Siloꞌ Pol sog Bonuwa Makedonya bu sog Bonuwa Grik
20
Dangan limotaꞌ na ok sasow,
pitawag ni Pol ong mga mulid ni Isa.
Pogdoksuꞌ in ilon pituwahoy nog ikopagon nok kotombaꞌ nilon,
mimuhun na yanin dinilon bangka yanin gonat posunguꞌ song Makedonya.
2 Mikpanowan si Pol sok kobonuwahan koyon mognasihat nog ikopagon nok kotombaꞌ nilon.
Tubus minangoy yanin sog bonuwa Grik.
3 Dituꞌ yanin migonong tolu bulan,
bu mokposunguꞌ na bosiya yanin moglayag sok Siriya.
Tibuwa dangan kiosunan ni Pol nong migisun nong molaat og duma nog Yahudi,
mikohukum yanin nong mokpuliꞌ miyan song Makedonya.
4 Inunutan yanin nog bataꞌ ni Pirrus nok si Sopater,
nok tow Beroya,
bug mga tow Tesalonika nok siloꞌ Aristarkus bug Sekundus,
si Gayus nok tow Derbe,
bug si Timuti,
sampoy mga tow taga Bataꞌ-bataꞌ Asiya nok siloꞌ Tikikus bug Tropimos.
5 Miguna ong mga tow kini bangka nilon ami bagadoy sok Trowas.
6 Miglayag ami niloꞌ Pol tidu sok Pilipi pogdoksuꞌ nog Halilaya Pokkan nok Pan nog daꞌdun ok Posuligin.
Doksuꞌ pogbiyan nog lima ondow,
minatong ami sok Trowas,
bu limihan ami dituꞌ pitu ondow.
Pitubuꞌ Puliꞌ si Yutikus
7 Na sok ponognaan nog gondow sok simana koyon,
miglimud ami bagun moksalu kuman nok pan gantaꞌ pomondoman nok kopatoy ni Panghuꞌ Isa para dinita.
Winasihatan ilon ni Pol,
bu piobonin ok pononduꞌ in sampoy misaut tongaꞌ gobi,
poꞌ gumonat yanin sunud gondow.
8 Og bilik nok piktopukan nami sok tas,
modakol ok suluꞌ nok tinutudan.
9 Na ongon ok subul,
ngalanin Yutikus,
migingkud sok tombuan.
Sabap sog landuꞌ kobon nok popondom ni Pol,
miktonguꞌ na yanin bangka pokotulug,
bangka kolabuꞌ tidu sog ikotolu pangkat.
Poksikwat nilon dun,
minatoy na.
10 Minonog si Pol bangka nin loboy ok subul koyon bu kinokopin,
taluꞌ in,
“Diꞌ amu mosusa,
poꞌ totubuꞌ da yanin.”
11 Tubus minenek na si Pol puliꞌ,
bu minitak yanin nok pan gantaꞌ pomondoman nok kopatoy ni Panghuꞌ Isa bangka nami kanoy.
Mikosaut sampoy doliꞌ-ondow ok pognasihatin song mga tow,
bangka na yanin gonat.
12 Doksuꞌ inoyit nilon na ok subul kituꞌ muliꞌ,
bu migloliyag ilon tokodoy poꞌ totubuꞌ da.
Ok Poglayag tidu sok Trowas posunguꞌ song Miletus
13 Mipanow si Pol posunguꞌ sog Asus poꞌ yonin og legin.
Tibuwa ami,
sinumakoy sok kappal miguna diyanin,
bu dituꞌ ami na migbalak.
14 Pogbalak nami sog Asus,
simakoy na si Pol sok kappal.
Doksuꞌ migdayun ami pa sog bonuwa Mitilin.
15 Poglomaꞌ miglayag ami tidu dituꞌ,
bangka ami datong song molani nok puluꞌ Kiyos.
Tubus poglomaꞌ na sop,
dinumongguꞌ ami sok puluꞌ Samos,
bu poksunud gondow,
minatong ami sog bonuwa Miletus.
16 Na misolobuk ok pikilan ni Pol nog diꞌ na mapit sog Epesus bagun diꞌ na yanin kobonan sog Bataꞌ-bataꞌ Asiya.
Og legin saan matong sog Jerusalem sog diꞌ pa og Halilaya Lima puluꞌ bilaꞌ mogdadi.
Ok Pomilin ni Pol
17 Dadi tidu sog bonuwa Miletus,
pitawag ni Pol ong mga migmokogulang sog jomaa nog dituꞌ sog Epesus.
18 Na pogdatong nilon diyon,
tinaluan ilon ni Pol,
“Mga koilugan ku,
kiosunan niyu na og gaddatu tidu sok kodatongu dini sog Bataꞌ-bataꞌ Asiya.
19 Inunutu ok piinang dinakon nok Panghuꞌ.
Ininangu og lam niyon dunut mobabaꞌ nog goyitan bug luwaꞌ bisan pa sog waktu nok sinuloyan ku biyan song mga poksipi nong molaat nong mga Yahudi.
20 Daꞌ u pogalang-alang mongnasihat nog olo-olo nituꞌ nog ikobais diniyu.
Tinonduan ku na amu sok kodakolan bu song mga baloy niyu.
21 Pisampoyu song mga Yahudi bug mga len bangsa ok pasal sok poktowbat sok Tuhan bu sok kotombaꞌ sok Panghuꞌ ta niyu,
Isa Al-Masih.
22 Dadi ningkomun mangoyu na dituꞌ sog Jerusalem,
poꞌ pangoyon ku tokodoy dituꞌ nog Ruh nok Tuhan.
Diꞌ u kosunan og lam nok sumugat dinakon dituꞌ.
23 Sugaid bisan ayin-ayin ku angoy,
piosun dinakon nog Ruh Mahasutsi,
ok pirisuhan bug kosiksaan,
ok koposunguan ku.
24 Tibuwa posagadan na bisan olo ok koposunguan ku,
poꞌ kanaꞌ da mohalgaꞌ dinakon ok kotubuꞌ u.
Ong mohalgaꞌ dinakon,
nong modoksuꞌ u ok piinang dinakon ni Panghuꞌ Isa,
yonin na ok pokposampoy nong Mobais nok Suksugan pasal sok kolasa-kololat nok Tuhan song manusiyaꞌ.
25 Na kiosunan ku nog amu koyon nok kiposampoyan ku nok pasal sok Pomarinta nok Tuhan,
diꞌ niyu na akon motongow puliꞌ.
26 Saan na mokpomotudu diniyu sog gondow kini nog diꞌ u na kotuntutan bug ongon diniyu og diꞌ moawon.
27 Poꞌ daꞌ u pogalang-alangoy posampoyon diniyu og lam nok kolegan nok Tuhan.
28 Na sumboy bantoyan niyu og ginawa-baran niyu sampoy og lam nong moktotombaꞌ ni Isa nok pingandol diniyu nog Ruh nok Tuhan.
Ipaton niyu pahatul ong mga sukuꞌ nok Tuhan kini mamaꞌ nong mga tow nong migipat nog bilibili nilon,
poꞌ linokatin ilon biyan sog duguꞌ nog Bataꞌ in.
29 Poꞌ kosunan ku bilaꞌ mawaꞌ u,
ongon na ong mga mokpoposampoy nog loput bu mongakkal diniyu.
Mamaꞌ ilon nog gayam talun nong mampuꞌ diniyu bagun kumilow diniyu.
30 Lumuwas sop bisan tidu diniyu ong mampuꞌ lumadak nok kosobonnalan bagun akkalan ong mga mulid,
bu ilon na sop og unutan.
31 Saan na pokpotubud amu,
bu pondom niyu nog daꞌ u lotaꞌ gobi-gondow mokpituwa diniyu dunut luwaꞌ u sog bon nok tolu tahun.
32 Ningkomun,
wakilon ku na amu sok Tuhan bu pongonihon ku diniyu nok pondom niyu ok Parmanin bug ponoy kosolag ok kolasa-kololatin diniyu.
Na ok Parmanin ong mokopagon nok kotombaꞌ niyu bu mokobogoy diniyu nok kobaisan nok tinogama nok Tuhan para song mga sutsi.
33 Daꞌ u pognapsuhoy ok silber,
bulawan atawa ponapot nok sima-sima.
34 Amu,
kiosunan niyu nong miktiksaꞌ u para sok kulang-kabusu bu song mga duma u.
35 Saan na miginangu pahatul bagun ongon ok pomintangan niyu.
Sumboy amu sop moginang bagun amu mokotabang song mga ondiꞌ mokopoluli.
Pondom niyu ok taluꞌ ni Panghuꞌ Isa,
‘Mobarakat pa mogbogoy,
tidu sok tumabuk.’ ”
36 Pokpuwas koyon taluoy ni Pol,
linumuhud yanin bangka pongoni-ngoni dunut nog lam nilon.
37 Migaduy ilon kotanan,
bu kinokop nilon si Pol bangka nilon alokoy.
38 Mikkosusahan ilon tokodoy sabap sog lapal ni Pol kituꞌ nog diꞌ nilon na yanin motongow puliꞌ.
Tubus inunutan nilon yanin posunguꞌ sok kappal.