Ong mga Tow nong Mobarakat
5
Na dangan mitongow ni Isa ong mga tumpukan nong mga tow koyon nong migunut diyanin,
tinumukad yanin sog bontud.
Pogingkudin,
minangoy diyanin ong mga mulidin.
2 Pokpuwas nituꞌ,
miktagnaꞌ yanin mognasihat,
longin,
3 “Mobarakat ong mga tow nong mokkogunahan tokodoy nok tabang nok Tuhan
poꞌ sukuꞌ ilon sok pomarinta nin.
4 Mobarakat ong mga mokkorukkaan pasal sok kolaatan sog dunya
poꞌ poboganon da ok pongatoyan nilon.
5 Mobarakat ong mga mobabaꞌ og goyitanin
poꞌ motabuk nilon sog ahirat og bogu dunya nog jinanjiꞌ nok Tuhan.
6 Mobarakat ong mga tow nong mogapas nok kologdongan,
mamaꞌ nok tow mogutom monontong nok kanin,
poꞌ poduhulan da ilon nok Tuhan.
7 Mobarakat ong mga molilolatoy
poꞌ kololatan da sop ilon.
8 Mobarakat ong mga tow nong mosutsi ok pongatoyan nilon,
poꞌ motongow nilon ok Tuhan.
9 Mobarakat ong mga tow nok popoksuluton nilon ong mga duma nilon,
poꞌ motawag ilon nog gumbataꞌ nok Tuhan.
10 Mobarakat ong mga pogbinsanaon pasal sok pogunut nilon song mologdong nok kolegan nok Tuhan
poꞌ sukuꞌ ilon sok Pomarinta nok Tuhan.
11 Mobarakat amu bilaꞌ pogunda-undahan amu,
pogbinsanaon bu ponaluꞌ-naluan amu nog loput bu molaat sabap sok pogunut niyu dinakon.
12 Poꞌ mamaꞌ niyon da sop og ininang nong mga tow tagnaꞌ song mga konabihan nong mikuna diniyu.
Dadi pogloliyag amu mahatul bilaꞌ moinang koyon diniyu poꞌ ongon ong mosolag nok tumbas diniyu sok surgaꞌ.
Ong mga Mogogunut ni Panghuꞌ Isa sumboy mamaꞌ nok Siga bug Sahaya
13 Amu koyon mamaꞌ hantang nok siga sog dunya.
Sugaid bilaꞌ tumobang na,
ponoy na mokpuliꞌ ong nanamin?
Kanaꞌ na koyon mobais sog bisan olo,
luwal dona pilakon bangka jodjakoy nong mga tow.
14 Bu mamaꞌ amu da sop nok sahaya nong migbogoy nok kodolag song mga tow sog dunya,
mamaꞌ sopantun nok siyudad nong mibotang sog bontud diꞌ mobuni.
15 Daꞌdun ok tow nong moktutud nok politaan bangka dungmaoy nog gantangan,
sugaid botangonin sok pogbotangan dun bagun kodolagan og lam sog baloy.
16 Na domikkiyan da sop amu,
sumboy podolagan niyu ong mga tow.
Dadi motongow nilon ong mga ginang niyu nong mobais,
bu potason nilon ok Tuhan,
og Gommaꞌ niyu sok surgaꞌ.
Ok Pituwa pasal sok Saraꞌ
17 Diꞌ amu mogniyat nong minangoyu dini bagun momolong nok sinulat sok Kitab Tawrat bug mga konabihan,
na kanaꞌ da.
Tibuwa minangoyu dini bagun mounut ok sinulat dun.
18 Poꞌ taluan ku amu,
ong motudin,
sog diꞌ pa mobolong og langit bug lupaꞌ,
daꞌdun bisan sobaris atawa sobatang sulat ong mobolong sok Kitab Tawrata toktob song mounut og lam niyon.
19 Sima-sima og dinumugtul sog bisan solobuk nong mga suguan kini bangka nin pologilingoy og duma nin diyanin,
na tawagon yanin nok kinobabaan sok Pomarinta nok Tuhan.
Sugaid sima-sima ong mogunut sok saraꞌ nok Tuhan bangka nin ponintuluoy song mga tow,
na tawagon yanin nong motas sok Pomarinta nok Tuhan.
20 Poꞌ taluan ku amu,
sumboy ok kopogunut niyu sok Tuhan labi pa mologdong tidu sok kopogunut nong mga guru agama bug mga Parisi.
Bilaꞌ ondiꞌ,
ondiꞌ amu na dodaꞌ mokampuꞌ sok Pomarinta nok Tuhan.
Ok Pituwa pasal sog Lingit
21 Midongog niyu na bug olo ok tinaluꞌ nok Tuhan song mga tow masa nituꞌ biyan ni Nabi Musa,
‘Diꞌ amu momunuꞌ,’b
bu ‘sima-sima ong momatoy sog batukin manusiyaꞌ,
mosugat yanin nog hukuman.’
22 Tibuwa taluon ku diniyu ningkomun,
sima-sima ong molingit sog duma nin,
na hukumon yanin,
bu sima-sima ong moktaluꞌ nong momosipog sog duma nin,
na oyiton yanin sok poghukuman ta.
Bu sima-sima ok sumuknaꞌ sok pokasi nin manusiyaꞌ,
labuon yanin song narkaꞌ.
23 Dadi bilaꞌ mokkurban amu sok pokkurbanan,
sokaliꞌ mopondom niyu diyon nog ongon og duma niyu nong miubaꞌ diniyu,
24 bagak niyu ok kurban niyu diyon sok pokkurbanan,
bangka niyu angoy sulutoy ok tow koyon.
Puwas niyon bangka amu pokkurban.
25 Na bilaꞌ ongon sop ong mogdangat diniyu,
sulut niyu mogdayun sog daꞌ amu pa kosaut sog baloy poghukuman.
Poꞌ bilaꞌ ondiꞌ,
wakilonin na amu sok tow monghukum mangoy sok ponindog nilon bangka amu pirisuhoy.
26 Taluan ku amu,
ong motudin,
diꞌ amu mokoluwas sog bon nog diꞌ niyu kobayadan og lam nok kosalaan niyu.
Ok Pituwa pasal sok Pogjina
27 Midongog niyu da sop sok saraꞌ,
longin,
‘Diꞌ amu mogjina.’c
28 Tibuwa taluan ku amu,
sima-sima ok tumontong sok solobuk libun nog ongon ong napsu nin dun,
na miitung na koyon nog jina sok pongatoyanin.
29 Dadi bilaꞌ ong mata niyu ong mokoyit diniyu sok kodusahan,
lugit niyu bangka niyu pilak.
Golom na kobolongan amu nog bahagiꞌ nog lawas niyu gabaꞌ sog ongon ok tibuk nog lawas niyu,
sugaid tikpuon song narkaꞌ.
30 Migbatuk da sop bilaꞌ ok solobuk komot niyu mokoyit diniyu sok kodusahan,
na putuk niyu bangka pilakoy.
Golom na nong mopungkul amu gabaꞌ sog ongon ok tibuk nog lawas niyu,
sugaid monarkaꞌ amu.
Ok Pituwa pasal sok Pogbolong
31 Midongog niyu da sop sok saraꞌ,
longin,
‘Sima-sima ong molong nog libunin,
sumboy mogbogoy yanin nok sulat pasa sog libunin.’d
32 Tibuwa taluon ku diniyu,
sima-sima og laki nong molong nog libunin,
luwal dona sok pogjina,
na inimungin nok polojina og bakas libunin bilaꞌ moglaki yanin puliꞌ.
Bu sima-sima ong moglibun nog binolong,
moitung da nog jina.
Ok Pituwa pasal sok Poksapa
33 Midongog niyu da sop sok saraꞌ nok tinaluꞌ song mga tow tagnaꞌ,
longin,
‘Diꞌ niyu bolubahon ok sinapa niyu,
sugaid inang niyu bug olo ong misapa niyu sok Tuhan.’e
34 Tibuwa taluan ku amu,
diꞌ amu sumapa,
bisan sok surgaꞌ,
poꞌ yonin koyon ok pigonongan nok Tuhan,
35 atawa sog dunya,
poꞌ yonin koyon ok pogindogan nog botisin,
atawa sog Jerusalem,
poꞌ yonin koyon ok siyudad nok Pogbayaꞌ-bayaꞌ,
ong Mokowasa.
36 Bu diꞌ amu sop sumapa sog gulu niyu poꞌ bisan solongow nog buk niyu,
daꞌdun ok kowasa niyu moksuguꞌ nong mopoputiꞌ atawa mopoitom.
37 Sugaid bilaꞌ tumabal amu,
taluꞌ niyu ‘Oo,’
bilaꞌ oo,
atawa ‘Ondiꞌ,’
bilaꞌ diꞌ.
Sugaid bilaꞌ dungagan niyu pa ok taluꞌ niyu nok sapa,
tidu na koyon sog Iblis.
Ok Pituwa pasal sok Poksuliꞌ
38 Na midongog niyu da sop sok saraꞌ,
longin,
‘Ong mikobuta,
butahon,
ong mikopangag,
pangagon.’f
39 Tibuwa taluan ku amu nog diꞌ niyu sulian nong molaat ok tow nong mikinang diniyu nong molaton.
Bilaꞌ ongon sumompiling diniyu sog lintu,
posompiling niyu sop og bibang.
40 Bu bilaꞌ ongon ok tow nog dumangat diniyu bagunin moalap og dogdoy niyu,
na bogoy niyu na sampoy og juba niyu.
41 Domikkiyan da sop bilaꞌ ongon ok tumogol diniyu mopanow nok sokilumitru,
na pogunut amu diyanin bisan pa duwaꞌ kilumitru.
42 Bogoyoy niyu ok sima-sima nong mongoni diniyu,
bu diꞌ niyu tolikudan ok tow nong meleg mongodam diniyu.
Ok Pituwa pasal sok Poglasa sog Banta
43 Midongog niyu ok taluꞌ nog duma,
‘Kolasahoy niyu ok kodumahan niyu,
sugaid dumutan niyu ong mga banta niyu.’
44 Sugaid taluan ku amu,
kolasahoy niyu ong mga banta niyu,
bu pongoni-ngonihoy niyu nok kobaisan ong mga mominsanaꞌ diniyu.
45 Inang niyu kini bagun kosunan nog bataꞌ amu nok Tuhan,
og Gommaꞌ niyu sok surgaꞌ.
Poꞌ pisahaya nin og gondow song mga molaat bug mobais nok tow,
bu binogoyanin nog dupiꞌ ong mga tow nong mologdong bug molikoꞌ.
46 Dadi pogdogiling amu sok kobais nog Gommaꞌ niyu sok surgaꞌ.
Poꞌ bilaꞌ kolasahan niyu ong mga tow hadja nong molasa diniyu,
olo na ok pahalaꞌ nong moalap niyu?
Bisan ong mga molikoꞌ nong mogogalap nog buwis,
mokosun da lumasa song mga tow nong molasa dinilon.
47 Bu bilaꞌ ong mga supali niyu da ok soginahon niyu,
olo og ininang niyu nog labi pa song mga duma?
Bisan ong mga len bangsa nog daꞌ pokilala sok Tuhan,
monginang da sop mamaꞌ niyon.
48 Saan na sumboy amu mojukup mamaꞌ nog Gommaꞌ niyu sok surgaꞌ.