Ok Pokposun
pasal song Mobais nok Suksugan pasal ni Isa Al-Masih nok Sinulat ni Yahiya
Mga pigilugan,
Salam diniyu kotanan.
Sok ponontong nong mga mokokosun ong miksulat nog bahagiꞌ nok Kitab Injil kini, si Yahiya, ong mokpoposampoy ni Panghuꞌ Isa. Si Yahiya sop ok piktiduhan nok tolu buk sulat, bu ok Kitab Injil nok pigingalanan Ok Pitongow.
Si Yahiya kini og bataꞌ ni Sebede bu og gilug ni Yaꞌkub, yonin na ok pinatoy ni Datuꞌ Herod Antipas pasal sok pogunutin ni Panghuꞌ Isa (Kitab Injil, Mga Ginang 12:12). Og ginang ni Yahiya bu ni Yaꞌkub tagnaꞌ, moktolisodaꞌ, sugaid poktawag ni Panghuꞌ Isa dinilon moimung nong mga mulidin, binilin nilon og ginang nilon, bu migunut mogdayun ni Panghuꞌ Isa (Kitab Injil, Matiyu 4:21-22).
Og bahagiꞌ nok Kitab Injil nok posunguꞌ niyu bastahon kini, sinulat ni Yahiya mokkulang-moglabi 60 tahun tidu sok kotubuꞌ ni Isa puliꞌ bangka pokpuliꞌ sok surgaꞌ. Mikposun si Yahiya song mga mogbasta nok si Panghuꞌ Isa, yonin na ok tinawag nok Parman nok Tuhan. Mialap dini ok taluꞌ bug pononduꞌ ni Panghuꞌ Isa ong mikpotongow song mga manusiyaꞌ nog og Ruh nok Tuhan diyon diyanin. Ong maksud nok Kitab kini mikposampoy pasal sok kosobonnalan supaya ong mga tow nong mogbasta nini tumombaꞌ nok si Panghuꞌ Isa yonin na og jinanjiꞌ nok Tuhan moimung nong Mogogawon song mga manusiyaꞌ. Dadi sima-sima ok tumombaꞌ bu mongandol diyanin, koongonan yanin nong mosannang nok kotubuꞌ solama-lama.
Bung mayan tonduan ita niyu nok Tuhan bu podolagonin ok pikilan ta niyu sok kopogbasta ta nini. Bung mayan modiyon diniyu ok kolasa-kololat bug kosannangan nok Tuhan.
Wassalam