Migunut si Timuti niloꞌ Pol bug Silas
16
Doksuꞌ migdayun siloꞌ Pol sog bonuwa Derbe bug Listra.
Ongon dituꞌ ok solobuk mulid ni Isa ong ngalanin Timuti,
og bataꞌ nok solobuk libun Yahudi nong moktotombaꞌ,
bu og gommaꞌ in,
bangsa Grik.
2 Mobais og dongogan ni Timuti song mga moktotombaꞌ ni Isa sog Listra bug Ikoniyum.
3 Na ok kolegan ni Pol,
podunutonin si Timuti,
dadi inislamin.
Poꞌ og lam nong mga Yahudi song mga bonuwa koyon,
kiosunan nilon nog daꞌ koislam si Timuti poꞌ og gommaꞌ in bangsa Grik.a
4 Tubus mipanow siloꞌ Pol sog len-len siyudad.
Pisampoy nilon song mga moktotombaꞌ ni Isa ong mga suguan nok kipogisunan nong mga mokpoposampoy bug mga migmokogulang dituꞌ sog Jerusalem nok sumboy unuton nilon.
5 Saan na miksipagas ok kotombaꞌ nong mga sukuꞌ ni Isa Al-Masih,
bu miksidakol ilon gondow-gondow.
Ok ponontongon ni Pol dituꞌ sok Trowas
6 Doksuꞌ migdayun siloꞌ Pol sok probinsiya Pirigiya bug Galatiya.
Daꞌ ilon pa kumboyoy nog Ruh Mahasutsi mokposampoy nok Parman dituꞌ sok probinsiya nog Bataꞌ-bataꞌ Asiya sog waktu koyon.b
7 Dangan mikodopot siloꞌ Pol sok toktoban nog bonuwa Misiya,
miksipi ilon mangoy sog bonuwa Bitiniya,
sugaid daꞌ ilon kumboyoy nog Ruh ni Isa.
8 Saan na biniyanan nilon hadja og bonuwa Misiya,
bu migdayun ilon sog bonuwa Trowas.
9 Poglogobi,
ongon ok ponontongon ni Pol.
Mitongowin ok solokotow Makedonya nong mikilolat diyanin,
taluꞌ in,
“Angoya dini song Makedonya bangka nu ami tabangoy.”
10 Dangan mitongowin koyon,
migmuhut-muhut ami mangoy song Makedonya.
Ok ponginombaꞌ nami,
inonggat ami nok Tuhan bagun posampoyon dinilon ong Mobais nok Suksugan pasal ni Panghuꞌ Isa.c
Tinumombaꞌ si Lidya ni Panghuꞌ Isa
11 Dadi miglayag ami tidu sok Trowas posunguꞌ sok puluꞌ Samotirake,
bu poksolobuk gondow,
migdayun ami sok siyudad Neyapolis.
12 Tidu diyon,
miglandan ami sog bonuwa Pilipi,
ong mosolag nok siyudad nong misakup nog bangsa Rum bu mibotang song Makedonya.
Miglihan ami diyon mga sanu-sanu ondow.
13 Sog Gondow Pogogulali,
linumuwas ami sok siyudad posunguꞌ sok kilid subaꞌ poꞌ ong niyat nami,
poglumpukan nong mga Yahudi mongoni-ngoni diyon.
Pogdatong nami,
miningkud ami bangka nami abit-abitoy ong mga kolibunan nog limuduk diyon.
14 Na ongon ok solokotow libun nong minginongog dinami,
ong ngalanin si Lidya nok tidu sog bonuwa Tiyatira.
Mogdodagang yanin nong mga kokanaꞌ mokohalgaꞌ,
ok tinaꞌ in bayolet.
Moksosumba sop yanin sok Tuhan.
Na binukaan nok Tuhan ok pongatoyanin,
bu tinolimaꞌ in ok pononduꞌ ni Pol.
15 Dangan mipoliguꞌ na si Lidya dunut nog gampuꞌ baloyin,
inonggatin ami,
taluꞌ in,
“Bilaꞌ mipomotud niyu na nog ikhlas ok kotombaꞌ u sok Panghuꞌ,
alung,
pongulian amu pa sog baloyu.”
Dadi mioyitin ami.
Mipirisu si Pol bu si Silas
16 Na ongon og gondow pogangoy nami sok poksumbahan,
linumpak ami nog gulipon libun.
Sinolodan yanin nok soytan poloutikaꞌ,
bu pasal sok kokosunin mongutikaꞌ,
miksin-sin ong mga gamu nin.
17 Na piktuyukin ami niloꞌ Pol bangka poglosikan,
taluꞌ in,
“Ong mga tow kini og gulipon nok Tuhan Mahatinggi nong mokposampoy diniyu nog dalan bagun amu moawon.”
18 Mamaꞌ niyon og ininangin gondow-gondow boyaan mitonop na si Pol dun.
Inadapin og libun koyon bu tinaluanin ok soytan,
“Suguon ku ika song ngalan ni Isa Al-Masih,
luwasa diyanin!”
Sododuun,
limuwas ok soytan sog lawasin.
19 Tibuwa dangan mitongow koyon nong mga gamu nin,
kiosunan nilon nong mibolong na ok pongusaha nilon.
Saan na sinaggow nilon si Pol bug Silas bangka nilon guyudoy sok tabuan bagun padapon song mga kounutan sog bonuwa koyon.
20 Dangan mioyit nilon og duwaꞌ kotow koyon song mga tow Rum nong monghuhukum,
miktaluꞌ ong mga gamu nok poloutikaꞌ,
“Ong mga tow Yahudi kini,
minasow ilon sok siyudad ta.
21 Minintuluꞌ ilon nong mga gaddat nog daꞌ kosugat sok saraꞌ ta nok tolimaon atawa inangon ta mga tow Rum.”
22 Pigabangan sop nog lumpukan nok tow diyon minasa siloꞌ Pol bug Silas.
Doksuꞌ pinggodit nong mga monghuhukum og dogdoy nilon bangka ilon poksuguꞌ nog lakposon.
23 Dangan milakpos nilon na og duwaꞌ kotow koyon nok kanaꞌ sodjahan,
pinirisu nilon,
bu sinuguꞌ nilon ong mogogipat diyon nog bantoyan ilon mahatul.
24 Midongogin hadja ok suguan koyon,
binotangin ilon sok sook tokodoy nok pirisuhan bu binakus og botis nilon sok kayu.
25 Sugaid song mga tongaꞌ gobi na,
mingoni-ngoni si Pol bug Silas,
bu mikkolangan ilon nok pokpudji sok Tuhan.
Bu og duma nilon nok pinirisu,
minginongog dinilon.
26 Sunoy pa,
miglinug na nong mopagas boyaan mikuyung ok piindogan nok pirisuhan koyon.
Bu sododuun mibukaꞌ og lam nog bongowan bu miawaꞌ ong mga kodina nong mga pinirisu.
27 Dangan mitanud ong mogogipat koyon,
mitongowin nong mibukaꞌ na og lam nog bongowan.
Dadi binogdutin ok kalisin poꞌ mongogotan bosiya yanin.
Poꞌ baluꞌ in dun mikolaguy na ong mga pinirisu.
28 Tibuwa ginasudan yanin ni Pol,
“Diꞌ nu mulahon og ginawa-baran nu,
poꞌ dini ami da kotanan.”
29 Tubus mingoni ong mogogipat koyon nok tiyow bangka pogdaliꞌ-daliꞌ sumolod.
Limuhud yanin nong mingongkog dunut gondokin sog gadapan niloꞌ Pol bug Silas.
30 Piluwasin ilon bangka sakoy,
“Mga Tuwan,
olo ok sumboy inangon ku bagun ku moawon?”
31 Ok tabal nilon,
“Tombaꞌ a sok Panghuꞌ Isa,
bu moawon ka sampoy og gampuꞌ baloy nu.”
32 Tubus sinuksug niloꞌ Pol diyanin ok Parman nok Tuhan bu sog lam nog diyalom baloyin.
33 Inalap ilon nong mogogipat koyon sog waktu nog gobi niyon bangka nin ugasoy ong mga gangol nilon.
Bu sododuun piliguꞌ yanin dunut nong mga gampuꞌ baloyin.
34 Doksuꞌ inoyitin ilon sok tas baloyin bangka nin ilon botangoy nok kan,
bu migloliyag yanin sampoy og gampuꞌ baloyin nok tinumombaꞌ na ilon sok Tuhan.
35 Poglogondow,
sinuguꞌ nong mga monghuhukum ong mga pulis mangoy dituꞌ song mogogipat nok pirisuhan,
taluꞌ nilon,
“Poluwas nu na ong mga tow kituꞌ.”
36 Na sinuksugan nong mogogipat siloꞌ Pol,
taluꞌ in,
“Miksuguꞌ na ong mga monghuhukum nok poluwason amu na.
Dadi luwas amu na bu mura-murahan mosannang da ok panow niyu.”
37 Sugaid miktaluꞌ si Pol song mga pulis,
“Manu maꞌ niyon ma?
Linakpos ami sok kodakolan nok tow bangka pa pilakoy sog diyalom nok pirisuhan nog daꞌ ami pa tanan kohukum.d
Sokaliꞌ ningkomun maꞌ hantang nog buni ok pokpoluwas dinami.
Na diꞌ mogdadi,
sumboy mangoy dini ong mga monghuhukum mokpoluwas dinami,
poꞌ ami kini sakup da sop sok pomarinta nog Rum.”
38 Na sinuksug nong mga pulis song mga monghuhukum ok pasal niyon,
bu miondok ilon dangan kiosunan nilon nok siloꞌ Pol bug Silas sakup nok pomarinta nog Rum.
39 Dadi minangoy ilon mongoni nok koampunan dinilon.
Tubus inoyit nilon lumuwas og duwaꞌ kotow koyon bangka nilon pongonihoy nog gonatan nilon na ok siyudad koyon.
40 Dadi mikoluwas na siloꞌ Pol bug Silas sok pirisuhan,
bangka nilon angoyoy siloꞌ Lidya.
Dangan mitongow nilon ong mga moktotombaꞌ nong miglumpuk diyon,
pipagon nilon ok pongandol nong mga pigilugan nilon koyon bangka ilon gonat.