Ok Poksasow sok Siyudad nok Tesalonika
17
Na dangan kibiyanan nilon na og bonuwa Ampipolis bug Apolon,
minatong ilon sog bonuwa Tesalonika bug ayin ongon og baloy poksumbahan nong mga Yahudi.
2 Sinumolod si Pol sok poksumbahan koyon mamaꞌ na nok kibiyaksahanin,
bu sog bon nok tolu Sabtuan,
pigisunanin dunut dinilon ok pasal sok Kitab.
3 Pisabutin bu tinantu nin biyan song misulat diyon nog og Al-Masih sumboy mobinsanaꞌ bu motubuꞌ puliꞌ tidu sok kopatoy,
bu taluꞌ in,
“Si Isa kini ok pisampoyu diniyu,
yonin na og Al-Masih.”
4 Na og duma dinilon mioyit sok tinaluꞌ in bu minampuꞌ ni Pol bug Silas sampoy ong modakol nog bangsa Grik nog boloammal,
bu modakol sop ong mga motas nok kolibunan.
5 Sugaid migdalu ong mga len nog Yahudi,
dadi linimud nilon ong mga bulaug bangka nilon sasowoy ok siyudad.
Minangoy ilon monulung sog baloy ni Yason,
poꞌ pinontong nilon dituꞌ si Pol bug Silas bagun moyit nilon song mga tow.
6 Dangan daꞌ nilon kobalak,
ginuyud nilon si Yason bug mga duma pigilugan posunguꞌ sog gadapan nong mga kounutan sok siyudad,
taluꞌ nilon,
“Ong mga tow nog ayin-ayin na hadja monasow,
dini na ningkomun sog bonuwa ta.
7 Pidayun pa ilon ni Yason sog baloyin.
Na ilon kotanan sumaggaꞌ sok saraꞌ nok sultan nog bangsa Rum,
poꞌ taluꞌ nilon ongon dow ok sultan nog len pogingalanan Isa.”
8 Dangan midongog koyon nong mga tow bug mga kounutan sok siyudad,
misasow tokodoy ok pikilan nilon.
9 Doksuꞌ pibayad nilon si Yason bug mga duma nin nok piyansa bangka nilon boluyoy.
Dituꞌ sog Bonuwa nog Beroya
10 Sog gobi niyon,
pipanow mogdayun nong mga pigilugan siloꞌ Pol bug Silas posunguꞌ sog bonuwa Beroya.
Pogdatong nilon,
sinumolod ilon sok poksumbahan nong mga Yahudi.
11 Na ong mga Yahudi kini mobais og goyitan nilon tidu song mga Yahudi dituꞌ sok Tesalonika,
poꞌ meleg tokodoy ilon tumolimaꞌ nok pokposampoy ni Pol.
Gondow-gondow mongadjiꞌ ilon nok Kitab Sutsi bagun nilon oklungan bug motud taꞌ ok tinaluꞌ ni Pol.
12 Dadi modakol ok tinumombaꞌ,
sampoy ong modakol nong mga mokotas nok kolibunan bug kolakihan nog Grik.
13 Tibuwa dangan kiosunan nong mga Yahudi sok Tesalonika nok pisampoy ni Pol ok Parman nok Tuhan sog bonuwa Beroya,
minangoy ilon da sop dituꞌ.
Minasow bug piktungihan nilon ok tumpukan nong mga tow diyon.
14 Sododuun pipanow nong mga pigilugan si Pol posunguꞌ sok kilid dagat,
sugaid si Silas bug Timuti,
mikpobagak da dituꞌ.
15 Na ong mga tow nong migatod ni Pol,
migunut diyanin toktob sog bonuwa Aten.
Sog daꞌ pa ilon uliꞌ sog Beroya,
mingintugun si Pol dinilon nok potuyukon si Silas bu si Timuti diyanin nong mosompun.
Dituꞌ sok Siyudad nog Aten
16 Na soliyan ni Pol mogbagad dinilon sog Aten,
misasow ok pongatoyanin dangan mitongowin ong modakol nong mga tuhan-tuhan nok sumbahon nilon sok siyudad koyon.
17 Dadi pigisun-isunan ni Pol dunut nong mga Yahudi bu song mga tow boloammal sog diyalom baloy poksumbahan.
Gondow-gondow mikposampoy yanin sok tabuan sok sosuku nok kisolabuhan nog dituꞌ.
18 Ongon da sop ok tumpukan nong mokokosun nog iningalanan nog Epikure bug Istuik nog linumugat diyanin.
Ok taluꞌ nog duma,
“Sumolap na ma moktaluꞌ ok tow kini.
Olo bayuꞌ ong maana nin?”
Taluꞌ sop nog duma,
“Mamaꞌ yanin nong mikposampoy nong mga len tuhan.”
Maꞌ niyon ok tinaluꞌ nilon,
poꞌ ok pignasihat ni Pol pasal ni Isa bu sok kotubuꞌ puliꞌ.
19 Doksuꞌ inalap nilon yanin bangka oyitoy sok poglumpukan nong mga migmokogulang,
ong ngalanin Areyopagus,
bu taluꞌ nilon diyanin,
“Mogdadi taꞌ kosunan nami bug olo og bogu nok ponintuluꞌ kini nok pisampoy nu?
20 Kiboguhan ami nong mokosobuꞌ-sobuꞌ nok ponintuluꞌ nu kini,
dadi ok kolegan nami kosunan bug olo ong maana nin koyon.”
21 Na og lam nong mga tow Aten bug mga len tow diyon,
daꞌdun og ginang nilon,
luwal pogabit-abitan ong mga bogu pokposampoy atawa monginongog dun.
22 Dadi minindog si Pol sog gunahan nong mga migmokogulang nog Areyopagus,
taluꞌ in,
“Mga piktowan sog Aten,
mitongowu nog boloammal amu tokodoy sog lam nituꞌ.
23 Poꞌ soliyan ku mokpanow-panow,
mitongowu ong mga poksumbahon sog bonuwa niyu.
Mitongowu da sop ok poksumbahan batu nok taga sulat maꞌ nini:
‘POSUNGUꞋ SOK TUHAN NOG DIꞋ PA KILALAHAN.’
Dadi ok piksumba niyu koyon nog diꞌ niyu kilalahan,
posampoyon ku diniyu.
24 Ok Tuhan koyon,
yonin na ong Mikpoongon nog dunya bug lam nituꞌ.
Pagga yanin ok Pogbayaꞌ-bayaꞌ nog langit bug lupaꞌ,
ondiꞌ yanin mogonong song mga baloy poksumbahan nog inimung nong manusiyaꞌ.
25 Daꞌdun ok kulang diyanin bu daꞌ yanin pokkogunahan nok tabang nok tow,
poꞌ yanin ong mogbogoy song mga tow nok kotubuꞌ bug ginawa bug lam nituꞌ.
26 Tidu sok solokotow,a
inimungin og lam nog bangsa nong manusiyaꞌ,
bangka nin poonongoy ong mga bangsa koyon ayin-ayin sog dunya.
Asalin ginantaꞌ og waktu nilon bug toktoban nong mga pogonongan nilon.
27 Saan na inimung kini nok Tuhan,
bagun og lam nok tow moktuyuꞌ monontong nog dalan posunguꞌ diyanin,
bagun nilon kosunan bug sima dodaꞌ yanin.
Poꞌ kanaꞌ da yanin molayuꞌ sok sosuku dinita.
28 Poꞌ sabap diyanin,
miongon ita,
mitubuꞌ ita,
bu mikopoglilow ita.
Mamaꞌ na nok tinaluꞌ da sop nok solokotow diniyu nok polotulaꞌ,
longin,
‘Ita kini ong mga gumbataꞌ dodaꞌ nong Mikpoongon.’
29 Na pagga og gumbataꞌ ita ma nok Tuhan,
sumboy diꞌ ta pikilon ok Tuhan mamaꞌ nog bulawan,
silber,
atawa batu nog inimungan nog bayuꞌ-bayuꞌ nok kopandoyan nong manusiyaꞌ.
30 Sok tagnaꞌ,
pitiyangan nok Tuhan ong mga tow moginang nong maꞌ niyon koyon,
poꞌ daꞌdun ok sene-sabut nilon dun.
Sugaid ningkomun,
sinuguꞌ in moktowbat og lam nok tow bisan ayin.
31 Poꞌ ginantaꞌ na nok Tuhan og gondow nog hukumonin nong mologdong og dunya biyan sok tow nok piniliꞌ in.
Bu tinantu nin sog lam nok tow bug sima yanin biyan sok pokpotubuꞌ in puliꞌ nok piniliꞌ in koyon.”
32 Dangan midongog nilon ok pasal sok kotubuꞌ puliꞌ tidu sok kopatoy,
og duma dinilon migunda-unda.
Sugaid ok taluꞌ nog duma,
“Monginongog ami da puliꞌ dinika nok pasal nini.”