Ok Pogangoy ni Pol sog Jerusalem
21
Dadi simuwoy ami na dinilon bangka ami poglayag.
Minglogdongan ami posunguꞌ sok puluꞌ Kus.
Bu poksunud gondow miglandan ami na sop sok puluꞌ Rodos,
bu tidu dituꞌ,
minangoy ami sog bonuwa nok Patara.
2 Mikobalak ami diyon nok kappal posunguꞌ sog bonuwa Ponikiya,
dadi sinumakoy ami bangka ami poglayag.
3 Sok poglayag nami,
mitongow nami ok puluꞌ Kipros.
Dangan miniyan ami sog dapit lintu nok puluꞌ koyon,
miglayag ami pa posunguꞌ sok probinsiya nok Siriya.
Dinumongguꞌ ami diyon sog bonuwa Tirus,
poꞌ awason dituꞌ og lulan nok kappal.
4 Minontong ami nong mga mogogunut ni Isa dituꞌ,
bu limihan ami dinilon pitu ondow.
Na biyan sog Ruh pidinsamaan nilon tumaluꞌ bug olo ong mokobiyan ni Pol,
dadi pisidaan nilon yanin nog diꞌ mangoy sog Jerusalem.
5 Dangan minatong na og waktu nami mopanow,
ginumonat ami na bangka ami pogdayun sok popanowan nami.
Bu og lam nilon dunut libun-bataꞌ nilon,
inatod nilon ami toktob sog luwasan nok siyudad.
Sog daꞌ ami pa poksuwoy,
linumuhud ami sok kilid dagat bangka ami pongoni-ngoni.
6 Doksuꞌ mimuhun ami na,
bangka ami na sakoy sok kappal,
bu minguliꞌ na sop ilon.
7 Dangan mikotulak ami na tidu sog bonuwa Tirus,
minatong ami sog bonuwa Tolemas.
Sinalam nami dituꞌ ong mga pigilugan,
bu linumihan ami dinilon sondow.
8 Poglomaꞌ,
ginumonat ami na bu minatong ami sog bonuwa Sesareya.
Migdukon ami sog baloy ni Pilip,
ok tow nong mokpoposaplag nong Mobais nok Suksugan.
Solobuk yanin sok pitu kotow kituꞌ nong mipiliꞌ tumabang song mga mokpoposampoy.a
9 Taga bataꞌ yanin pat kotow nog budjang nong mokposampoy nok taluꞌ nok piponog dinilon nok Tuhan.
10 Soliyan nami moglihan diyon mga sanu ondow,
ongon ong nabi minatong tidu sog Yahudiya,
ong ngalanin Agabus.
11 Pogangoyin dinami,
inalapin ok sobitan ni Pol,
bangka nin unoyoy mogbod og botis bug komotin bu taluꞌ in,
“Maꞌ nini ok tinaluꞌ nog Ruh Mahasutsi,
‘Og gapuꞌ nok sobitan kini,
maꞌ nini ok pogbogbod diyanin nong mga Yahudi sog Jerusalem,
bu wakilon yanin sog len bangsa.’ ”
12 Dangan midongog nami koyon,
pingoni nami bug lam nok tow dituꞌ nog diꞌ yanin mangoy sog Jerusalem.
13 Sugaid tinumabal si Pol,
“Manu migaduy amu ma,
bu pisakitan niyu ma ok pongatoyan ku?
Mitogama u na kanaꞌ hadja mopirisu,
sugaid bisan matoy sog Jerusalem para sok pongandolu ni Panghuꞌ Isa.”
14 Na pagga diꞌ da yanin motogol,
linumotaꞌ ami na bu taluꞌ nami,
“Og leg dona nok Panghuꞌ ong mounut.”
15 Pokpuwas nami miglihan nong mobon-obon diyon,
mingmomos ami na bangka ami tukad sog Jerusalem.
16 Migunut dinami og duma nong mga mulid tidu sok Sesareya.
Inoyit nilon ami sog baloy ni Nason,
ok tow Kipros nok solobuk song mga mikuna moimung nong mulid.
Dituꞌ ami miglihan diyanin.
17 Dangan minatong ami na sog Jerusalem,
linoliyag ong mga pigilugan tumolimaꞌ dinami.
18 Poksunud gondow,
migunut ami ni Pol mangoy dituꞌ ni Yaꞌkubb,
bu miglimud diyon og lam nong migmokogulang.
19 Pogdoksuꞌ ilon salamoy ni Pol,
sinuksugin sosolobuk ok pasal sog ininang nok Tuhan song mga tow nok kanaꞌ Yahudi biyan diyanin.
20 Dangan midongog nilon koyon,
piotas nilon ok Tuhan.
Bu tinaluan nilon si Pol,
“Mitongow nu na bug sanu ngibu na song mga Yahudi ok tinumombaꞌ,
bu binologbogan nilon tokodoy ok saraꞌ tidu ni Nabi Musa.
21 Kiposunan dow ilon nong minintuluꞌ a sog lam nong mga Yahudi nog limimugoy song mga len bangsa nok tolikudan ok saraꞌ ni Nabi Musa.
Tinaluan nu dow ilon nog ondiꞌ na islamon og gumbataꞌ nilon bu diꞌ unuton ong mga gaddat ta.
22 Na olo ok sumboy inangon ta?
Kosunan nilon na dodaꞌ nong minatonga na.
23 Maꞌ nini og inangon ta,
ongon ok pat kotow nok kolakihan dini nong mikosomayaꞌ na sok Tuhan.
24 Pogunuta dinilon moksutsi nog lawas,
bu ika na og gumastu nilon sok poginang nilon dun,
bagun modoksuꞌ ok kopoksutsi nilon biyan sok poktukung.
Dadi kosunan nok kodakolan ong midongog nilon pasal dinika kanaꞌ motud,
poꞌ motongow nilon nog bisan ika,
tinumombaꞌ a da sop sok saraꞌ ni Nabi Musa.
25 Sugaid pasal song mga len bangsa nong migunut sog Al-Masih,
pinoyitan nami na ilon nok sulat pigisunan nami,
yonin na nog hallian nilon ong mga kan nog asal inuwakil song mga tuhan-tuhan.
Hallian nilon da sop og duguꞌ,
mga binatang nong milongok bug pogjina.”c
26 Dadi poksunud gondow,
inoyit na ni Pol ok pat kotow kituꞌ,
bu sinutsi nin og lawasin dunut dinilon.
Pokpuwas nituꞌ,
sinumolod yanin sog Baloy nok Tuhan bagun mokposun bug andun kodoksuꞌ ong mga gondow nok poksutsi nilon bu ok pokkurban para sok sosolokotow dinilon.
Sinaggow si Pol
27 Dangan posunguꞌ na modoksuꞌ ok pitu ondow nok poksutsi nilon,
ongon ong mga Yahudi minangoy diyon tidu sog Bataꞌ-bataꞌ Asiya.
Poktongow nilon ni Pol dituꞌ sog Baloy nok Tuhan,
piktungihan nilon ong mga tow bagun molingit diyanin,
bangka saggowoy.
28 Migekesan ilon,
taluꞌ nilon,
“U mga tow Israel,
tabang amu,
poꞌ ok tow kini mogangoy sok kobonuwahan monintuluꞌ nok tompolaꞌd sog bangsa ta,
bu dumugtul sok saraꞌ ni Nabi Musa bu sog Baloy nok Tuhan.
Bu ningkomun misammalin na og Baloy nok Tuhan,
poꞌ inoyitin sumolod diyon ong mga tow nok kanaꞌ Yahudi.”
29 Tinaluꞌ nilon koyon poꞌ mitongow nilon sibon si Tropimos,
ok tow Epesus,
dunut ni Pol sok siyudad,
bu baluꞌ nilon dun,
inoyit yanin ni Pol sumolod sog Baloy nok Tuhan.
30 Saan na misasow na ok siyudad,
bu miksama-sama gumobok ong mga tow.
Poksaggow nilon ni Pol,
ginuyud nilon yanin sog luwasan nog Baloy nok Tuhan,
bu sododuun mitambol og bongowan.
31 Dangan patoyon nilon na bosiya si Pol,
minatong og dongogan sok kounutan nog batalyun nok sundalu nog Rum nong misasow ong mga tow sog Jerusalem.
32 Migoyit mogdayun yanin nong mga sundalu bug mga kapitanin bangka ilon pogdaliꞌ-daliꞌ mangoy sok piglumpukan koyon.
Na dangan mitongow nong mga tow ok kounutan koyon bug mga sundalu nin,
linotaan nilon mogbinasa si Pol.
33 Tubus inangoy nok kounutan koyon saggowoy si Pol,
bangka yanin poksuguꞌ nog ikotan yanin duwaꞌ buk kodina.
Miksak ok kounutan koyon bug sima yanin bu olo ong miinangin.
34 Na miglen-len na ok poglosik nong mga tow,
dadi daꞌ kosunoy nok kounutan ok sabapan nok sasow.
Sinuguꞌ in ong mga sundalu nin nog oyiton si Pol sok kampu nilon.
35 Dangan minatong ilon sog gugdan,
sinikwat nilon na si Pol poꞌ landuꞌ na ok sasow.
36 Ong mga tow nong miktuyuk migekesan,
“Patoy niyu yanin!”
Og Daawa ni Pol song mga Tow
37 Dangan posunguꞌ na oyiton si Pol sok kampu,
tinaluanin ok kounutan koyon,
“Tuwan,
mogdadi taꞌ moktaluꞌ u dinika?”
Ok tabal nok kounutan koyon,
“Mokosun ka taꞌ saan nog bahasa Grik?
38 Kanaꞌ taꞌ ika ok tow Misir kituꞌ nong miktagnaꞌ nok poglogitom bogu kini,
bu inoyit nu ok pat ngibu kotow nok polomunuꞌ kituꞌ posunguꞌ sog ginlupaan mimala?”
39 Tinumabal si Pol,
“Kanaꞌ tuwan,
solobuku Yahudi.
Miktidu u sok Tarsus,
ong mibantug nok siyudad sog bonuwa Silisiya.
Pongonihon ku tokodoy dinika,
potaluꞌ nu pa akon song mga tow.”
40 Na kinumboy yanin nok kounutan moktaluꞌ.
Dadi minindog si Pol sog gugdan,
bangka nin sinyasoy ong mga tow nog diꞌ moglimut.
Dangan daꞌdun na og gonek nilon,
miktaluꞌ si Pol dinilon sog bahasa nog ginamit nog bangsa Ibrani.