Tinuntutan nong mga Yahudi si Pol
24
Na dangan miniyan lima ondow,
dimiksun sok Sesareya ok kinotasan nog gimam nok si Ananiyas dunut nong mga duma nong migmokogulang bug bogollal nok si Tertullus,
poꞌ yanin ong mogoyit nok sumbungan nilon pasal ni Pol sog gubernur.
2 Dangan pitawag na si Pol,
miktagnaꞌ si Tertullus moktaluꞌ,
longin,
“Gubernur Piliks,
sabap dinika miongon dinami ong mopayat nok kosannangan,
bu sabap sok poktabang nu,
mikkobogu og bonuwa kini.
3 Ami kotanan sog bonuwa Yahudiya miksukul tokodoy dinika,
bu mosolag ok pomondoman nami dinika.
4 Na diꞌ u na popayaton ok taluꞌ u,
tibuwa tidu sok kobais nu,
pongonihon ku dinika nog inongogan nu pa bosiya ami podaliꞌ sooy.
5 Ok tow kini kibuyaan nami monasow.
Yanin ong migoyit nog liyuhalaꞌ song mga Yahudi bisan ayin-ayin.
Yanin da sop ok kounutan nok tumpukan nong migunut sok tow Nasaret kituꞌ.
6 Sinuloyanin pa tanan bosiya sammalon og Baloy nok Tuhan,
sugaid sinaggow nami yanin,
bu hukumon nami bosiya mounut sok saraꞌ nami.
7 Tibuwa minatong ok kounutan nong mga sundalu,
nok si Lisiyas,
bu tinogolin malap si Pol dinami.
8 Pokpuwas,
miksuguꞌ si Lisiyas song mga miktuntut ni Pol nong mangoy dinika.
Bu bilaꞌ sumoriyahon nu yanin,
kosunan nu bug olo ok tinuntut nami diyanin.”
9 Simolobuk ong mga duma nog Yahudi sok ponuntut ni Tertullus koyon.
Tinaluꞌ nilon nong motud og lam niyon.
10 Tubus sininyasan nog gubernur si Pol nok potaluon.
Dadi taluꞌ ni Pol,
“Kiosunan ku nok tinahunan ka na monghukum sog bangsa nami,
saan na mogloliyagu dumaawa sok tuntut nilon dinakon dini sog gadapan nu.
11 Molomu nu poligsaon nok sopuluꞌ bu duwaꞌ ondow da ong miniyan tidu u mangoy sumumba dituꞌ sog Jerusalem.
12 Ondaꞌ u kotongow nong mga Yahudi kini mogdaawa sog bisan sima towoy,
atawa monasow sok tumpukan nok tow sog Baloy nok Tuhan,
song mga baloy poksumbahan nog len,
atawa sok siyudad.
13 Bu ondiꞌ nilon da sop motantu dinika ok tinuntut nilon dinakon ningkomun.
14 Sugaid angkonon ku nong moktotombaꞌ u sok Tuhan nong mga pingapuꞌ nami mounut sok ponintuluꞌ ni Isa Al-Masih nok sambatan nong mga Yahudi kanaꞌ mologdong.
Akon kini tinumombaꞌ u da sop sog lam nok saraꞌ nok piponog ni Nabi Musa bu song misulat sok Kitab Konabihan.
15 Mamaꞌ dinilon dinodamahan ku da sop nok potubuon nok Tuhan og lam nong manusiyaꞌ mologdong bug molikoꞌ.
16 Saan na miktuyuꞌ u tokodoy nog diꞌ kotuntutan nok pongatoyan ku sok ponontong nok Tuhan bu song mga manusiyaꞌ.
17 Na pokpuwas nong mga sanu tahun,
mikpuliꞌ u sog Jerusalem mogoyit nong mga sodokka song mga miskinan nok salu-bangsa u bu mokkurban.
18 Dangan mibalaku nong mga tow sog diyalom Baloy nok Tuhan,
midoksuꞌ u na moksutsi mounut song mga gaddat nog agama.
Daꞌdun ok tumpukan nok tow song molani u bu daꞌdun sop ok sasow.
19 Sugaid ongon diyon ong mga Yahudi tidu sog Bataꞌ-bataꞌ Asiya.
Ilon bosiya og daitan mangoy moksumbung dinika bilaꞌ ongon ong motuntut nilon dinakon.
20 Tibuwa pagga daꞌ ma dini ong mga tow kituꞌ,
potiyangan nu moktaluꞌ ong mga tow kini.
Potaluꞌ nu ilon bug olo ong molaat nong mitongow nilon dinakon dangan sinumoriya nilon akon sok poghukuman nami.
21 Poꞌ daꞌdun ong miinangu,
luwal bug molaton dinilon ok tinaluꞌ u kituꞌ nong monamal sog gadapan nilon,
longu,
‘Soliyan niyu akon poghukumon sog gondow kini sabap sok kotombaꞌ u nong motubuꞌ puliꞌ ong mga minatoy.’ ”
22 Sugaid si Gubernur Piliks,
kiosunanin tokodoy ok pasal sok ponintuluꞌ ni Isa Al-Masih,
dadi pilotaꞌ in pa ok poghusoy koyon.
Taluꞌ in,
“Bilaꞌ matong na ok kounutan nong mga sundalu nok si Lisiyas,
bangka u pa taluoy diniyu og hukuman ku sok parkalaꞌ niyu kini.”
23 Doksuꞌ sinuguꞌ in ok solobuk kapitanin nok poipat si Pol,
bu bogoyan nok koluhayahan,
bu diꞌ pogondian ong mga supali nin tumabang diyanin.
24 Pogbiyan nong mga sanu ondow,
minangoy diyon si Gubernur Piliks dunut libunin nok si Durusilla,
og Yahudi.
Tubus pitawagin si Pol bangka yanin ponginongog nok suksuganin pasal sok kotombaꞌ in ni Isa Al-Masih.
25 Tibuwa dangan pisabut na ni Pol ok pasal sok kologdongan,
poksaggaꞌ nog ginawa,
bug pasal sok poghukum sok sosunguon,
kiondokan si Piliks bu taluꞌ in,
“Awaꞌ a poguna.
Bilaꞌ ongon og waktu u,
potawagu da ika puliꞌ.”
26 Migdodama yanin nok tindanan yanin ni Pol.
Saan na lolayunin potawagon bangka nin oyitoy mokpadu.
27 Dangan miniyan na duwaꞌ tahun,
sinuklihan si Piliks ni Porsiyus Pestus moggubernur.
Bu pagga kolegan ni Piliks nong mosuat diyanin ong mga Yahudi,
pitiyanganin si Pol sok pirisuhan.