Ok Koimung ni Sol nong Mulid ni Panghuꞌ Isa
9
Na si Sol kini,
lolayun da moksad nok pomatoyonin ong mga mulid nok Panghuꞌ.
Dadi minangoy yanin sok kinotasan nog gimam.
2 Mingoni yanin nong mga sulat para song mga baloy poksumbahan nog Yahudi sog Damaskus,
bagun bilaꞌ mokobalak yanin dituꞌ nong mga mogogunut sok ponintuluꞌ ni Isa,
mosaggowin bu moyitin sog Jerusalem.
3 Na mipanow na yanin,
bu dangan molani na yanin sog Damaskus,
sunoy pa sinumahaya diyanin og ligaꞌ tidu sog langit.
4 Mibuksak yanin sog lupaꞌ,
bu mikodongog yanin nok tingog miktaluꞌ diyanin,
“Sol,
Sol,
manu pigbinsanaꞌ nu ma akon?”
5 Taluꞌ ni Sol,
“Sima a buwan,
Panghuꞌ?”
Ok tabalin,
“Akon si Isa,
ok pigbinsanaꞌ nu.
6 Sugaid pogbuwata,
bangka a pogdayun sok siyudad.
Ongon da ong moktaluꞌ dinika dituꞌ bug olo og inangon nu.”
7 Na ong mga tow nog dunut ni Sol,
diyon da migindog bu daꞌdun og gonek nilon.
Mikodongog ilon nok tingog,
sugaid daꞌdun ong mitongow nilon.
8 Tubus migbuwat si Sol,
sugaid pogbuladin,
diꞌ na yanin mokotongow.
Dadi inambit yanin nong mga dunutin bangka nilon oyitoy sog Damaskus.
9 Sog bon nok tolu ondow,
diꞌ yanin mokotongow,
bu daꞌ na yanin kan bu inum.
10 Na ongon ong mulid ni Panghuꞌ Isa sog Damaskus,
ong ngalanin Ananiyas.
Tinaluan yanin nok Panghuꞌ biyan sok ponontongon,
longin,
“Ananiyas.”
Ok tabalin,
“Kini u da,
Panghuꞌ.”
11 Taluꞌ nok Panghuꞌ diyanin,
“Pogbuwata bangka a angoy sog dalan kituꞌ pogingalanan nong Mologdong.
Poksaka dituꞌ sog baloy ni Yahud pasal sok tow Tarsus,
ong ngalanin si Sol,
poꞌ soliyanin mongoni-ngoni.
12 Mitongowin biyan sok ponontongon ok tow nong ngalanin Ananiyas nok sinumolod bangka yanin doponoy bagun mokotongow yanin puliꞌ.”
13 Sugaid ok tabal ni Ananiyas,
“Panghuꞌ,
midongogu song modakol nok tow ok pasal sok tow koyon,
bug ponoy kolaat ok pinginangin song mga sinutsi nok sukuꞌ nu dituꞌ sog Jerusalem.
14 Minangoy yanin dini taga kopatut tidu song mga kounutan nok koimaman bagun saggowon og lam nok sumabbut song ngalan nu.”
15 Tibuwa ok taluꞌ nok Panghuꞌ diyanin,
“Angoya na dituꞌ,
poꞌ yanin ok piniliꞌ u mokposampoy pasal dinakon song mga tow nong mga len bangsa,
bu song mga sultan sampoy song mga tow Israel.
16 Potongowon ku diyanin ong mga kobinsanaan nok kobiyananin sabap sok kopogunutin dinakon.”
17 Dadi inangoy ni Ananiyas si Sol sog baloy nok pigdukonanin bangka nin doponoy,
bu taluꞌ in,
“Sol,
gilugu,
si Panghuꞌ Isa nong mikpotongow dinika sog dalan pokposunguꞌ nu dini,
piangoyin akon dini bagun mokotongowa puliꞌ bu bagun solodon ka nog Ruh nok Tuhan.”
18 Na sododuun,
ongon ong milabuꞌ tidu song mata ni Sol mamaꞌ nog gunap,
bu mikotongow na yanin puliꞌ.
Dadi migbuwat yanin bangka piliguꞌ,
og gindanan nok sukuꞌ na yanin nog Al-Masih.
19 Doksuꞌ kinuman yanin,
bu linumasig na yanin puliꞌ.
Mikposampoy si Sol sog Damaskus
Miglihan pa si Sol mga sanu ondow song mga mulid ni Isa dituꞌ sog Damaskus.
20 Sododuun mikposampoy si Sol song mga baloy poksumbahan (Yahudi) nok si Isa og Bataꞌ nok Tuhan.
21 Misobuꞌ og lam nong mikodongog diyanin,
taluꞌ nilon,
“Kanaꞌ taꞌ ok tow koyon ong minglaat song mga tow nong moksabbut song ngalan ni Isa Al-Masih dituꞌ sog Jerusalem?
Bu ong maksudin mangoy dini,
bagun saggowonin ilon,
bangka oyitoy sog gadapan nong mga kounutan nok koimaman.”
22 Tibuwa migdodungag ok kokosun ni Sol mognasihat,
bu diꞌ na mokatu ong mga Yahudi moglugat diyanin.
Poꞌ mipotongowin dinilon biyan song mga pokpomotud nok si Isa og Al-Masih,
ok piniliꞌ kituꞌ.
23 Dangan miobon-obon na,
piksipihan nong mga Yahudi nok patoyon nilon si Sol.
24 Pogapaan nilon yanin gobi-gondow song mga bobiyanan lumuwas tidu sok siyudad bagun nilon mobunuꞌ.
Sugaid kiosunan ni Sol ok poksipi nilon.
25 Dadi solobuk gobi,
inalap yanin nong mga mulid,
bangka nilon ungodoy sok tobungusa,
doksuꞌ tinontun nilon sok sobolaꞌ nog galad nok siyudad koyon.b
Ok Pokpuliꞌ ni Sol sog Jerusalem
26 Na dangan minatong si Sol sog Jerusalem,
migmuhut-muhut bosiya yanin mampuꞌ song mga mulid,
sugaid miondok ilon.
Poꞌ daꞌ ilon tombaꞌ nong mulid da sop yanin.
27 Tibuwa tinabangan yanin ni Barnabas bangka nin oyitoy song mga mokpoposampoy.
Sinuksugin dinilon bug ponoy ok kotongow ni Sol nok Panghuꞌ sog dalan,
bu tinaluan yanin.
Miksuksug sop si Barnabas bug ponoy ok kotowakkal ni Sol mognasihat pasal ni Isa dituꞌ sog Damaskus.
28 Dadi piampuꞌ nilon na si Sol.
Moluhaya yanin mogdunut-dunut song mga moktotombaꞌ sog Jerusalem,
bu motowakkal yanin mokposampoy tidu sok kopatut nog inuwakil diyanin nok Panghuꞌc.
29 Migabit-abit yanin,
bu linugatin ong mga Yahudi nog bahasa nin Grik,
sugaid piksipihan nilon yanin patoyon.
30 Dangan kiosunan koyon nok pigiluganin sok kotombaꞌ ni Isa,
inoyit nilon yanin dumiksun sok Sesareya,
bangka nilon yanin pangoyoy sok Tarsus.
31 Tubus nituꞌ mikkosannangan na ong mga sukuꞌ ni Isa Al-Masih sog bonuwa Yahudiya,
Jalil bug Samariya.
Migogondok ilon sok Tuhan,
bu tidu sok tabang nog Ruh Mahasutsi,
miksipagas bu miksidakol na ilon.
Ong Miinang ni Petros song mga Bonuwa Lidda bug Yoppa
32 Na si Petros,
milatagin ong mga kobonuwahan,
bu mikosaut sop yanin song mga sukuꞌ nok Tuhan sog bonuwa Lidda.
33 Mibalakin dituꞌ ok tow ngalanin Aneyas.
Yanin kini,
og daday bu walu tahun na yanin migbolilid sog gikamin.
34 Na tinaluan yanin ni Petros,
“Aneyas,
binulunga na ni Isa Al-Masih.
Pogbuwata na bangka nu lulun og gikam nu.”
Sododuun migbuwat yanin.
35 Mitongow yanin nog lam nong migonong sog Lidda bug Saron,
bu migunut ilon sok Panghuꞌ.
36 Na sog bonuwa Yoppa,
ongon ok solobuk mulid nog libun,
ong ngalanin Tabita,
bilaꞌ sog bahasa Grik,
Dorkas,
ong maana nin gusa.
Lolayun yanin monginang nong mobais bu monodokka song mga miskinan.
37 Sog waktu koyon,
milongkoꞌ yanin bangka patoy.
Pogdoksuꞌ nilon liguoy og bangkoyin,
binotang nilon sog bilik sog ikoduwaꞌ pangkat.
38 Na og bonuwa nog Yoppa molani da sog Lidda.
Dangan midongog nong mga mulid sog Yoppa nok si Petros diyon sog Lidda,
sinuguꞌ nilon og duwaꞌ kotow nok tugunon yanin mangoy dinilon nong mosompun.
39 Dadi migunut si Petros dinilon.
Pogdatong nilon,
inoyit nilon yanin sok tas bilik.
Migaduy og lam nog balu libun nong migindog song molani nin,
bu pitongow nilon ong mga dogdoy bug len ponapot nog inimung ni Dorkas sog waktu nog diyon pa yanin dinilon.
40 Piluwas ilon kotanan ni Petros bangka yanin luhud mongoni-ngoni sok Tuhan.
Tubus inadapin og bangkoy bangka yanin poktaluꞌ,
“Tabita,
pogbuwata!”
Binulad ni Tabita ong mata nin bu dangan mitongowin si Petros,
miningkud yanin.
41 Inonggaydan yanin ni Petros sok komotin bangka nin pindogoy.
Doksuꞌ tinawagin ong mga balu libun bug mga len sukuꞌ nok Tuhan,
bu pitongowin dinilon nong mitubuꞌ na si Tabita.