Siloꞌ Pol, Apollos bug Petros Batuk-batuk da Moktotolagad sok Tuhan
3
Na mga koilugan,
sok tagnaꞌ kituꞌ ondiꞌ u mokoponintuluꞌ diniyu mamaꞌ nok posunguꞌ song mga tow nog diyon dinilon og Ruh nok Tuhan poꞌ mga tow amu pa kododunyahoy.
Inilingu amu mamaꞌ nog bataꞌ popula sok kotombaꞌ niyu sog Al-Masih.
2 Mamaꞌ sopantun nok piinumu amu nog gatas bu kanaꞌ ong mokotogas nok pongonganon,
poꞌ diꞌ amu pa mokuglon pahatul.
Bu sampoy ningkomun diꞌ amu pa mokuglon,
3 poꞌ migunut amu pa sog ginang nok kododunyahoy.
Pagga ongon pa ok koima bug poksuwal-suwal diyon diniyu,
kanaꞌ taꞌ maana nin nong moglokotubuꞌ amu pa mounut sog gaddat kododunyahoy?
4 Poꞌ pagga moktaluꞌ og duma diniyu,
“Sukuꞌ u ni Pol,”
bu og duma sop,
“Dituꞌ u sukuꞌ ni Apollos,”
kanaꞌ taꞌ buwan ok pongaddatan koyon mamaꞌ nong mga manusiyaꞌ nog daꞌ tombaꞌ?
5 Dadi sima buwan dodaꞌ si Apollos,
bu sima sop akon,
si Pol?
Ami kini mga moktotolagad da sok Tuhan mounut sog winakilin dinami.
Saan na mikposampoy ami diniyu,
bu tinumombaꞌ amu sog Al-Masih.
6 Og ginang nami mokposampoy,
mopononggiꞌ sok poguma.
Akon ong mimula nog boniꞌ,
bu si Apollos yonin na ong miktuyung dun,
sugaid ok Tuhan,
ong mikpotubuꞌ dun,
kanaꞌ ami.
7 Dadi ok polabihon niyu,
kanaꞌ ong momula atawa ong moktuyung,
sugaid ok polabihon niyu ok Tuhan da ong mokpotubuꞌ dun,
daꞌdun da muwal.
8 Daꞌdun ok pigbiddaan sok tow nong momula bu sok tow nong moktuyung nog boniꞌ,
monolokotow dinilon tumbasan nok Tuhan mounut sok tiksaꞌ nilon.
9 Poꞌ ami ni Apollos mogduma moginang para sok Tuhan,
bu amu hantang nog gumahan nok Tuhan nok piuma dinami.
Mipononggiꞌ amu da sop sog Baloy nok Tuhan nok piimungin dinami.
10 Dadi pasal sok kolasa-kololat nog binogoy nok Tuhan dinakon,
miimungu mamaꞌ hantang nok pandoy nong minalap nog batu bangka pokpotindog nog gugdok sog baloy para sok Tuhan.
Og logdongin,
akon ong miguna mokposampoy diyon diniyu pasal sog Al-Masih.
Doksuꞌ ong mga duma nok pandoy ok sumukpat mokpotindog sok pokpotindogan koyon.
Sugaid sumboy mokpotubud ok kokoniya bug ponoy pokpotindog nilon sog baloy para sok Tuhan.
11 Poꞌ daꞌdun na len nok pokpotindogan liyu sog landuꞌ kopagon nok pokpotindogan nok pidinsamaꞌ nok Tuhan para dinita niyu,
yonin na si Isa Al-Masih.a
12 Na ong mga sumukpat mokpotindog dun,
usalon nilon ong miglologinis nog langkap.
Mamaꞌ sopantun nog usalon nong mga kopongandolan ong mga langkap nong mohalgaꞌ bu mologon ladakon mamaꞌ nog bulawan,
silber bug mga mokohalgaꞌ nog batu.
Tibuwa ong mga duma usalon nilon ong mga langkap nong modaliꞌ motutung mamaꞌ nok kayu,
parang bug sulidap.
13 Sugaid sog binayaꞌ gondow,
motampal da bug ponoy ong mga kokohinang nok kokoniya,
poꞌ suloyan sog gapuy bagun kosunan bug mopagon da taꞌ.
14 Bilaꞌ ok pitindog nok tow sok pokpotindogan koyon ondiꞌ motutung,
mokotabuk yanin nok tumbas.
15 Sugaid bilaꞌ motutung da nog gapuy og ginang nok solokotow sok pokpotindoganb,
yonin na og Al-Masih,
na kobolongan yanin nok tumbas.
Moawon da yanin,
tibuwa mamaꞌ nong mikopolaguy yanin sog gapuy nog daꞌdun ong mioytin.
16 Ondaꞌ niyu taꞌ kosunoy nok sopantun amu mga moktotombaꞌ nog baloy pigonongan nok Tuhan,
bu diyon diniyu og Ruh nin?
17 Na bilaꞌ ongon og lumadak nog baloy nok Tuhan,
pogmulkaan yanin nok Tuhan,
poꞌ sutsi ok pogononganin.
Bu amu mga mogogunut sog Al-Masih,
ok pogonongan nok Tuhan,
og baloyin.
18 Dadi diꞌ niyu akkalan og ginawa niyu.
Bilaꞌ ongon diniyu mokpikil nong mokosun yanin sok ponontong nog duma nin manusiyaꞌ,
sumboy lotaanin ok pikilanin koyon bu mokpobabaꞌ.
Golom pa modupang amu sok ponontong nong manusiyaꞌ bagun motabuk niyu ong motud nok kokosun tidu sok Tuhan.
19 Poꞌ sok ponontong nok Tuhan,
ok kokosun nong mga manusiyaꞌ kododunyahoy,
kodupangan hadja.
Poꞌ sinulat sog diyalom Kitab,
“Pasal diyanin miunoy ong mga mokopandoy sog gakkal nilon.”c
20 Bu sinulat da sop sok Kitab,
“Kosunan nok Tuhan og lam nok pikilan nong mga mokopandoy,
daꞌdun da og halgaꞌ nok kokosun nilon.”d
21-22 Saan kanaꞌ tolop bantugon nok sukuꞌ amu nog bisan sima towoy.
Poꞌ ami kini si Apollos,
si Petros bug akon,
mga mokpoposampoy nok pioyt nok Tuhan diniyu para sok kobaisan niyu,
bu mosukuꞌ ami diniyu.
Bu og lam nog olo-olo nituꞌ sog dunya,
sok kotubuꞌ bu sok kopatoy,
ok kobotang-botang ningkomun bu sog lomaꞌ-dinglag,
kotanan koyon diniyu.
23 Sugaid amu koyon sukuꞌ nog Al-Masih,
bu og Al-Masih,
sukuꞌ nok Tuhan.