Ok Poksassat nog Iblis diyon ni Panghuꞌ Isa
4
Na pogdoksuꞌ nituꞌ,
inoyit si Isa nog Ruh nok Tuhan dituꞌ sog ginlupaan mimala bagun sassaton nog Iblis.
2 Sog bon nok pat puluꞌ ondow bu pat puluꞌ gobi,
daꞌ yanin kan.
Pokpuwas nituꞌ,
ginutom tokodoy yanin.
3 Tubus minangoy diyanin ok polonassat bangka poktaluꞌ,
“Bilaꞌ motud nog Bataꞌ a nok Tuhan,
suguꞌ nu ong mga batu kini moktimaluy nok pan.”
4 Tinumabal si Isa,
“Misulat sog diyalom nok Kitab,
‘Ong manusiyaꞌ ondiꞌ motubuꞌ sok kan hadja,
sugaid sog lam nok Parman nok Tuhan.’ ”a
5 Tubus inoyit nog Iblis si Isa dituꞌ sog Jerusalem,
yonin na ok poktawagon nok Siyudad Sutsi,
bangka nin piindog sok kinolawahan nog bahagiꞌ nog Baloy nok Tuhan.
6 Taluꞌ nog Iblis diyanin,
“Bilaꞌ motud nog Bataꞌ a nok Tuhan,
okpu a!
Poꞌ misulat sog diyalom Kitab,
‘Suguon nok Tuhan ong mga malaikatin mogbantoy dinika,
bu saluon nilon ika
bagun diꞌ mosugat og botis nu sok kobatuhan.’ ”b
7 Tinumabal na sop si Isa,
“Misulat sop sog diyalom nok Kitab,
‘Diꞌ niyu suloyan ok Tuhan niyu,
Pogbayaꞌ-bayaꞌ.’ ”c
8 Tubus inoyit na sop si Isa nog Iblis dituꞌ song motas tokodoy nog bontud,
bu pitongow diyanin nog Iblis og lam nok poksultanan sog dunya dunut daya bug kolingkat nilon.
9 Na tinaluan si Isa nog Iblis,
“Og lam niyon bogoyon ku dinika bilaꞌ sumudjuda bu sumumba a dinakon.”
10 Ok tabal ni Isa diyanin,
“Awaꞌ a Iblis,
poꞌ misulat sok Kitab:
‘Ok Tuhan Pogbayaꞌ-bayaꞌ ok sumbahon niyu,
bu yanin tibuwa ok tolagadan niyu.’ ”d
11 Pokpuwas nituꞌ minawaꞌ na og Iblis,
bu minangoy ong mga malaikat diyon ni Isa bangka yanin tolagadoy.
Miktagnaꞌ si Isa Mognasihat sog Jalil
12 Dangan midongog ni Isa nong mipirisu si Yahiya Mongliliguꞌ,
mikpuliꞌ yanin sok probinsiya nog Jalil.
13 Pogdatongin sog bonuwa Nasaret,
migdayun na yanin bangka pogonong sog lungsud nok Kapernaum molani sog Linow Jalil nok sakup nok Sebulun bug Naptali.
14 Miinang kini bagun mogmattan ok taluꞌ ni Nabi Isaya,
longin,
15 “Og bonuwa Sebulun bug bonuwa Naptali sog Jalil diyon song molani nog linow sog dipag nok Subaꞌ Jordan,
ok pigonongan nong mga bangsa nok kanaꞌ Yahudi.
16 Migonong ong mga tow diyon song mamaꞌ hantang nok kodoloman,
sugaid mikotongow na ilon nok sahaya nong modolag tokodoy.
Ong mga tow nong mondok sok kopatoy,
kisinagan na ok pomikil nilon nog dolag.”ef
17 Tidu sog waktu niyon miktagnaꞌ na si Isa mongnasihat,
taluꞌ in,
“Poktowbat amu,
poꞌ molani na ok Pomarinta nok Tuhan.”
Ong Mikuna Inonggat ni Panghuꞌ Isa nong mga Mulidin
18 Na sok solobuk gondow mipanow si Isa sok kilid nog Linow Jalil,
bu mitongowin og duwaꞌ kotow mogilug,
si Simon bu si Andariyas.
Si Simon kini ginollalan da sop nok Petros.
Soliyan nilon poglabuon ok pokot nilon sog linow,
poꞌ ilon koyon,
mga moktolisodaꞌ.
19 Tinaluan ilon ni Isa,
“Pogunut amu dinakon,
bu kanaꞌ na ok sodaꞌ ok pogalapon niyu,
poꞌ tonduan ta amu bug olohon pogalap nong mga towanan.”
20 Na sododuun binagak nilon ong mga pokot nilon bangka ilon pogunut ni Isa.
21 Pokpanow nilon tidu dituꞌ,
mitongow ni Isa og len duwaꞌ kotow mogilug,
yonin na si Yaꞌkub bu si Yahiyag.
Soliyan nilon momunaꞌ nok pokot sok tas bangkaꞌ nilon dunut nog gommaꞌ nilon nok si Sebede.
Inonggat da sop ilon ni Isa.
22 Sododuun binagak nilon og bangkaꞌ bug gommaꞌ nilon,
bu migunut ilon ni Isa.
Kiulian ni Isa ong mga Tow Misaki
23 Na linumibut si Isa mongnasihat song mga baloy poksumbahan sog liwag nog bonuwa Jalil.
Pisampoyin ong Mobais nok Suksugan pasal sok Pomarinta nok Tuhan,
bu kiulianin og lam nok saki bug lamma nong mga tow.
24 Milokop sop og dongoganin sok kobonuwahan nok Siriya.
Dadi inoyit nilon diyanin ong mga tow nong misaki nog ginis-ginisan,
mga babuy-babuyon,
mga daday,
bu mga sinolodan nok soytan,
bu kiulianin og lam nilon.
25 Modakol nok tumpukan nok tow migunut diyanin tidu sok probinsiya nog Jalil,
siyudad nog Jerusalem bug mga len bonuwa sok probinsiya nog Yahudiya,
sampoy song mga bonuwa poktawagon nok Sopuluꞌ Lungsudh,
bu tidu song mga len bonuwa sog dipag nok Subaꞌ Jordan.