Mogdang si Pol sok Sultan nog Rum
25
Pogbiyan nok tolu ondow tidu sumukli si Pestus moglogubernur,
tinumukad yanin tidu sok Sesareya posunguꞌ sog Jerusalem.
2 Pogdatongin diyon,
sinumbung nong mga kounutan nok koimaman bug mga duma kounutan nong mga Yahudi diyanin si Pol.
3 Mikpotabang ilon diyanin nok poyiton si Pol sog Jerusalem,
poꞌ piksipihan nilon apaan bagun patoyon sog dalan.
4 Tibuwa tinumabal si Pestus,
“Si Pol,
inipat da dituꞌ sok Sesareya,
bu akon,
mokpuliꞌ u da dituꞌ nong mosompun.
5 Dadi podunut niyu dinakon ong mga kounutan niyu,
bu bilaꞌ ongon ong molaat sok tow kituꞌ,
mogdadi nilon yanin tuntutan.”
6 Tubus dangan mikopogonong na yanin dinilon sog bon nog walu mangoy sok sopuluꞌ ondow,
dimiksun na yanin posunguꞌ sok Sesareya.
Doksuꞌ poksunud gondow,
miningkud yanin sok poghukuman bangka yanin poksuguꞌ nog oyiton diyon si Pol.
7 Dangan minatong na si Pol,
piglibutan yanin nong mga Yahudi nok tidu sog Jerusalem.
Modakol ok sumbungan nilon dun nong mobogat,
sugaid daꞌdun ong mopotongow nilon nong motud ok sumbungan nilon.
8 Dimaawa si Pol,
longin,
“Daꞌ u pokodugtul nok saraꞌ nong mga Yahudi,
atawa monglaat sog Baloy nok Tuhan atawa sok sultan nog bangsa Rum.”
9 Sugaid pagga ok kolegan ni Pestus mokoinang nog ikosuat nong mga Yahudi,
tinaluanin si Pol,
“Melega taꞌ mangoy sog Jerusalem bu dituꞌ u na ika hukumoy pasal sok sumbungan nilon kini?”
10 Ok tabal ni Pol,
“Dini u na minadap sok poghukuman nog bangsa Rum,
dadi dini nu na akon hukumoy.
Kiosunan nu na nog daꞌdun og dusa u song mga bangsa Yahudi.
11 Na bilaꞌ mikinangu nong molaat nong mopatutu patoyon dun,
diꞌ u polaguyan ok kopatoy.
Sugaid bilaꞌ kanaꞌ motud ok sumbungan nilon dinakon,
na daꞌdun ok taga kopatut mogwakil dinakon diyon dinilon.
Mogdangu na sok sultan nog Rum.”
12 Dangan maꞌ nituꞌ ok tabal ni Pol,
migisun si Pestus bug mga duma nin nong monghuhukum.
Doksuꞌ bangka nin taluoy si Pol,
“Pagga mogdanga ma sok sultan nog Rum,
na pangoyon ku ika dituꞌ diyanin.”
Piadap si Pol ni Datuꞌ Agrippaa
13 Na pogbiyan nong mga sanu ondow,
minatong ok solobuk datuꞌ,
ong ngalanin Agrippa dunut nog gilugin nok si Bernike sok Sesareya bagun mogaddat ni gubernur Pestus.
14 Soliyan nilon moglihan diyon nong mobon-obon,
sinuksug ni Gubernur Pestus sog datuꞌ ok parkalaꞌ ni Pol.
Taluꞌ in,
“Ongon ok tow nog ginonatan ni Gubernur Piliks sok pirisuhan.
15 Sog waktu nog dituꞌ u sog Jerusalem,
mikposun ong mga kounutan nok koimaman Yahudi bug mga migmokogulang nilon pasal diyanin.
Pingoni nilon nog botangan yanin nog hukuman.
16 Tinabalu ilon nok kanaꞌ gaddat nog bangsa Rum nog wakilon ok sima-sima bilaꞌ ondiꞌ mogadap ok tinuntutan bug mga tinumuntut.
Bu sumboy bogoyan ok tinuntutan nog waktu dumaawa pasal song mga tuntut nilon diyanin.
17 Dadi dangan minatong na og lam nong mga miksumbung kituꞌ dini,
daꞌ u poganggaꞌ-anggaꞌ.
Miningkudu sok poghukuman poglomaꞌ bangka u poksuguꞌ nog oyiton ong mipirisu kituꞌ.
18 Dangan minindog moktaluꞌ ong mga miksumbung,
kanaꞌ dusa mosolag ok sumbungan nilon pasal diyanin mamaꞌ sok pogniyatu.
19 Sugaid ong mga pigdodaawahan nilon,
pasal da sog agama nilon bu pasal sok solobuk tow,
ngalanin Isa nong minatoy na.
Tibuwa taluꞌ ni Pol,
mitubuꞌ puliꞌ.
20 Na pagga milibugu bug ponoy ok poksumoriya u sok parkalaꞌ koyon,
sinakan ku ong mipirisu bug meleg taꞌ yanin mangoy sog Jerusalem bu dituꞌ na yanin hukumoy nok pasal song mga tuntut nilon.
21 Sugaid diꞌ yanin meleg,
bu mogdang yanin sok sultan nog Rum.
Dadi miksuguꞌ u nog ipaton yanin toktob song mopoyitu yanin dituꞌ.”
22 Tubus tinaluan ni Agrippa si Pestus,
“Melegu bosiya monginongog sok tow kini.”
Tabal ni Pestus,
“Lomaꞌ,
modongog nu yanin.”
23 Dadi poglomaꞌ,
minatong siloꞌ Agrippa bug Bernike nong mimonapot nong mohalgaꞌ,
bu piglami-lamihan ok pogdatong nilon koyon.
Sinumolod ilon sok poghukuman dunut nong mga kounutan nong mga sundalu bug mga mokotas nok tow sok siyudad.
Doksuꞌ miksuguꞌ si Pestus nog oyiton si Pol.
24 Pogdatongin,
miktaluꞌ si Gubernur Pestus,
“Datuꞌ Agrippa bug lam nong mikotuwaꞌ dini,
mitongow niyu ok tow kini nog dinangat dinakon nong mga Yahudi sog Jerusalem bug dini.
Migekesan ilon nog ondiꞌ yanin mopatut potubuon.
25 Sugaid daꞌdun ong mitongowu nong miinangin nong mopatut yanin patoyon dun.
Tibuwa pagga mogdang yanin sok sultan ta niyu,
mikohukumu na nok poyiton ku yanin dituꞌ sok siyudad nog Rum.
26 Sokaliꞌ daꞌdun pa ong motantu u nong mosulatu sok sultan pasal diyanin.
Dadi inoyitu yanin sog gadapan niyu,
bu labi-labi na dinika Datuꞌ Agrippa,b
bagun pogdoksuꞌ ta yanin sumoriyahoy,
sunoy ongon na ong mosulatu.
27 Poꞌ sog dinakon,
kanaꞌ mopatut nok poyiton ok tow pinirisu nog diꞌ moposun ong mga sumbungan diyanin.”