Ok Pokposulut song mga Moktotombaꞌ sog Al-Masih
6
Na bilaꞌ ongon og daꞌ poksulut-sulut sok pigilugan niyu moktotombaꞌ,
sumboy diꞌ niyu posauton song mga monghuhukum sog bonuwa.
Pogusoy-usoyan niyu na sog duma niyu moktotombaꞌ.
2 Daꞌ niyu taꞌ buwan kosunoy nog ita kini mga sukuꞌ nok Tuhan og humukum sog dunya?
Saan na manu diꞌ niyu tanan mogaga poksulut-suluton ok pigilugan niyu moktotombaꞌ bisan song mga mikaan nog botang?
3 Bu ondaꞌ niyu taꞌ buwan sop kosunoy nog bisan ong mga malaikata,
ita da sop og humukum dun sog lomaꞌ-dinglag?
Dadi sumboy ita da sop mokosun humusoy song mga porkalaꞌ soliyan ta totubuꞌ.
4 Na bilaꞌ ongon ok suwalan niyu,
manu pogusoyon niyu pa ma song mga monghuhukum nog diꞌ kopongandolan sog jomaa niyu poꞌ daꞌ tombaꞌ sog Al-Masih?
5 Na mokosipog koyon diniyu!
Daꞌdun taꞌ diyon diniyu bisan solokotow nong mokosun mongusoy song mga koilugan ta niyu sok kotombaꞌ ni Isa Al-Masih?
6 Amu bu amu da mga gilug sok kotombaꞌ ong moksinaggaoy,
bu pohukumon niyu pa tokodoy sok tow nog daꞌ tombaꞌ sog Al-Masih!
7 Ok poksinumbungoy niyu sog duma niyu moktotombaꞌ sok poghukuman,
mokpotongow nog dinag amu na sok sassat nog Iblis.
Na golom pa potiyangan niyu na hadja bilaꞌ ongon ong moginang nong molaat diniyu atawa moglimbung diniyu.
8 Sugaid ok poginangon niyu,
monginang amu nong molaat bu monglimbung amu,
bu koyon og inangon niyu sampoy sok koilugan niyu sok kotombaꞌ.
9 Daꞌ niyu taꞌ buwan kosunoy,
ok tow nong monginang nok kolaatan ondiꞌ kopusakaan nok Pomarinta nok Tuhan?
Saan diꞌ niyu akkalan og ginawa-baran niyu!
Poꞌ diꞌ na dodaꞌ mosukuꞌ dun ong mga sumumba sok tuhan-tuhan,
mga mogjina atawa mga moksumbang sog batuk nilon laki atawa libun,
10 mga polonakow,
mga monapsu sog gartaꞌ,
pololangu,
pololimbung atawa mga mogimung-imung nok taluꞌ.
Ong mga monginang nok kolaatan diꞌ na dodaꞌ mokampuꞌ sok Pomarinta nok Tuhan.
11 Na mamaꞌ niyon ong mga duma diyon diniyu tagnaꞌ,
sugaid sinutsi amu na song mga dusa niyu,
bu pisuwoy amu na moimung sukuꞌ nok Tuhan.
Bu inimung amu na nong mologdong sok ponontong nok Tuhan biyan sok kowasa nong ngalan ni Panghuꞌ Isa Al-Masih bu biyan sog Ruh nok Tuhan ta niyu.
Gamiton ta og Ginawa-baran ta Mokpotas sok Tuhan
12 Na ongon ong miktaluꞌ,
“Biyan sog Al-Masih moluhaya ita na,
ondaꞌ ita na sog diyaloman nok saraꞌ.”
Sugaid taluon ku,
bisan moluhaya ita na moginang nok kolegan ta,
sumboy diꞌ ita meleg nok pogbayaan nog dusa.
13 Ongon sop moktaluꞌ,
“Ok kan para sok tiyan,
bu ok tiyan para sok kan.”
Motud koyon,
sugaid pondomon ta nog loma-dinglag bolongon da nok Tuhan ok kan bug tiyan.
Tantu ondiꞌ ita mogjina mamaꞌ sopantun nong mokokan ita bilaꞌ mogutom ita,
poꞌ og lawas ta kanaꞌ para sok pogjina,
sugaid para tokodoy sok Panghuꞌ,
bu ok Panghuꞌ para sog lawas ta.
14 Na biyan sok kowasa nin pitubuꞌ puliꞌ nok Tuhan si Panghuꞌ Isa tidu sok kopatoy,
bu potubuonin da sop ita niyu puliꞌ sog binayaꞌ gondow.
15 Ondaꞌ niyu taꞌ buwan kosunoy og lawas ta niyu misukuꞌ na ni Isa Al-Masih?
Saan na polosili,
kanaꞌ ta posukuon og lawas ta sog lawas nog libun nok kanaꞌ og libun ta.
16 Ondaꞌ niyu taꞌ kosunoy og laki nong mogjina sog libun bayadan,
moimung solobuk lawas diyanin,
poꞌ sinulat sog diyalom nok Kitab nong moksolobuk og duwaꞌ kotow.b
17 Sugaid ok tow nok sukuꞌ ni Panghuꞌ Isa,
mosolobuk diyanin biyan sog Ruh.
18 Dadi hallioy niyu mogjina!
Motud,
nong molaat da sop dodaꞌ og duma nog dusa,
sugaid ondiꞌ mosugat og lawas mamaꞌ sok pogjina.
Poꞌ ong mogjina,
mogdusa yanin sog lawasin.
19 Mga duma nami moktotombaꞌ,
ondaꞌ niyu taꞌ kosunoy og lawas niyu kini yonin na og baloy sutsi,
ok pigonongan nog Ruh Mahasutsi nog binogoy nok Tuhan diniyu?
Dadi kanaꞌ ita og gapuꞌ nog lawas ta kini.
20 Landuꞌ kohalgaꞌ ok kolokat nok Tuhan dinita niyu tidu song mga dusa ta niyuc,
saan na gamiton ta og lawas ta bagun potason ok Tuhan biyan dun.