1 Kurintu 7

Ok Pomali pasal sok Poglaki-bini

Na pasal sok sak nok sinulat niyu dinakon, yonin kini ok tabalu. Golom pa og laki diꞌ mokinam nog libun. 2 Sugaid bagun kohallian ok pogjina, sumboy og laki ongon og libunin, bu og libun sumboy ongon og laki nin. 3 Dadi wajib poduhulon nog laki ok kopatut nog libunin, bu wadjib nog libun poduhulon ok kopatut nog laki nin. 4 Poꞌ kanaꞌ og libun ong mogbayaꞌ sog lawasin, sugaid og laki nin. Bu kanaꞌ og laki ong mogbayaꞌ sog lawasin, sugaid og libunin. 5 Dadi diꞌ niyu pogondian og laki atawa libun niyu muwal bilaꞌ moksolobuk amu nok pikilan nok tipoton niyu og waktu niyu sanu-sanu ondow sok poksombahayang. Sugaid doksuꞌ bangka niyu inang puliꞌ ok kolegan niyu bagun diꞌ amu mosassat nog bilaꞌ diꞌ niyu na kosandalan ong napsu niyu. 6 Ong mga taluꞌ u kini, kanaꞌ ok suguan diniyu, kumboyon amu da moglaki atawa moglibun bilaꞌ kolegan niyu. 7 Ok kolegan ku bosiya nog diꞌ amu moglaki atawa moglibun mamaꞌ dinakon, tibuwa kanaꞌ ita migbatuk, solen-solen og binogoy dinita niyu nok Tuhan.

8 Na sosuku nog daꞌdun pa ok parisin, bu sosuku nog balu, taluan ku amu nog golom pa nong mokpobilin amu mamaꞌ dinakon. 9 Sugaid bilaꞌ ondiꞌ amu mokosaggaꞌ song napsu niyu, poglaki atawa poglibun amu na. Poꞌ yonin da koyon og labi mobais nog inangon niyu tidu sok kologonan amu biyan sok sassat nong napsu niyu.

10 Pasal sop song mga moglaki-bini, na kini ok suguan nok kanaꞌ miktidu dinakon, sugaid tidu sok Panghuꞌ ta : Sumboy diꞌ sumuwoy og libun sog laki nin. 11 Sugaid bilaꞌ molong yanin sog laki nin, sumboy diꞌ yanin moglaki mokpuliꞌ atawa sumboy moktiguliꞌ ilon nog laki nin. Na og laki mamaꞌ niyon da sop, sumboy diꞌ in bolongon og libunin.

12 Na ongon da sop ok taluon ku song mga duma nok tidu dinakon poꞌ daꞌ kotaluꞌ nok Panghuꞌ pasal dun. Bilaꞌ ongon ok solokotow laki nog gilug ta sok kotombaꞌ ni Isa Al-Masih nok taga libun nok kanaꞌ , sokaliꞌ og libun koyon meleg da sumolobuk diyanin, na sumboy diꞌ bolongon nog laki og libunin koyon. 13 Na bilaꞌ ok solobuk libun da sop nong moktotombaꞌ ni Isa Al-Masih taga laki nok kanaꞌ moktotombaꞌ, sokaliꞌ og laki koyon meleg da sumolobuk diyanin, na sumboy diꞌ bolongon nog libun og laki nin koyon. 14 Poꞌ og laki nok kanaꞌ mogogunut ni Isa Al-Masih misunuꞌ yanin mosutsi pasal sok kosolobukin sog libunin nong moktotombaꞌ, bu og libun nok kanaꞌ mogogunut ni Isa Al-Masih misunuꞌ yanin mosutsi pasal sok kosolobukin sog laki nin moktotombaꞌ. Poꞌ bilaꞌ kanaꞌ, maana nin sampoy mga gumbataꞌ nilon kanaꞌ sutsi, sugaid song motudin misunuꞌ ilon mosutsi.

15 Sugaid bilaꞌ ok tow kanaꞌ moktotombaꞌ ni Isa ong meleg molong sog libunin atawa sog laki nin, potiyangoy niyu na nong mawaꞌ ilon. Bilaꞌ mokobiyan nong mamaꞌ nituꞌ mokopuwas na og gilug taꞌ moktotombaꞌ koyon sok pigisunan nilon. Sugaid kolegan nok Tuhan nog ongon ok poksulut-sulut sok sosuku nok tinumombaꞌ diyanin. 16 Poꞌ bilaꞌ ika og libun, sunoy moyit nu og laki nu sok kotombaꞌ ni Isa bagun yanin moawon. Atawa bilaꞌ ika og laki, sunoy moyit nu og libun nu sok kotombaꞌ ni Isa bagun yanin moawon.

17 Dadi kokoniya diniyu sumboy tumabuk nog olo-olo og ginantaꞌ nok Tuhan diyanin, bu mokpodayun moglokotubuꞌ sok kobotang-botang niyu sog waktu nog inonggat amu moimung nok sukuꞌ in. Maꞌ niyon ok tinintuluꞌ u sog lam nong mga ni Isa Al-Masih sog ayin-ayin bonuwahoy. 18 Na soupama ongon solokotow midoksuꞌ na sog daꞌ pa yanin tombaꞌ ni Isa Al-Masih, sumboy diꞌ in bunihon nong miislam yanin. Bu bilaꞌ ongon og laki nog daꞌ pa islamoy, diꞌ na sooy yanin mokpoislam. 19 Pasal kanaꞌ mohalgaꞌ bilaꞌ miislam atawa ondaꞌ, sugaid ong mohalgaꞌ para sok Tuhan bilaꞌ tumombaꞌ ita song mga suguanin. 20 Saan na diꞌ amu mogniyat nok sumboy mopinda na ok kobotang-botang niyu sowkat na nong miimung amu na nok . 21 Dadi bilaꞌ solobuka nok pokasi nu manusiyaꞌ sog waktu nog inonggata mosukuꞌ sok Panghuꞌ, diꞌ a na mosusa pasal sok koulipon nu. Tibuwa bilaꞌ ongon og waktu nong mokopuwasa dun, na imakatoy nu. 22 Pasal bilaꞌ solobuka nog gulipon sog duma tow sog waktu nok koonggat ni dinika moimung sukuꞌ in, mamaꞌ sopantun nong miawaꞌ na ok koulipon nu poꞌ miluhaya a na pasal diyanin. Bu ok tow nok kanaꞌ gulipon sog waktu nong mionggat yanin nok Panghuꞌ, miimung yanin nog gulipon ni Panghuꞌ Isa Al-Masih. 23 Landuꞌ og halgaꞌ nok poglokat diniyu nok Tuhan, saan kanaꞌ amu tolop mokpoulipon song mga tow. 24 Dadi mga koilugan ku sok kotombaꞌ, bisan olo ok kobotang-botang niyu sog daꞌ amu pa onggatoy moimung , pokpotattap amu diyon moktolagad sok Tuhan!

Pituwa para song mga ondaꞌ Kokawing

25 Pasal song mga subul-budjang, daꞌdun ok sinuguꞌ dinakon nok Tuhan. Tibuwa pituwahan ku amu poꞌ tidu sok kololat nok Tuhan, binogoyin dinakon ok kokosun nok kopongandolan. 26 Pasal sog landuꞌ nok kosigpitan song ningkomun kini, sok ponontongu golom amu na mokpodayun sok kobotang-botang niyu. 27 Na ok sosuku nok taga libun na, diꞌ niyu sop bolongon og libun niyu. Bu bilaꞌ daꞌdun og libun niyu, diꞌ amu na moglibun. 28 Sugaid bilaꞌ dodaꞌ meleg amu na moglibun, na kanaꞌ da sop og . Bilaꞌ sop og budjang meleg na moglaki, kanaꞌ da sop og dusa. Tibuwa ong mga moglaki atawa moglibun, tantu monanam nilon og logon nok kobiyanan nong mga moglaki-bini. Ok kolegan ku bosiya nog diꞌ koyon matong diniyu. 29 Dadi ong maana nok taluꞌ u kini mga koilugan, mamaꞌ nini: Og waktu ta sog dunya kini landuꞌ na kopolok. Dadi tidu ningkomun ok sosuku nong moglaki-bini, sumboy inangon nilon ok kolegan nok Tuhan mamaꞌ nok koinang nilon sog daꞌdun pa og laki atawa libun nilon. 30 Bu ong mga migloliyag atawa misusa, sumboy ilon mamaꞌ hantang nog ondaꞌ da pogloliyag atawa poksusa, bu ong mga sinumaluy sumboy pikilon nilon nong mamaꞌ nok kanaꞌ dinilon ok sinaluy nilon. 31 Og logdongin, sog bon ta totubuꞌ dini sog dunya, sumboy diꞌ ta polabihon og olo-olo nok para tibuwa sok kotubuꞌ ta dini sog dunya. Poꞌ og dunya kini posunguꞌ na mopapas.

32 Kolegan ku nong molayuꞌ amu sok kosusahan. Poꞌ og laki nog ondaꞌ poglibun mosunguꞌ in ok poktolagadin sok Panghuꞌ bug ponoy yanin mokososuat sok Panghuꞌ. 33 Sugaid ok tow nok taga libun mosusa yanin song mga olo-olo dini sog dunya bug olo og inangonin bagun kosuatan og libunin. 34 Dadi mibahagiꞌ ok pikilanin. Na og libun sop nog daꞌdun na og laki nin, atawa budjang pa, mosunguꞌ in ok poktolagadin sok Panghuꞌ, bug ponoy mosutsi og lawasin bug pomikilin. Sugaid og libun nok taga laki, mosusa yanin song mga olo-olo dini sog dunya, bug olo og inangonin bagun kosuatan diyanin og laki nin. 35 Sinuksugu kini diniyu para sok kopiyahan niyu. Ondaꞌ u amu pogondioy moglibun atawa moglaki. Sugaid ok kolegan ku moglokotubuꞌ amu nog dait sok kotombaꞌ niyu, bu daꞌdun ong mokosasow sok poktolagad niyu sok Panghuꞌ.

36 Na para sop song mga miktunang, bilaꞌ og laki ondiꞌ mokotiggol sog ginawa nin sok tunangin nog budjang, kumboyon niyu na ilon mokpokawing, bu kanaꞌ koyon og dusa. 37 Sugaid og laki nong misolobuk sok pongatoyanin nog ondiꞌ na yanin moglibun, bu ondaꞌ poktogolloy, bu mokosaggaꞌ da sop yanin nong napsu nin, na mobais nog diꞌ yanin moglibun. 38 Dadi mobais ong moglibun sok tunangin, sugaid mobais pa og diꞌ na dodaꞌ moglibun.

39 Na pasal song mga kolibunan nok taga laki na, mamaꞌ hantang nok kiikotan ilon sog laki nilon sog bon nilon totubuꞌ. Sugaid bilaꞌ matoy na og laki nilon, mogdadi da ilon moglaki sima-sima ok kolegan nilon, basta ok poglakihon nilon ong sok . 40 Sugaid sok ponontongu, golom pa dinilon bilaꞌ diꞌ na moglaki mokpuliꞌ, bu sok pikilan ku, dini da sop dinakon og mokpopituwa.