Mokan taꞌ ok Kan nog Bakas na Dinulang song mga tuhan-tuhan?
8
Na pasal song mga ponganon nog dinulang dituꞌ song mga tuhan-tuhan,
mokokan ita taꞌ dun atawa ondiꞌ?
Kiosunan ta nog lam ta taga kokosun,
sugaid pondomon ta nong mokooyit ok kokosun nok tow sok pogabbu bug pikilan nong mobais pa yanin tidu sog duma nin.
Tibuwa golom pa nong moglasa-linasahoy ita,
poꞌ mokopopagon kini song mga moktotombaꞌ.
2 Ok tow nog baluꞌ in nong mopandoy na sog lam nog olo-olo,
maana nin kulang pa ok kokosunin.
3 Sugaid ok tow nong molasa sok Tuhan,
kilalahan yanin nok Tuhan.
4 Dadi pasal sok kan kituꞌ nog dinulang song mga tuhan-tuhan,
mokokan ita taꞌ mga moktotombaꞌ dun?
Na kiosunan ta na nong mga tuhan-tuhan kanaꞌ tokodoy motud,
poꞌ solobuk da dodaꞌ ok Tuhan,
daꞌdun da og len.
5 Na bisan sooy ongon ok pigbinaan nog ginisan nok tuhan-tuhan sog langit bug lupaꞌ,
bu sumbahon nong mga tow ong modakol nok tuhan-tuhan bug mga migbaluꞌ-baluꞌ nok panghuꞌ,
6 ondaꞌ ami pokpomotud dun.
Poꞌ kiosunan ta nok solobuk-lobuk da dodaꞌ ok Tuhan,
yonin na og Gommaꞌ,
ong migimung nok kotanan,
bu miglokotubuꞌ ita para diyanin.
Bu para dinita solobuk da sop ok Panghuꞌ,
yonin na si Isa Al-Masih.
Biyan diyanin miongon ok kotanan bu miglokotubuꞌ ita biyan diyanin.
7 Sugaid kanaꞌ kotanan nong mga moktotombaꞌ sog Al-Masih mikokosun nini,
poꞌ sok ponabut nog duma nok tagnaꞌ milayam moksumba song mga tuhan-tuhan,
mikampuꞌ da sop ilon moksumba dun bilaꞌ kuman ilon nok kan nog bakas dinulang dun.
Dadi mobogat ok pongatoyan nilon poꞌ niyat nilon moimung ilon nong mosammal dun.
8 Song motudin ondiꞌ ita mokososuat sok Tuhan biyan sok kan.
Ok kan kanaꞌ mokopolani bu kanaꞌ sop mokopolayuꞌ dinita sok Tuhan.
9 Sugaid bisan moluhaya amu kuman sog bisan olo nituꞌ,
pokpotubud amu!
Poꞌ sunoy yonin koyon moimung sabapan mokosimoy ong mga tow nok kanaꞌ mopagas ok kotombaꞌ nilon sok Tuhan.
10 Bilaꞌ amu,
kiosunan niyu nog daꞌdun ok tuhan-tuhan,
sugaid ongon pa og duma niyu nog daꞌ pa kosunoy.
Dadi bilaꞌ soupama motongow amu nilon kinuman sog baloy nok tuhan-tuhan,
tantu mooyit niyu da sop ilon kuman.
11 Dadi sabap sok kokosun niyu nong mokokan amu nog olo-olo nituꞌ,
linaat niyu og gilug niyu sok kotombaꞌ nok kanaꞌ mopagas ok kopongandolin.
Sokaliꞌ minatoy da sop si Isa Al-Masih para diyanin.
12 Biyan dun mikodusa amu na sog Al-Masih poꞌ mikodusa amu sog gilug niyu sok kotombaꞌ nong mogduwaꞌ-duwaꞌ bug olo ong mobais inangon.
13 Saan na bilaꞌ soupama mokosimoy og gilugu sok kotombaꞌ pasal sok pongonganon ku,
diꞌ u na tokodoy kuman ok sinumbaliꞌ bagun kanaꞌ moglaat ok kotombaꞌ in pasalan dinakon.