Ok Pongnasihat ni Yahiya Mongliliguꞌ
3
Na sog waktu kituꞌ,
ongon ok timuwaꞌ solokotow nok tinawag nog Yahiya Mongliliguꞌ.
Minangoy yanin sok talunan nog bonuwa Yahudiya mognasihat song mga tow.
2 Taluꞌ in,
“Poktowbat amu,
poꞌ molani na ok Pomarinta nok Tuhan.”
3 Si Yahiya kini ok pigbinaan ni Nabi Isaya dangan tinaluꞌ in,
“Ongon ong mikposampoy nok taluꞌ monamal dituꞌ sok talunan,
taluꞌ in,
‘Podinsamaꞌ niyu og dalan nok Pogbayaꞌ-bayaꞌ sok pogdatongin,
pologdong niyu og biyananin.’ ”a
4 Na og juba ni Yahiya,
inimung tidu sog bolohibu nog guntaꞌ,
bu ok sobitanin ok panit nog binatang.
Ok kanin,
ok tolompisung nong mosolagb bug tonob.
5 Na minangoy diyanin ong modakol nong mga tow tidu sog Jerusalem bug len-len bonuwa nog Yahudiya bug mga tow sog lumibut nok Subaꞌ Jordan.
6 Liniguꞌ ilon ni Yahiya diyon sok Subaꞌ Jordan solabu nog inangkon nilon ong mga dusa nilon.
7 Tubus ongon ong modakol nong mga tow sog duwaꞌ tumpukan Yahudi nok pogingalanan nok Parisic bug Saddukid nong minangoy dituꞌ diyanin mokpoliguꞌ,
dadi taluꞌ in dinilon,
“Amu mamaꞌ nok ponupuꞌ nong mamak!
Bilaꞌ mokpotongow-tongow amu tibuwa nong moktowbat amu,
diꞌ amu mokopolaguy tidu song mulkaꞌ nok Tuhan nong matong posunguꞌ.
8 Dadi bilaꞌ motud nok piksusunan niyu na ong mga dusa niyu,
potongow niyu nog dumait og laku-tobiat niyu sok tow nong miktowbat.
9 Diꞌ amu mogniyat nog diꞌ amu mosugat nong mulkaꞌ nok Tuhan sowkat na nok ponupuꞌ amu ni Nabi Ibrahim.
Poꞌ taluan ku amu,
bilaꞌ kolegan nok Tuhan,
bisan pa ong mga batu kini moimungin da nok ponupuꞌ ni Nabi Ibrahim.
10 Amu koyon,
mamaꞌ sopantun nok kayu nok posunguꞌ na pomagaon nok kapa.
Dadi sosuku nok kayu nog diꞌ mogbunga pahatul,
pagaon bangka tikpuoy sog gapuy.
11 Akon,
poliguon ku amu biyan sok tubig,
og gindanan nong miktowbat amu.
Sugaid ongon ong mogdodatong nok sumunuꞌ dinakon,
bu labi pa yanin mokowasa tidu dinakon.
Diꞌ u tanan tolopon kumeteng nok tolumpaꞌ in.e
Yanin,
poliguonin amu biyan sog Ruh nok Tuhan bug gapuy.f
12 Sagadin monghukum song mga manusiyaꞌ.
Ok koponghukumin mopononggiꞌ sok tow mikpalid nok paloyin,
bagun mopolen ok pis tidu sog logas.
Og logas taguonin sok komalig,
bu ok pis tutungonin sog gapuy nog diꞌ mopalong solama-lama.”
Liniguꞌ ni Yahiya Mongliliguꞌ si Panghuꞌ Isa
13 Sog waktu niyon minatong si Isa sok Subaꞌ Jordan tidu sog bonuwa Jalil bagun poliguon yanin ni Yahiya.
14 Sugaid ondiꞌ bosiya meleg si Yahiya,
taluꞌ in,
“Akon bosiya og dait liguon nu,
sokaliꞌ ika ma ong minangoy dinakon.”
15 Ok tabal ni Isa diyanin,
“Potiyangoy nu na song ningkomun,
poꞌ maꞌ nini ok patut ta inangon bagun mounut ok kolegan nok Tuhan.”
Dadi meleg si Yahiya.