Og Halgaꞌ nok Kopatoy ni Isa sok Kayu
2
Mga koilugan ku sok kotombaꞌ,
sok koangoyu diyon diniyu tagnaꞌ,
pisampoyu diniyu ong Mobais nok Suksugan nok Tuhan.
Sok pokposampoyu ondaꞌ u gamitoy ong mga taluꞌ nong mologon sabuton atawa motas nok pongadjiꞌ.
2 Poꞌ tinuudu nog daꞌdun na muwal ok posampoyon ku luwal ni Isa Al-Masih bu sok kolansangin para dinita sok kayu.
3 Pogdatongu diyon diniyu,
daꞌdun ok pagas nog ginawa-baran ku,
bu miondoku nok sunoy diꞌ u moinang og ginang nok pingandol nok Tuhan dinakon.
4 Sok pokposampoyu diniyu,
daꞌ u bulak-bulakoy ok taluꞌ u bagun amu tumombaꞌ,
sugaid og Ruh nok Tuhan ong mokposobonnal sok pokposampoyu diniyu biyan sok kowasa nin.
5 Ininangu nong maꞌ nituꞌ bagun ok pongandolan niyu ok Tuhan bu ok kowasa nin,
bu kanaꞌ ok kokosun nong manusiyaꞌ.
6 Sugaid ong mga tow nong mokopagon na ok kotombaꞌ nilon,
tintuluan ku ilon nok pongadjiꞌ nong modalom.
Tibuwa ok kokosun kini kanaꞌ kokosun pongdunya,
bu kanaꞌ tidu sok tow nong mogbayaꞌ sog dunya kini,
poꞌ ok kowasa nilon mobolong da.
7 Ok kokosun nok piktaluꞌ u kini diniyu,
yonin na ok kokosun nok Tuhan nog daꞌ potampaloy masa tagnaꞌ.
Ong maana nin sog daꞌ pa imungoy nok Tuhan og dunya,
ginantaꞌ in na nok kobahagian ita niyu nok kotasin.
8 Daꞌdun ong mga kounutan sog dunya sog waktu ta kini nong mikokosun song maksud nok Tuhan.
Poꞌ bilaꞌ kiosunan nong mga kounutan kini,
daꞌ nilon na pilansang ong Mokowasa nok Panghuꞌ.
9 Sugaid mamaꞌ na nong misulat sog diyalom nok Kitab,
“Daꞌdun ong mikotongow bu mikodongog bu mikokosun
bug olo ok kobaisan nok pidinsamaꞌ nok Tuhan para sok tow nong molasa diyanin.”a
10 Tibuwa og lam nituꞌ pitampal na dinita nok Tuhan biyan sog Ruh nin.
Bu olo-olo nituꞌ kiosunan nog Ruh nok Tuhan,
sampoy na ok kinodaloman nong maksud nok Tuhan.
11 Daꞌdun sosolokotow ong mokokosun sog diyalom pongatoyan nog duma nin,
muwal ginawa nin da.
Mamaꞌ niyon da sop,
daꞌdun ong mokokosun pasal sog diyalom pongatoyan nok Tuhan,
muwal og Ruh nin.
12 Kanaꞌ ok pikilan nok kododunyahoy og binogoy nok Tuhan dini dinita,
sugaid og Ruh nin bagun kosunan ta niyu ok kodakol nok pomogoy nok Tuhan dinita.
13 Ok taluꞌ nok tinonduꞌ nami kanaꞌ kokosun nok tidu song manusiyaꞌ,
sugaid tidu sog Ruh nok Tuhan.
Poꞌ tinintuluꞌ nami ok kosobonnalan tidu sog Ruh nok Tuhan song mga tow nog diyon dinilon og Ruh nin.
14 Sugaid ok tow nog daꞌ diyon diyanin og Ruh nok Tuhan,
na diꞌ in tombaan ong mga olo-olo nituꞌ nok tidu sog Ruh nok Tuhan poꞌ sok ponabutin solobuk hadja nok kodupangan bu diꞌ yanin mokosabut.
Poꞌ og Ruh da tokodoy nok Tuhan ong mokotabang bagun mosabut ta niyu.
15 Ok tow nog diyon diyanin og Ruh nok Tuhan,
moktimbang-timbang yanin sog lam nog olo-olo nituꞌ bilaꞌ mobais taꞌ atawa molaton.
Sugaid ong mga tow nog daꞌ diyon dinilon nog Ruh nok Tuhan,
daꞌdun ok kopatut nilon moktimbang-timbang sok tow nok pigbayaan nog Ruh nok Tuhan.
16 Poꞌ mamaꞌ na nong misulat sok Kitab,
“Sima buwan dodaꞌ ong mokotokkad sog diyalom pikilan nok Tuhan?
Sima ong mokotintuluꞌ diyanin?”b
Sugaid sok tabang nok Tuhan,
kibahagian ita nok kokosun nog Al-Masih.