Ong mga Mokpoposampoy sumboy Kopongandolan
4
Saan na pikil niyu ami nong mga sosuguon bug moktotolagad nog Al-Masih nok sinuguꞌ nok Tuhan mokposabut diniyu pasal sok pokposampoy nog daꞌ potampaloy masa tagnaꞌ.
2 Na sosukuꞌ nong moktotolagad,
sumboy kopongandolan.
3 Bisan olo ok ponontong niyu atawa og duma nok tow dinakon pasal sok poktolagadu posunguꞌ sok Tuhan,
daꞌdun og balan ku dun.
Bu kanaꞌ da sop akon ong moghukum sog ginawa-baran ku.
4 Daꞌdun ok sene-sabutu nong miginangu nok kolaatan,
sugaid kanaꞌ da sop koyon migmaana nog daꞌdun og dusa u.
Ok Panghuꞌ da ong mokosun dinakon.
5 Dadi diꞌ amu humukum sog bisan sima bilaꞌ daꞌ pa datong og waktu nin,
bagadoy niyu bilaꞌ matong ok Panghuꞌ.
Yanin da ong mokpodolag nong mga binuni nog ginang nok tow bu mokpotampal bug olo sok pongatoyan nong mga manusiyaꞌ.
Doksuꞌ potason nok Tuhan sosuku nok tow nog dait potason.
6 Na mga pigilugan ku sok kotombaꞌ,
inimungu ami ni Apollos nok pononggian bagun poganadan niyu nog diꞌ amu lumabi song misulat sok Kitab.
Poꞌ bilaꞌ unuton niyu ok suguan kini,
diꞌ niyu potason ok solokotow nog gulipon nok Tuhan,
sokaliꞌ babaꞌ-babaon niyu og duma.
7 Na ondiꞌ amu mokpikil nong motas amu tidu sog duma niyu.
Olo buwan og diyon diniyu nok kanaꞌ miktidu sok Tuhan?
Dadi bilaꞌ binogoy tidu sok Tuhan,
kanaꞌ niyu pongabbu mamaꞌ nog amu ok piktiduhanin.
8 Anduꞌ,
baluꞌ niyu daꞌdun na ok kulang niyu.
Baluꞌ niyu nog dayahan amu na sok ponontong nok Tuhan,
bu miksultan amu na nog daꞌdun og labot nami mga mokpoposampoy diniyu.
Na mobais bosiya bilaꞌ miksultan amu na bagun sama-sama ita niyu moimung sultan.
9 Tinaluꞌ u nong maꞌ niyon poꞌ para dinakon,
mamaꞌ hantang nog ami,
mga mokpoposampoy binotang nok Tuhan sok kinobabaan sok kotanan nok tow.
Poꞌ mopononggiꞌ ami sok towanan kituꞌ nog hinukuman patoyon sok kodakolan nok tow bu mikosaksiꞌ da sop ong mga malaikat dun.
10 Sok pokposampoy nami pasal sog Al-Masih,
mga dupangon ami sok ponontong nok tow,
sugaid amu,
mokopandoy amu pasal sok poksolobuk niyu ni Isa Al-Masih.
Ami kini ong mga mokolamma,
sugaid amu dow mga mokopagas.
Pogaddatan amu,
sugaid ami pomosipogon.
11 Bisan sog waktu kini,
miksandal ami nog gutom bug kuwow,
bu danul na ong mga ponapot nami,
pogbinasahon ami nong mga tow,
bu daꞌdun ok pogonongan nami.
12 Moktiksaꞌ ami moginang bagun mokokan.
Bilaꞌ ponaluꞌ-naluan ami,
pongoni-ngonihan nami nog barakatan ilon nok Tuhan.
Bilaꞌ pogbinsanaon ami,
tiggolan nami.
13 Bu bilaꞌ taluon nong mga tow nong molaat pasal dinami,
sulian nami ilon song mobais nok taluꞌ.
Sampoy ningkomun mamaꞌ ami hadja nok kaput sog dunya kini nog daꞌdun ok kopolosuddahan dun.
14 Daꞌ u kini sulatoy bagun kosipogan amu,
sugaid bagun ku amu pituwahan mahatul,
poꞌ amu mamaꞌ hantang nong mga gumbataꞌ u nok kolasahan.
15 Poꞌ bisan sopuluꞌ ngibu guru nong moktintuluꞌ diniyu pasal ni Isa Al-Masih,
luwal dinakon kanaꞌ da modakol ong mga gommaꞌ niyu sok kotombaꞌ.
Miimungu nog gommaꞌ niyu dangan migoyitu diniyu sok kotombaꞌ ni Isa Al-Masih biyan sok pokposampoyu diniyu nong Mobais nok Suksugan kini pasal diyanin.
16 Saan na pongonihon ku diniyu,
logilingoy niyu akon.
17 Pasal nituꞌ piangoyu diyon diniyu si Timuti,
ok kolasahan bu kopongandolan nog bataꞌ u sok kotombaꞌ ni Panghuꞌ Isa Al-Masih.
Yanin ong mokpopondom diniyu song mga pobiyan nog inunutu sog bogu kotubuꞌ u ni Isa Al-Masih,
bu yonin da sop ok tintuluon ku song mga moktotombaꞌ sog lam nog jomaa sog ayin-ayin bonuwahoy.
18 Og duma diyon diniyu moabbu,
poꞌ niyat nilon nog ondiꞌ u mokpuliꞌ diyon.
19 Sugaid bilaꞌ meleg da ok Tuhan,
tibowon ku da amu song mosompun kini.
Dadi kosunan ku da bilaꞌ diyon taꞌ song mga moabbu kituꞌ ok kowasa nok Tuhan,
atawa mokosun hadja ilon moktaluꞌ.
20 Poꞌ bilaꞌ ok Tuhan na ong momarinta dinita,
na kanaꞌ hadja motongow ok kowasa nin sok taluꞌ ta,
sugaid sok kotubuꞌ ta biyan song mga ponginangon ta.
21 Dadi ayin buwan ok pilion niyu bilaꞌ mangoyu diyon diniyu?
Kolegan niyu taꞌ nok pogboluan ku amu atawa nok potongowan ku amu nog lasa dunut kolunuk nok pongatoyan?