Ok Poktulak niloꞌ Pol sok Siyudad nog Rum
27
Na mikohukum na siloꞌ Gubernur Pestus nok potulakon ami sog Italya.
Dadi inuwakil nilon si Pol bug mga duma nok pinirisu dituꞌ ni Yuliyo,
ok kapitan nok solobuk tumpukan nok tinawag Batalyun nok Sultan nog Rum.
2 Na diyon sok Sesareya simakoy ami sok kappal nok tidu sog Aramittu nok posunguꞌ na tumulak song mga bonuwa sog Bataꞌ-bataꞌ Asiya.
Migunut dinami si Aristarkus,
ok tow Makedonya tidu sok Tesalonika.
3 Poksunud gondow,
dinumongguꞌ ami sok Sidon,
bu mobais og goyitan ni Yuliyo ni Pol.
Kinumboyin si Pol mangoy song mga supali nin bagun kobogoyan yanin nong mga kogunahanin.
4 Doksuꞌ migdayun ami na nok tulak nami,
bu minusul ami sok kilid nok puluꞌ Kipros bagun diꞌ nami mosunsang og galuꞌ.
5 Puwas nituꞌ miglayag ami sok kilid nong mga probinsiya nok Silisiya bug Pampilya bangka ami pa datong sog bonuwa Mira sok probinsiya nog Lisiya.
6 Pogdatong nami diyon,
mikobalak si Kapitan Yuliyo nok solobuk kappal tidu sok siyudad nog Aleksandriya nok posunguꞌ sog Italya,
bangka nin na ami posakoyoy dituꞌ.
7 Moludjaꞌ ok poglayag nami mga sanu ondow,
bu kilogonan ami mokosampoy song molani nog lungsud Kinidus.
Dangan misunsang nami ong mopagas nog galuꞌ,
kitogolan ami mogbuleleng bu miglayag ami sok kilid nok puluꞌ Kerete,
molani sog bonuwa Salmone.
8 Kilogonan ami monusul sok kilidin,
sugaid mikodatong ami da sok solobuk bonuwa,
ngalanin Mobais nok Pontalan,
molani sok siyudad Laseya.
9 Mianggaꞌ ami sok popanowan sampoy nong misaut ami nog waktu mokondok-ondok nok poktulak,
poꞌ mipuwas na ok pokpuwasa bu pongbagyu na.
Dadi tinaluan ni Pol ong mga tow sok kappal,
10 “Mga tuwan,
kiosunan ku ok tulak ta kini mokondok-ondok.
Kanaꞌ hadja ong mga lulan bug kappal kini ong mogmula,
sunoy sampoy og ginawa-baran ta niyu.”
11 Tibuwa ok kounutan nok sundalu koyon,
daꞌ in maling-malingoy ok tinaluꞌ ni Pol,
tinombaanin pa og gapuꞌ bu ong mimonsalan nok kappal.
12 Na kanaꞌ mobais ok pontalan koyon bilaꞌ pongbagyu,
saan na ok kolegan nok kodakolan tumulak na.
Sunoy mokosampoy ami da sog bonuwa Pinika,
ok solobuk pogdongguan sok puluꞌ nok Kerete nok sinumunguꞌ sok sindopan.
Og dongguan koyon,
diꞌ tantu mosugat nog galuꞌ,
saan na dituꞌ na pokpobiyan nok pongbagyu.
Og Bagyu sog Lawd
13 Dangan miksimayaꞌ na og galuꞌ,
miniyat nong mga tow sok kappal nong mounut na ok kolegan nilon.
Binotong nilon ok saw,
bangka ilon ponusul moglayag sok kilid puluꞌ nok Kerete.
14 Sugaid daꞌ kobon,
timokkow moyup og landuꞌ kopagas nog galuꞌ tidu sok puluꞌ koyon.
15 Dadi misugat nog galuꞌ ok kappal,
bu diꞌ na mokosunsang.
Daꞌdun na ong moinang nami,
mikpodunut ami na sog galuꞌ koyon.
16 Na sok poglayag nami,
mikpodonding ami song mobeteꞌ nok puluꞌ,
ngalanin Kawda.
Dadi migimakat ami mogbotong nog buti sok tas kappal bisan kilogonan ami dun.
17 Pogdoksuꞌ koyon posakoyoy,
binogbod nilon nong mga tali ok kappal bagun moksipagon.
Miondok saan ilon mosongyad song mobabow molani sog bonuwa Libiya,
dadi pibabaꞌ nilon sop ong mga layag bangka pokpoanud.
18 Poksunud gondow dangan miksipagas pa tokodoy og galuꞌ,
tinagnaan nilon ponglabuon ong mga lulan nok kappal.
19 Tubus sog ikotolu ondow,
pinglabuꞌ nilon na sop og duma nok panyap nok kappal.
20 Mga sanu ondow,
daꞌ ami pokotongow nok silak nog gondow atawa og ligaꞌ nog bitun,
bu miksipagas pa tokodoy og galuꞌ.
Tidu dituꞌ,
daꞌ ami na pogdodama nong motubuꞌ pa.
21 Na sabap miobon na ilon daꞌ pokokan,
minindog si Pol sog gadapan nilon bangka poktaluꞌ,
“Mga tuwan,
bilaꞌ minginongog amu bosiya dinakon nog diꞌ ita niyu tumulak tidu sok Kerete,
diꞌ ta niyu bosiya kobiyanan ok kobinsanaan kini,
bu diꞌ ita niyu bosiya kobolongan.
22 Tibuwa ningkomun pongonihon ku diniyu,
pogot niyu ok pongatoyan niyu,
poꞌ daꞌdun da diniyu ong mongmula,
sugaid ok kappal kini moladak.
23 Ok Tuhan ku nok poktolagadon bu poksumbahon ku,
pituwaꞌ in kogobi ong malaikatin song molani u,
24 bu taluꞌ nong malaikat kituꞌ,
‘Diꞌ a mondok Pol,
sumboy madapa sok sultan nog Rum,
bu dinuhul dinika nok Tuhan ok kotubuꞌ nog lam nog dunut nu moglayag.’
25 Dadi pogot niyu ok pongatoyan niyu,
poꞌ mingandolu sok Tuhan nong mounut ong mitaluꞌ kituꞌ dinakon.
26 Sugaid ok kappal ta niyu kini,
mosongyad sok solobuk puluꞌ.”
27 Na minatong og ikosopuluꞌ bu pat gobi,
bu mianud ami na sog dagat Adriya.
Sog daliꞌ-daliꞌ na tongaꞌ gobi,
migniyat ong mga mogoginang sok kappal nong molani ami na sog doksaan.
28 Dadi sinukud nilon og dalom nog dagat bu kiosunan nilon nog duwaꞌ puluꞌ dopa.
Dangan mikogobok podaliꞌ ok kappal,
sinukud nilon na sop,
bu kiosunan nilon nok sopuluꞌ bu lima dopa dona og dalomin.
29 Sabap sog gondok nong mosongyad ami sok kobatuhan,
linabuꞌ nilon ok pat buk saw sog binayaan nok kappal bangka pongoni-ngoni nong moglogondow na.
30 Na miksipi bosiya molaguy ong mga mogoginang sok kappal,
bu mipoponog nilon na og buti song mundaꞌ nog baluꞌ-baluꞌ ok saw.
31 Tibuwa tinaluan ni Pol ok kapitan bug mga sundalu nin,
“Bilaꞌ mawaꞌ ong mga tow koyon,
diꞌ amu na motabang.”
32 Dadi tinoktas nong mga sundalu ong mga tali nog buti,
bangka nilon potiyangoy moanud.
33 Dangan mogdoliꞌ-ondow na,
inonggat ilon ni Pol kuman,
taluꞌ in,
“Ongon na sopuluꞌ bu pat ondow ondaꞌ amu pokokan pasal sok kosusahan niyu.
34 Dadi ningkomun kan amu na bagun moksipagas og lawas niyu bu motabang.
Diꞌ amu mondok poꞌ bisan sobalu nog buk niyu,
diꞌ da moglaat.”
35 Pogdoksuꞌ in koyon taluon,
minalap yanin nok pan,
bangka yanin poksukul sok Tuhan sog gadapan nog lam nilon.
Tubus pinitakin bangka yanin kan.
36 Pokpuwas nituꞌ linumasig ok pongatoyan nilon kotanan,
bangka ilon kan.
37 Duwaꞌ gatus bu pitu puluꞌ bu nom og dakol nami sok kappal.
38 Dangan mikokan ilon na mahatul,
pibogan pa nilon ok kappal.
Pinglabuꞌ nilon sog dagat og bunga tirigu.
Misongyad ok Kappal sok Solobuk Puluꞌ
39 Dangan sisolom na,
mikotongow ami nog bonuwa,
sugaid diꞌ kosunan nong mimonsalan bug kodumahanin bug olo bonuwahoy niyon.
Tibuwa ongon ong mitongow nilon nog look nog dagat nong mopontad,
dadi mipikil nilon suloyan podongguon ok kappal dituꞌ.
40 Tinoktas nilon ok tali nong mga saw,
bangka nilon potiyangoy sog dagat,
bu inubad nilon ong mga tali nog inikot song mga bonsalan.
Doksuꞌ piotas nilon og layag song mundaꞌ bangka ilon pokposunguꞌ sog doksaan.
41 Sugaid misongyad song mobabow ok kappal.
Milangot ong mundaꞌ in,
bu og binayaanin,
miladak kobalan nok kopagas nong nabok.
42 Na mipikil nong mga sundalu nok patoyon nilon ong mga pinirisu bagun diꞌ ilon lumanguy sok kilid pontaran bangka polaguy.
43 Tibuwa ok kolegan nok kapitan nong mga sundalu,
tabanganin si Pol,
dadi pigondianin ong mga sundalu.
Sinuguꞌ in mokpu ong mga mokosun kituꞌ lumanguy bangka angoy sog doksaan.
44 Og duma sinuguꞌ in mongalap nok papan atawa mga tipak nok kappal imungon nok kabbaꞌ-kabbaan.
Dadi og lam nami mitabang bu mikosampoy sog doksaan nog daꞌ koolo.