghuꞌ? 2 Bisan ong mga duma nok tow kanaꞌ mangkon nok kiwakilan ku mokposampoy, kiosunan ku nok para diniyu, solokotowu . Poꞌ ok kotombaꞌ niyu ni Isa og gindanan nong motud ok taluꞌ u. 3 Yonin koyon ong motabalu song mga tow nog ondiꞌ tumombaꞌ nok solobuku kiwakilan nok Tuhan. 4 Ami mga kiwakilan nok Tuhan mokposampoy, sok ponabut niyu, daꞌdun taꞌ ok kopatut nami tumabuk nok kan bug ginumon? 5 Daꞌdun taꞌ buwan ok kopatut nami ni moglibun nog gilug ta sok kotombaꞌ, bangka oyitoy sok kopanow nami mokposampoy mamaꞌ nog ininang nok kodumahan ta mokpoposampoy bu ni bug mga gilug ni Panghuꞌ Isa nog laki? 6 Atawa ami hadja ni Barnabas ok sumboy mogusaha para sok kotubuan nami? 7 Ongon taꞌ buwan song mga kosundaluhan nog gadjihanin og lawasin? Mikodongog amu taꞌ nok tow miguma sokaliꞌ diꞌ in mokan ok pimula nin? Atawa ongon taꞌ ong migipat nong mga kambing, sokaliꞌ diꞌ yanin mokinum nog gatas nong mga kambing koyon?

8 Ok tinaluꞌ u kini kanaꞌ hadja tidu sog gaddat nong manusiyaꞌ, sugaid tinonduꞌ da sop sok Kitab Sutsi nok taga kopatut ong mga mogoginang bogoyan nok kotubuan nilon. 9 Poꞌ sinulat sok sok solobuk saraꞌ nok piponog diyon ni Nabi Musa nog ondiꞌ nilon bogbodon og babaꞌ nok kolabow soliyanin moginang bagun mokokan yanin. Kanaꞌ ok saraꞌ nok Tuhan kini para tibuwa song mga kolabow, 10 sugaid labi-labi pa para dinita niyu. Tantu sinulat ok saraꞌ kini para song mga tow nong mamaꞌ nong mogoguma para sok Tuhan. Ong mga tow nong mogbadjaꞌ bu ong mga tow nong monggani, ongon ok pogdodamahan nilon nok kobahagian ilon nok songkuꞌ sog ginang nilon, dadi ong mga mogoginang pa taꞌ para sok Tuhan? 11 Pimulahan nami og diyalom pongatoyan niyu nog boniꞌ nok Parman nok Tuhan, na mobogat taꞌ bilaꞌ dodamahan nami diniyu ok kotubuan nami? 12 Bilaꞌ ongon ok kopatut nong mga len tow nong mokpoposampoy mogdodama nok kotubuan nilon tidu diniyu, ami pa taꞌ? Tibuwa ondaꞌ nami da gamitoy ok kopatut koyon. Sugaid tiggolan nami og lam nog olo-olo bagun daꞌdun ong mokobolabag sok pikilan nong mga tow tumabuk nong nok posampoyon nami pasal sog Al-Masih. 13 Daꞌ niyu taꞌ kosunoy nok sima-sima ong miktolagad sog , diyon da sop nilon alapoy ok kan nilon bu mokohampit sok sinumbaliꞌ sok diyon? 14 Saan na miksuguꞌ ok Panghuꞌ nok sima-sima ong mokposampoy nong Mobais nok Suksugan, sumboy ilon tabangan sok kotubuan nilon song mga tow nong mikohampit sok suksugan kini.

15 Tibuwa daꞌ u imakatoy ong mga kopatut kini, bu da u sop kini sulatoy bagun mongoni u diniyu nok tabang. Golomu pa matoy tidu sok kobolongan ku nok kobantugan nong mokposampoyu nog daꞌ u pogdodama nog olo-olo. 16 Bisan mokposampoyu nong Mobais nok Suksugan pasal sog Al-Masih, daꞌdun ok kopatutu mogabbu. Poꞌ miwajib dinakon nong mokposampoyu, bu mokondok-ondok ok koposunguan ku bilaꞌ diꞌ u posampoyon ong Mobais nok Suksugan. 17 Bilaꞌ ok pokposampoyu kini tidu hadja sok kolegan nog ginawa-baran ku, mokopogdodama u bosiya nog gadji, sugaid pagga og ginang kini pingandol nok Tuhan dinakon, wadjibu mokposampoy bisan daꞌdun og gadji u. 18 Dadi olo ma ok tumbasu? Ok tumbasu yonin na og loliyagu nong mokoposampoyu nong Mobais nok Suksugan nog daꞌdun og bayad, saan na diꞌ u mongoni nok kotubuan bisan ongon ok kopatutu dun.

19 Poꞌ bisan daꞌdun ok tow nong mongulipon dinakon, lamigu mokpoulipon sog lam nong manusiyaꞌ bagun moyitu sok kotombaꞌ ni Isa Al-Masih ong modakol nok tow. 20 Bilaꞌ mokampuꞌ u song mga salu bangsa u Yahudi, dogilingan ku ilon bagun mooyitu ilon posunguꞌ sog Al-Masih. Migunutu sok saraꞌ nok piponog diyon ni Musa bisan kanaꞌ u sog diyaloman nok saraꞌ bagun ku moyit sog Al-Masih ong mga sog diyaloman nok saraꞌ. 21 Maꞌ nituꞌ da sop bilaꞌ diyon ku mokposampoy song mga tow nog diꞌ mogunut song mga saraꞌ nok piponog diyon ni Nabi Musa, miglokotubuꞌ u mounut song mga gaddat nilon bagun moyitu ilon tumombaꞌ ni Isa. Sugaid ondaꞌ u da bolongoy ok suguan nok Tuhan, poꞌ inunutu ong mga suguan nog Al-Masih. 22 Bilaꞌ mokposampoyu song mga tow nok kanaꞌ pa mopagas ok kopongandol nilon ni Panghuꞌ Isa, mogdogilingu dinilon mogliin nog haram dinilon bagun moyitu ilon. Lamigu inangon og olo-olo nituꞌ sok sima-sima towoy bagun ongon ong mooyitu moawon. 23 Inangon ku kini kotanan bagun mokanat ong Mobais nok Suksugan, bu pasal niyon kobahagian ku dun.

24 Na bilaꞌ moglumbaꞌ ong mga tow, modakol ong mampuꞌ gumobok, sugaid solokotow da ong momondag. Saan na amu sop mga moktotombaꞌ, mamaꞌ nong mga moglolumbaꞌ, pomologbog amu moglokotubuꞌ mounut sok kolegan nok Tuhan bagun malap niyu ok pomondagan diyanin. 25 Ong moglolumbaꞌ paatonin og lawasin sog lam nituꞌ bagun momondag yanin. Tibuwa ok pomondaganin koyon mopapas da. Sugaid ita mga moktotombaꞌ sog Al-Masih, mogapas ita bagun mokalap ita nok pomondagan nog diꞌ mobolong solama-lama. 26 Saan na, tipoton ku sop ok kopagasu para sok Tuhan mamaꞌ nok tipoton nong moglolumbaꞌ ok kopagasin bagun momondag yanin. Ibadat nong mogbaksing, sumugat kotanan ok suntuku bu kanaꞌ posunguꞌ sog galuꞌ. 27 Dadi tigollan bu paaton ku og ginawa-baran ku mamaꞌ nong moglolumbaꞌ kituꞌ bagun akon kini, solokotow mongnonasihat song mga duma, diꞌ kobolongan nok pomondagan.