Ok Pokpotampal ni Petros song mga Moktotombaꞌ
11
Na midongog nong mga mokpoposampoy bug mga pigilugan nog dituꞌ sog Yahudiya,
nok tinolimaꞌ da sop nog len bangsa ok Parman nok Tuhan.
2 Sugaid poktukad ni Petros sog Jerusalem,
sinilaꞌ yanin nog duma nong mga moktotombaꞌ Yahudi,
ong mga migunut tokodoy sok saraꞌ nilon,
3 taluꞌ nilon diyanin,
“Manu minangoya ma song mga tow nog ondaꞌ koislam bangka salu dinilon kuman?”
4 Dadi pisabutan ilon ni Petros tidu sok tolipunan,
5 taluꞌ in,
“Dituꞌ u sok siyudad nog Yoppa.
Na soliyan ku mongoni-ngoni sok Tuhan,
kibolongan ku nok sayu,
bu mitongowu sok ponontongon nog ongon ong mamaꞌ nok kayab mosolag tidu sog langit pibabaꞌ sok pat pidjulu nin posunguꞌ dinakon.
6 Tinontongu kituꞌ mahatul bu mitongowu ong mga binatang talun bug ingod,
mga mopanow bug mokponanap sampoy mga komanuk-manukan.
7 Puwas nituꞌ mikodongogu nok tingog miktaluꞌ dinakon,
‘Pogbuwata Petros,
poksumbaliꞌ a bangka a kan.’
8 Tibuwa taluꞌ u,
‘U Tuhan,
ondiꞌ u,
poꞌ daꞌ u pa sibon kan nog haram.’
9 Tinumabal na sop ok tingog kituꞌ tidu sog langit,
‘Diꞌ nu haramon ong mga hinalal nok Tuhan.’
10 Tolu kali kituꞌ kopuliꞌ-pulioy,
bu inoyit na puliꞌ sog langit og lam nituꞌ.
11 Sunoy pa ongon ok tolu kotow minatong sok pigdukonan nami,
piangoy ilon dinakon tidu sok Sesareya.
12 Tubus tinaluan ku nog Ruh nok Tuhan nog diꞌ u mogduwaꞌ-duwaꞌ mogunut dinilon.
Inunutan ku da sop nong nom kotow pigilugan ta kini,
bu simolod ami sog baloy nok tow nok pigingalanan nok Korneliyos.
13 Sinuksugin dinami bug ponoy ok kotongowin nong malaikat nong migindog sog baloyin bu miktaluꞌ ‘Pokpangoya nong mga tow sog Yoppa,
bagun potawagon si Simon nog iningalanan Petros.
14 Mokposampoy yanin diniyu nog lapal nong mokoawon dinika sampoy ong mga tow sog diyaloman nu.’
15 Poktagnaꞌ u hadja moktaluꞌ,
sinolod ilon nog Ruh Mahasutsi,
mamaꞌ nog dinita kituꞌ tagnaꞌ.
16 Bu mipondomu ok tinaluꞌ nok Panghuꞌ,
‘Si Yahiya,
piliguꞌ in ong mga tow biyan sok tubig,
tibuwa amu,
poliguon amu biyan sog Ruh nok Tuhana.’
17 Dadi bilaꞌ binogoyan ilon nok Tuhan nog Ruh nin mamaꞌ nog binogoyin dinita dangan timombaꞌ ita ni Panghuꞌ Isa Al-Masih,
sima u buwan nok sumaggaꞌ sok Tuhan?”
18 Dangan midongog nilon koyon,
limotaꞌ ilon mogdang bu piotas nilon ok Tuhan,
taluꞌ nilon,
“Dinuhul da sop nok Tuhan song mga len bangsa ok poktowbat bagun koongonan ilon nok kotubuꞌ solama-lama.”
Ong mga Moktotombaꞌ ni Isa Al-Masih sog Antiyok
19 Na ong mga mikanat kituꞌ sabap sok ponglaat nok simugat sog waktu nok pinatoy si Istepan,b
minangoy ilon song mga mokolayuꞌ nog bonuwa,
mamaꞌ na nok Ponikiya,
Kipros bug Antiyok.
Tibuwa daꞌdun ok pisampoyan nilon nong Mobais nok Suksugan pasal ni Isa,
luwal song mga Yahudi.
20 Sugaid ongon dinilon ong mga tow tidu sok Kipros bug Kirene nong minangoy sog Antiyok,
bu mignasihat ilon da sop pasal ni Panghuꞌ Isa song mga kanaꞌ Yahudi.
21 Ok kowasa nok Tuhan dituꞌ dinilon,
bu modakol tokodoy ong mga tow nok timombaꞌ bu migunut sok Panghuꞌ.
22 Na og dongogan pasal song mikobiyan sog Antiyok,
mikosampoy sog jomaa nong mga moktotombaꞌ ni Isa dituꞌ sog Jerusalem,
bu piangoy nilon dituꞌ si Barnabas.
23-24 Dangan minatong yanin bu mitongowin bug ponoy ok solag nok kolasa bug kololat nok Tuhan dinilon,
linoliyag yanin.
Si Barnabas kini ong mobais nok tow nok pigbayaan nog Ruh Mahasutsi,
bu miponuꞌ yanin nok kotombaꞌ.
Saan na pinituwahanin tokodoy ilon nok sumboy tattap sok pongatoyan nilon ok kotombaꞌ nilon ni Panghuꞌ Isa.
Dadi modakol nok tow ong midungag moimung mogogunut sok Panghuꞌ.
25 Doksuꞌ minangoy si Barnabas sok Tarsus poꞌ ponontongonin si Sol.
26 Dangan mitongowin,
inoyitin sog Antiyok,
bu sotahun ilon mogdunut bug moglumpak song mga tow diyon nong moktotombaꞌ ni Isa.
Minintuluꞌ ilon song modakol tokodoy nok tow.
Ong mga moktotombaꞌ ni Isa dituꞌ sog Antiyok,
yonin na ong mikuna tawagon nog Almasihin,
ok sukuꞌ nog Al-Masih.
27 Na sog waktu sop koyon,
ongon ong mga nabi nong minatong sog Antiyok nok tidu sog Jerusalem.
28 Ok solokotow dinilon nok pogingalanan nog Agabus,
minindog bangka pokpodinsamaꞌ moktaluꞌ biyan sog Ruh Mahasutsi nog ongon matong nong mosolag nok ponggutom sok kobonuwahan.
Miunut koyon song masa ni Sultan Kalawdi.