Pipolaguy nong Malaikat si Petros sok Pirisuhan
12
Na song masa sop nituꞌ,
miktagnaꞌ si Datuꞌ Heroda mominsanaꞌ song mga duma nong moktotombaꞌ.
2 Pipatoyin sok kalis si Yaꞌkubb,
og gilug ni Yahiya.
3 Dangan mitongowin nok kisulutan dun ong mga Yahudi,
pisaggowin sop si Petros.
Misolabu koyon sog waktu nog Halilaya Pokkan nok Pan nog daꞌdun ok Posuliginc.
4 Na dangan miposaggow na ni Datuꞌ Herod si Petros,
pipirisu nin bangka nin poipatoy nok pat tumpuk nok sundalu nok pat-pat kotow ok sotumpuk dun.
Ong maksud ni Herod,
pogdoksuꞌ nog Halilaya,d
poadaponin si Petros sok kodakolan nok tow bangka hukumoy.
5 Dadi dituꞌ na si Petros sok pirisuhan,
sugaid og jomaa nong mga moktotombaꞌ,
mingoni-ngoni mahatul sok Tuhan para diyanin.
6 Na sog gobi nok poglomaon na ok poghukum ni Petros,
mitulug yanin sog lot nog duwaꞌ kotow sundalu.
Inikotan yanin nog duwaꞌ buk kodina,
bu ongon pa ong mga migjaga diyanin sog bongowan nok pirisuhan.
7 Sunoy pa,
timuwaꞌ na ong malaikat nok Tuhan,
bu kidolagan nok sahaya ok pirisuhan.
Dinapiꞌ-dapiꞌ in si Petros sok kilidan bagun motanud,
bangka poktaluꞌ,
“Pogdaliꞌ a mogbuwat.”
Sododuun mitangsuꞌ ok kodina sok komotin.
8 Doksuꞌ tinaluan yanin nong malaikat,
“Poksobitan ka bangka nu solug ok tolumpaꞌ nu.”
Na ininang ni Petros.
Tinaluan na sop yanin,
“Solug nu og juba nu bangka a pogunut dinakon.”
9 Dadi limuwas si Petros bangka pogunut diyanin.
Daꞌ in kosayuhoy og ininang nong malaikat kituꞌ motud hatiꞌ,
sugaid ong niyatin dun,
ok toginop da.
10 Dangan kibiyanan nilon na ong mikuna bug ikoduwaꞌ nong mga mogjojaga,
mikodopot na ilon sog bongowan nog bosi nok posunguꞌ sok siyudad.
Mibukaꞌ sala-sala nin,
bangka ilon luwas,
bu miniyan ilon sok solobuk dalan.
Tubus ginonatan mogdayun yanin nong malaikat.
11 Poggonatin dun,
bangka pa pokosayu si Petros,
bu taluꞌ in,
“Mitantu u na ningkomun nok pinoyit nok Panghuꞌ ong malaikatin bu tinabanganin akon tidu ni Datuꞌ Herod bu tidu sog lam nog dinodamahan nong mga Yahudi.”
12 Pagga mikosayu na,
minangoy yanin sog baloy ni Mariam,
og ginaꞌ ni Yahiya,
og iningalanan nong Markus.
Kisolabuhanin nong modakol nong mga tow miglumpuk mongoni-ngoni dituꞌ.
13 Poktoktok ni Petros sog bongowan nog galad,
minangoy dituꞌ ok sosuguon,
nong ngalanin Roda,
bangka poksak bug sima koyon.
14 Dangan kiosunanin ok tingog ni Petros,
daꞌ in na tanan kobukaoy kobalan nog loliyagin.
Ginumobok yanin puliꞌ sog diyalom baloy bangka pokposun nog diyon na si Petros migbagad sog bongowan.
15 Taluꞌ nilon diyanin,
“Sayu a da taꞌ koyon?”
Sugaid tinogolin tokodoy nok si Petros dodaꞌ.
Taluꞌ nilon,
“Ong malaikatin laꞌ kituꞌ!”
16 Tibuwa si Petros sigi-sigi da monoktok,
bu dangan binukaꞌ na nilon,
mitongow nilon yanin bu misobuꞌ ilon.
17 Doksuꞌ sininyasanin ilon nog diꞌ mogbukag,
bu sinuksuganin ilon bug ponoy ok pokpoluwas diyanin nok Panghuꞌ sok pirisuhan.
Taluꞌ in,
“Suksugan niyu si Yaꞌkube bug mga pigilugan ta niyu nok pasal nini.”
Tubus ginumonat yanin bangka angoy sog len bonuwa.
18 Poksisolom,
misasow ong mga sundalu bug olo na ok kiposunguan ni Petros.
19 Dadi piponontong yanin ni Datuꞌ Herod.
Dangan daꞌ na dodaꞌ yanin kotongow,
sinumoriyahanin ong mga migjaga bangka nin suguoy popatoy.
Tubus nituꞌ ginumonat si Datuꞌ Herod sog Yahudiya,
bangka yanin angoy dituꞌ sog bonuwa Sesareya,
bu dituꞌ yanin migonong.
Ok Kopatoy ni Datuꞌ Herod
20 Na si Datuꞌ Herod kini,
kilingitanin tokodoy ong mga tow Tirus bug Sidon,
dadi miksolobuk og duwaꞌ buk bonuwa kini mangoy diyon diyanin.
Pogdoksuꞌ sinupali nilon si Blastus,
ok sosuguon ni Datuꞌ Herod nok pingandolanin.
Pingoni nilon nong moksulut na ilon,
poꞌ ok kan sog bonuwa nilon,
miktidu sog bonuwa ni Datuꞌ Herod.
21 Dadi sog gondow nog ginantaꞌ nilon,
sinolug ni Datuꞌ Herod og juba nin nok pogdatuꞌ,
bangka ingkud sog gingkudanin.
Tubus miktaluꞌ yanin song mga tow.
22 Pogdoksuꞌ in moktaluꞌ,
migekes ong mga tow,
taluꞌ nilon,
“Ok tingog koyon nok tuhan,
kanaꞌ nok tow.”
23 Sododuun pidatongan nong malaikat nok Tuhan nok kobinsanaan si Datuꞌ Herod,
poꞌ tinabukin ok pudji nok para bosiya sok Tuhan.
Dadi kinan nog gulod og lawasin bangka pa patoy.