Ok Poktibow nong mga Polonontong nog Bitun
2
Na song masa ni Datuꞌ Heroda binataꞌ si Isa sok kowman nog Betlehem,
ok sakup nog Yahudiya.
Doksuꞌ ongon ong mga polonontong nong mga bitun tidu sog lambul silangan nong minangoy sog Jerusalem.
2 Pogdatong nilon diyon,
miksak ilon,
“Ayin og datuꞌ nong mga Yahudi nog binataꞌ?
Mitongow nami og bitunin nok tinumuwaꞌ sok silangan tandaꞌ nog binataꞌ yanin,
bu minangoy ami dini bagun sumumba diyanin.”
3 Dangan midongog koyon ni Datuꞌ Herod,
misasow tokodoy yanin dun sampoy og lam nok tow sog Jerusalem.
4 Dadi pitawagin og lam nok kounutan nok koimaman bug mga guru agama bangka nin ilon sakoy,
“Ayin dow dapit bataoy og Al-Masih?”
5 Ok tabal nilon,
“Dituꞌ sog Betlehem,
ok sakup nog Yahudiya,
poꞌ maꞌ nini ok sinulat nong nabi sog diyalom Kitab,
taluꞌ in,
6 ‘Bu ika Betlehem,
ok sakup nog Yahudiya,
bisan mikaan ka,
kanaꞌ a mobabaꞌ tidu song mga len bonuwa sog Yahudiya.
Poꞌ moktidu dinika ok kounutan nong mogbayaꞌ song mga piktowan ku Israel,
mamaꞌ sopantun nong mogogipat nog bilibili u.’ ”b
7 Pokpuwas niyon,
pitawag ni Datuꞌ Herod ong mga polonontong kituꞌ nog ilon-ilon da,
bangka nin sakoy bug olo waktuhoy timuwaꞌ og bitun nong mitongow nilon.
8 Tubus piangoyin ilon sog Betlehem,
taluꞌ in,
“Angoy amu dituꞌ bu ponontong niyu mahatul og bataꞌ kituꞌ.
Bilaꞌ mobalak niyu na yanin,
posunoy niyu akon,
bagun mokangoyu sop dituꞌ sumumba diyanin.”
9-10 Puun midongog nong mga polonontong kituꞌ ok taluꞌ nog datuꞌ,
mipanow ilon na.
Sok pokpanow nilon,
mitongow nilon puliꞌ og bitun nong mitongow nilon tagnaꞌ sog dapit silangan,
dadi landuꞌ tokodoy og loliyag nilon.
Inunut nilon og bitun kituꞌ toktob nong mikpotondong sok kibotangan nog bataꞌ.
11 Poksolod nilon sog baloy,
mitongow nilon og bataꞌ dunut nog ginaꞌ in nok si Mariam.
Na simudjud ilon bangka nilon sumbahoy og bataꞌ koyon.
Inukad nilon og goyit nilon nog bulawan,
komanyanc bug pokpomut,
ngalanin mirra bangka nilon bogoyoy sog bataꞌ.
12 Dangan minuliꞌ ong mga polonontong kituꞌ,
miniyan ilon sog len nog dalan poꞌ pidinsamaan ilon nok Tuhan sog diyalom toginop nog diꞌ ilon mokpuliꞌ dituꞌ ni Datuꞌ Herod.
Ok Poglaguy niloꞌ Yusupd song Misir
13 Dangan mikawaꞌ na ong mga polonontong kituꞌ,
mikpotongow ong malaikat nok Tuhan dituꞌ ni Yusup sok toginopin bangka poktaluꞌ,
“Pogbuwata!
Oyit nu molaguy song Misir og bataꞌ bug ginaꞌ in.
Pogonong amu dituꞌ toktob sok taluan ku amu poꞌ posunguꞌ na ponontongon ni Datuꞌ Herod og bataꞌ koyon bagunin mopatoy.”
14 Dadi sog gobi niyon migbuwat si Yusup bangka nin oyitoy molaguy posunguꞌ song Misir og bataꞌ bug libunin.
15 Na migonong ilon dituꞌ toktob song minatoy si Datuꞌ Herod.
Miinang ong maꞌ niyon koyon bagun mounut ok tinaluꞌ nok Tuhan biyan song nabi,
longin,
“Tinawagu og Bataꞌ u tidu song Misir.”e
16 Na kopulian ta bug olo ong mikobiyan sog daꞌ pa patoy si Datuꞌ Herod.
Dangan daꞌ pokpuliꞌ ong mga polonontong nog bitun kituꞌ dituꞌ ni Datuꞌ Herod,
kiosunanin nog inakkalan yanin.
Dadi milingit tokodoy yanin.
Tubus miksuguꞌ yanin nok pomatoyon ong mga gumbataꞌ laki toktob duwaꞌ tahun og gumulin sog Betlehem bu sog lam nog lumibutin.
Ginantaꞌ in og gumul nong mga gumbataꞌ koyon tidu sok suksugan nong mga polonontong nog bitun kituꞌ bug konanu nilon mitongow og bitun.
17 Dadi miunut ok tinaluꞌ ni Nabi Irmiya,
taluꞌ in,
18 “Midongog og gaduy nog diꞌ moponglang bu mosolag nok korukkaan sog bonuwa Rama.
Pigaduyan nong mga tupuꞌ-ponupuꞌ ni Rakiya ong mga gumbataꞌ nilon,
poꞌ mimatoy na ilon.”f
Ok Poguliꞌ niloꞌ Yusup tidu song Misir
19 Dangan minatoy na si Datuꞌ Herod,
mikpotongow na sop ong malaikat nok Tuhan dituꞌ ni Yusup song Misir biyan sok toginop,
taluꞌ in,
20 “Pogbuwata,
bangka nu oyit mokpuliꞌ og bataꞌ bug ginaꞌ in sog bonuwa Israel.
Poꞌ ong mga miksipi kituꞌ matoy sog bataꞌ koyon,
mimatoy na.”
21 Dadi pogbuwat ni Yusup,
inoyitin og bataꞌ koyon bug ginaꞌ in sog bonuwa Israel.
22 Sugaid pogdatong nilon,
midongogin nok si Arkelasg,
og bataꞌ ni Datuꞌ Herod og ginumantiꞌ mogdatuꞌ sok probinsiya nog Yahudiya.
Dadi miondok yanin mangoy mogonong diyon.
Pidinsamaan yanin tumaluꞌ biyan sok toginop saan na miglandan ilon sok probinsiya nog Jalil.
23 Pogdatong nilon,
dituꞌ ilon migonong sog lungsud nog iningalanan nong Nasaret bagun mounut ok tinaluꞌ sok Kitab nong mga konabihan,
“Tawagon yanin,
tow Nasaret.”h