Ong Mobais nok Suksugan
pasal ni Isa Al-Masih
nok Sinulat ni
MATIYU
Og Gusulan nok Pangkatan nok Piktiduhan ni Isa Al-Masih
1
Na yonin kini ok pangkatan nok piktiduhan ni Isa Al-Masih.
Ok ponupuꞌ yanin ni Nabi Daud bu ni Nabi Ibrahim.
2 Si Nabi Ibrahim og gommaꞌ ni Isahak,
si Isahak og gommaꞌ ni Yaꞌkub,
bu si Yaꞌkub og gommaꞌ ni Yahuda bug mga pigiluganin.
3 Si Yahud og gommaꞌ niloꞌ Peres bug Sera bu og ginaꞌ nilon si Tamar.
Si Peres og gommaꞌ ni Hesron,
bu si Hesron og gommaꞌ ni Aram.
4 Si Aram og gommaꞌ ni Aminadab,
si Aminadab og gommaꞌ ni Nason,
bu si Nason og gommaꞌ ni Salumon.
5 Si Salumon og gommaꞌ ni Buwas,
bu og ginaꞌ in si Rahab.
Si Buwas og gommaꞌ ni Obed,
bu og ginaꞌ in si Rut.
Si Obed og gommaꞌ ni Yesse.
6 Si Yesse og gommaꞌ ni Nabi Daud nong miimung nok sultan.
Si Sultan Daud og gommaꞌ ni Sulayman,
bu og ginaꞌ in og balu ni Uriya.b
7 Si Sulayman og gommaꞌ ni Rehobowam,
si Rehobowam og gommaꞌ ni Abiya,
bu si Abiya og gommaꞌ ni Asa.
8 Si Asa og gommaꞌ ni Yusapat,
si Yusapat og gommaꞌ ni Yoram,
bu si Yoram og gommaꞌ ni Usiyas.
9 Si Usiyas og gommaꞌ ni Yotam,
si Yotam gommaꞌ ni Ahas,
bu si Ahas gommaꞌ ni Hesekiya.
10 Si Hesekiya og gommaꞌ ni Manasse,
si Manasse og gommaꞌ ni Amon,
bu si Amon og gommaꞌ ni Yusiyas.
11 Si Yusiyas og gommaꞌ niloꞌ Yekoniya bug mga koiluganin.
Yonin kituꞌ og waktu nok sinaggow ong mga tow Israel bangka oyitoy sog Babilonya.
12 Dangan midoksuꞌ oyitoy ong mga tow Israel sog Babilonya,
miimung
Si Yekoniya nog gommaꞌ ni Salatiel
bu si Salatiel og gommaꞌ ni Serubabel.
13 Si Serubabel og gommaꞌ ni Abiyud,
si Abiyud og gommaꞌ ni Elyakim,
bu si Elyakim og gommaꞌ ni Asor.
14 Si Asor og gommaꞌ ni Sadok,
si Sadok og gommaꞌ ni Akim,
bu si Akim og gommaꞌ ni Elyud.
15 Si Elyud og gommaꞌ ni Elyasar,
si Elyasar og gommaꞌ ni Mattan,
bu si Mattan og gommaꞌ ni Yaꞌkub.
16 Si Yaꞌkub og gommaꞌ ni Yusup,
yonin na og laki ni Mariam.
Na si Mariam kini,
yonin na og ginaꞌ ni Isa,
og iningalanan nog Al-Masih.
17 Dadi ongon sopuluꞌ bu pat pangkat tidu ni Nabi Ibrahim toktob ni Nabi Daud.
Ongon sop sopuluꞌ bu pat pangkat tidu ni Nabi Daud toktob sog inoyit ong mga tow Israel sog Babilonya,
bu ongon pa sopuluꞌ bu pat pangkat tidu sok pogoyit diyon toktob sog Al-Masih.
Ok Kobataꞌ ni Isa Al-Masih
18 Mamaꞌ nini ok kobiyan-biyanan sok kobataꞌ ni Isa Al-Masih:
Og ginaꞌ in nok si Mariam,
pigdaakan na ni Yusupc.
Sugaid sog daꞌ pa ilon pogduma,
kiosunan ni Mariam nong mibodos yanin sabap sog Ruh nok Tuhan.
19 Ong mopoglaki nin kini nok si Yusup,
mologdong nok tow,
bu diꞌ yanin meleg nok kosipogan si Mariam sok kodakolan nok tow.
Dadi mipikilin nong moksuwoy na ilon nog diꞌ pogbukagan.
20 Sugaid soliyanin momikilan nok pasal niyon,
na mikotulug yanin,
bu mikpotongow diyanin ong malaikat nok Tuhan sog diyalom toginopin,
taluꞌ in,
“Yusup,
ok ponupuꞌ ni Daud,
diꞌ a mondok moglibun ni Mariam,
poꞌ og bataꞌ nog bodosanin miongon pasal sok pogbayaꞌ nog Ruh nok Tuhan.
21 Mogbataꞌ yanin nog laki,
bu ingalanan nu og bataꞌ koyon nog Isa,d
poꞌ awononin ong mga piktowanin tidu sog dusa nilon.”e
22 Pibiyan og lam nini bagun mounut ok tinaluꞌ nok Tuhan song nabi,
taluꞌ in,
23 “Tontong niyu,
ongon og budjang nong mogbodos bangka pogbataꞌ nog laki,
bu tawagon og bataꞌ koyon nog Emmanuel.”f
Ong maana nin,
ok Tuhan dini dinita.