Si Pol bu si Barnabas sog Bonuwa Ikoniyum
14
Na sog bonuwa Ikoniyum koyon,
sinumolod si Pol bug Barnabas sog baloy poksumbahan nong mga Yahudi mokposampoy nong mamaꞌ da sop nog ininang nilon sog Antiyok.
Dadi ok kodoksuanin,
modakol tokodoy ong mga Yahudi bug mga len nog bangsa ok tinumombaꞌ ni Isa.
2 Sugaid ong mga Yahudi nog ondaꞌ tombaꞌ ni Panghuꞌ Isa,
piktungihan nilon ong mga len bangsa bagun molingit song mga moktotombaꞌ.
3 Na miobon siloꞌ Pol bug Barnabas diyon,
bu miktaluꞌ ilon nong motowakkal pasal sok kolasa-kololat nok Panghuꞌ.
Sinaksian nok Panghuꞌ nong mosobonnal ok pisampoy nilon biyanan sok pogbogoyin dinilon nok kowasa bagun moinang ong mga gindanan nong mokosobuꞌ-sobuꞌ.
4 Tibuwa ong mga tow sok siyudad koyon,
mibahagiꞌ ok pikilan nilon.
Og duma linumampiꞌ song mga Yahudi,
bu og duma linumampiꞌ song mga mokpoposampoy.
5 Na miksipi ong mga len bangsa bug mga Yahudi sampoy ong mga kounutan nilon nok posakitan bu batuhon siloꞌ Pol.
6 Sugaid kiosunan nilon ok pasal niyon,
bu milaguy ilon posunguꞌ sog Listra bug Derbe,
ong mga siyudad nog bonuwa Likoniya bu sog lumibut nog bonuwa koyon.
7 Pidayun nilon diyon ok pokposampoy nong Mobais nok Suksugan pasal ni Isa.
Siloꞌ Pol sog Bonuwa nog Listra
8 Na sog bonuwa Listra,
ongon ok tow nong mogingkud na hadja.
Og daday na yanin tidu pa sok kobataꞌ dun,
bu daꞌ yanin sibon pokopanow.
9 Minginongog yanin nok pinaluꞌ ni Pol.
Dangan linonglongan yanin ni Pol,
mitongowin nog ongon ok pongandol nok tow koyon bagun kulian.
10 Dadi miktaluꞌ yanin nong mopagas,
“Indoga nong mologdong.”
Na limoksu mindog ok tow koyon bangka panow.
11 Poktontong nong mga tow song miinang ni Pol,
migekesan ilon sok ponaluon nilon nog Likoniya.
Taluꞌ nilon,
“Ong mga tuhan ta niyu,
minonog dini dinita migbayuꞌ-bayuꞌ nok tow!”
12 Iningalanan nilon si Barnabas nok Seyus,
bu si Pol sop,
iningalanan nilon nog Hermesa,
poꞌ yanin ok kounutan nong mokpoposampoy.
13 Na og baloy poksumbahan nok tuhan-tuhan nilon nok si Seyus,
diyon da sog luwasan nok siyudad.
Dadi migoyit og gimam diyon nok sapiꞌ taga bulingkus nog bulak dituꞌ sog bongowan nok siyudad,
poꞌ meleg yanin mokkurban dunut mga tow posunguꞌ song mga mokpoposampoy kini nok siloꞌ Pol bug Barnabas.
14 Sugaid dangan midongog koyon niloꞌ Pol bug Barnabas,
ginodit nilon og dogdoy nilon poꞌ daꞌ ilon kosulutoy.
Migdaliꞌ ilon mangoy sog lumpukan nong mga tow dunut poglosik.
15 Ok taluꞌ nilon,
“Mga pigilugan nami,
manu monginang amu maꞌ nini?
Ong manusiyaꞌ ami da sop mamaꞌ diniyu.
Mikposampoy ami diniyu nong Mobais nok Suksugan nok sumboy tolikudan niyu na ong maꞌ nini nog ginang nog daꞌdun polosuddahanin,
bangka amu pogunut sok Tuhan ok totubuꞌ solama-lama.
Poꞌ yanin ong migimung nog langit bug lupaꞌ,
dagat bug lam nog diyon.
16 Song miniyan nong mga pangkatan,
pitiyanganin ong mga kobangsa-bangsahan nong migunut sok kolegan nilon.
17 Tibuwa bisan maꞌ nituꞌ modakol og binogoy nok Tuhan bagun mokokilala amu diyanin,
poꞌ pibaisanin amu bu binogoyanin amu nog dupiꞌ tidu sog langit bug mga bunga kayu sok timpu nin.
Piduhulanin amu nok kan bu pinonuꞌ in nog loliyag ok pongatoyan niyu.”
18 Sok tinaluꞌ niloꞌ Pol koyon,
agon-agon nilon diꞌ kosaggaan ong mga tow mokkurban posunguꞌ dinilon.
19 Tubus ongon ong mga Yahudi nong minatong diyon tidu sog Antiyok bug Ikoniyum,
bangka nilon poktungihoy ong mga tow.
Dadi binatu nilon si Pol bangka guyudoy sog luwasan nok siyudad,
poꞌ baluꞌ nilon dun,
minatoy na.
20 Sugaid dangan piglibutan yanin nong mga mulid,
migbuwat yanin bangka solod sok siyudad.
Bu poksunud gondow,
minangoy ilon ni Barnabas sog bonuwa nog Derbe.
Ok Pokpuliꞌ niloꞌ Pol sog Bonuwa Antiyok sok Siriya
21 Dangan mignasihat siloꞌ Pol bug Barnabas nong Mobais nok Suksugan sok siyudad koyon,
bu modakol ong miimung nilon nong mulid ni Isa,
mikpuliꞌ ilon sog Listra,
sog Ikoniyum bu sog Antiyok.
22 Pipagon nilon ok pongatoyan nong mga mulid,
bu pipagas nilon bagun diꞌ ilon kobolongan nok kopongandol.
Mitaluꞌ nilon da sop,
“Sumboy miyan ita pa sog ginis-ginisan nok poksuloy sok poksolod ta sok Pomarintahan nok Tuhan.”
23 Na mikopiliꞌ na ilon nong mogmokogulang sok sosuku nog jomaa nong mga moktotombaꞌ dunut pongoni-ngoni bug puwasa nilon.
Bu inuwakil nilon ong mga piniliꞌ koyon sok Panghuꞌ,
ok tinombaan nilon.
24 Doksuꞌ miniyan si Pol bu si Barnabas sok probinsiya Pisidiya bangka ilon angoy sok probinsiya nok Pampilya.
25 Dangan miposampoy nilon na ok Parman sok Perga,
minangoy ilon posunguꞌ sog Attalya.
26 Bu tidu sog Attalya,
miglayag ilon posunguꞌ sog Antiyok,
ok piktiduhan nilon tagnaꞌ.
Og Antiyok kini,
og bonuwa bug ayin ilon pingoni-ngonihan tagnaꞌb.
Inuwakil ilon sog waktu koyon nong mga moktotombaꞌ sok kolasa-kololat nok Tuhan para sog ginang nong midoksuꞌ na nilon inangon.
27 Pogdatong nilon,
linimud nilon ong mga moktotombaꞌ,
bu piosun nilon og lam nog ininang nok Tuhan biyan dinilon.
Sinuksug sop nilon ok pasal song mga tow nok kanaꞌ Yahudi nog binukaan nok Tuhan ok pongatoyan nilon bagun ilon tumombaꞌ.
28 Tubus migonong ilon sog Antiyok nong mobon dunut mga duma mulid ni Isa.