Ong mga Sukuꞌ nok Tuhan sumboy Mosutsi
5
Na song motudin midongogu nog ongon ok pogjina diyon sok tumpukan niyu.
Poꞌ sinuksugan ku nog ongon og laki diyon diniyu moksolobuk sog libun nog gommaꞌ in.
Labi pa kini moliksok tidu sog ginang nong mga tow len bangsa nog daꞌ pokokilala sok Tuhan,
poꞌ daꞌ koyon kotolimaꞌ dinilon.
2 Bu moabbu amu pa tanan!
Manu diꞌ amu ma mosusa bu mogaduy bangka pawaoy ok tow koyon sog diyaloman niyu?
3 Bisan ondaꞌ u diyon,
ok pongatoyan ku diyon diniyu,
bu binotangan ku na nog hukuman ok tow nong miginang nong mamaꞌ niyon.
4 Dadi moglumpuk-lumpuk amu mga moktotombaꞌ,
bu diyon da sop ok pongatoyan ku.
Bu song ngalan nok Panghuꞌ ta Isa Al-Masih,
bu biyan sok kowasa nog binogoyin dinita,
hukumon ta ong migjina kini.
5 Posagadan niyu ok tow koyon sok kounutan nong mga soytan bagun laaton og lawasin,
sugaid bung mayan moktowbat yanin bagun moawon ong nyawa nin sog gondow pokpuliꞌ nok Panghuꞌ moghukum.a
6 Kanaꞌ mobais ok pogabbu niyu.
Diꞌ niyu taꞌ buwan kosunan og dusa nok solokotow mokopalit sog lam nong mga moktotombaꞌ?
Na og dusa mamaꞌ sopantun nong mikaan nok posulig nog inampuꞌ sog inabdun bangka pokpokumbang sok kotanan.
7 Saan na awaꞌ niyu na og lam nong mogoyit diniyu sok kodusahan bagun mosutsi amu na.
Song motudin,
misutsi amu na,
poꞌ piglillaꞌ ni Isa Al-Masih og ginawa nin miimung nok kurban bagun mopapas ong mga dusa ta.
Mamaꞌ yanin nog bataꞌ bilibili nok sumbalion sog waktu nog Halilaya Pogliyus.
8 Saan na ita mga piktowan nok Tuhan,
mogloliyag ita da sop mokpopondom nong minatoy si Isa Al-Masih para dinita.
Dadi tolikudan ta og dan ta nok kolaatan,
sugaid bologbogan ta sok kosutsihan,
bu unuton ta ok kosobonnalan.
9 Sok tagnaꞌ nok sulatu diniyu,
miktaluꞌ u nog diꞌ amu mampuꞌ song mga tow nong mogjina.
10 Ok piktaluꞌ u kini kanaꞌ ong mga tow nog daꞌ tombaꞌ sok Tuhan,
mamaꞌ nong mga mogjina,
monapsu sog gartaꞌ,
mga monakow,
atawa mga moksosumba sok tuhan-tuhan.
Poꞌ sog bon nog dini amu pa sog dunya,
mokolumpak amu na dodaꞌ nong mamaꞌ niyon nok tow.
11 Ok posabut nok taluꞌ u koyon,
sumboy diꞌ amu mampuꞌ sok sima-sima nong mangkon nog gilug niyu sok kotombaꞌ sokaliꞌ mogjina,
atawa monapsu sog gartaꞌ,
moksumba sok tuhan-tuhan,
mogimung-imung nok taluꞌ,
moglangu-langu atawa monakow.
Na bisan kuman,
ondiꞌ amu sumalu song maꞌ niyon nok tow nong mangkon nog gilug niyu sok kotombaꞌ.
12-13 Kanaꞌ u og ginang humukum song mga tow nog daꞌ tombaꞌ,
poꞌ ok Tuhan da og humukum dinilon.
Sugaid wajib diniyu humukum song mga kodumahan niyu moktotombaꞌ sog Al-Masih.
Poꞌ misulat sok Kitab Tawrat,
“Pawaꞌ niyu sok tumpukan niyu ok tow nong molaat.”b