Ok Poksodokka nog Balu Libun sog Baloy nok Tuhan
21
Poktongal ni Isa,
mitongowin ong mga tow dayahan mogbotang nok sin sok tuung.
2 Ongon da sop diyon solobuk balu libun miskinan nog linumabuꞌ nog duwaꞌ sinsilyu diyon.
3 Doksuꞌ miktaluꞌ si Isa,
“Taluan ku amu,
modakol pa ong mibogoy nog balu libun kini tidu sog lam nong migbogoy.
4 Poꞌ og lam nilon koyon,
og binogoy nilon og labi da nok sin nilon.
Tibuwa og balu libun miskinan kini,
tinipotin bogoyoy ok kotanan nok sinin.”
Og Waktu nok Kosigpitan nong matong posunguꞌ
5 Na og duma diyon migabit-abit pasal sog lingkat nog Baloy nok Tuhan poꞌ landuꞌ pokohalgaꞌ ong mga batu nin,
bu pilingkat sop nong mga olo-olo nog binogoy nong mga tow.
Sugaid ok taluꞌ ni Isa,
6 “Matong da og gondow ong mga mitongow niyu koyon moladak da,
bu daꞌdun ong mosamaꞌ diyon nong migbangkat-bangkat nog batu.”
7 Na miksak ong mga mulid ni Isa,
“Guru,
olo waktuhoy koyon matong,
bu olo og gindananin nok posunguꞌ na koyon moinang?”
8 Ok tabal ni Isa,
“Poghalliꞌ amu bagun diꞌ amu koakkalan,
poꞌ modakol ong mga tow nong matong bu kokoniya dinilon moktaluꞌ nog ilon dow yonin na akon.
Moktaluꞌ sop ilon nong minatong na og waktu.
Na diꞌ amu tumombaꞌ dun atawa mogunut dinilon.
9 Bu bilaꞌ mokodongog amu pasal sog bunuꞌ bug sasow,
diꞌ amu mondok,
poꞌ ong mamaꞌ niyon sumboy matong moguna.
Sugaid kanaꞌ pa sododuun ok kodoksuan nog dunya.”
10 Doksuꞌ taluꞌ pa ni Isa,
“Mogbunuꞌ og bangsa sok solobuk bangsa,
bu manta og bonuwa sok solobuk bonuwa.
11 Ongon ong matong nong mga mokopagas nog linug bug mga ponggutom bug mga ponakit sok kobonuwahan.
Ongon sop ong motongow niyu nong mokondok-ondok bu mokosobuꞌ-sobuꞌ nog gindanan sog langit.
12 Tibuwa sog diꞌ pa koyon moongon,
saggowon amu nong mga tow bu mobinsanaꞌ amu.
Oyiton amu song mga baloy poksumbahan bangka amu hukumoy bu pirisuhon.
Madap amu song mga sultan bug mga kounutan nok parinta pasal sok pogunut niyu dinakon.
13 Na yonin koyon og waktu niyu monuksug dinilon pasal dinakon.
14 Tibuwa pondom niyu nog diꞌ amu mosusa bug olo ok poksugut niyu sog daꞌ pa datong og waktu nin.
15 Poꞌ bogoyan ku amu nok kokosun moktaluꞌ,
dadi diꞌ mokotabal atawa mokosaggaꞌ ong mga banta niyu dun.
16 Sumbungon amu nong mga mokogulang niyu,
gilug niyu,
lahasiyaꞌ niyu bug mga supali niyu,
bangka amu wakiloy sok parinta,
bu ongon diniyu ok patoyon nilon.
17 Dumutan amu nog lam nok tow sabap dinakon.
18 Sugaid diꞌ amu mosusa,
poꞌ daꞌdun bisan sobalu nog buk niyu nong monarkaꞌ.
19 Bilaꞌ mokotiggol amu sok kotombaꞌ,
ok koposunguan niyu ong mosannang nok kotubuꞌ solama-lama.”
Ok Pogladak nog Jerusalem
20 Taluꞌ pa ni Isa,
“Na bilaꞌ motongow niyu og Jerusalem linibutan na nong modakol tokodoy nok sundalu,
kosunan niyu na nok posunguꞌ na moladak.
21 Dadi sog waktu koyon sumboy molaguy na ong mga tow sok probinsiya nog Yahudiya sok kobontudan,
bu ong mga tow sog diyalom Jerusalem sumboy na mawaꞌ.
Bu ong mga tow nog dituꞌ sok kobukidan,
diꞌ na ilon sumolod sok siyudad.
22 Poꞌ yonin na koyon og waktu nok pogmulkaan nok Tuhan og bonuwa kini,
bu og lam nong misulat sok Kitaba mounut na sog waktu niyon.
23 Mokololat-lolat ong mga bodos bug mga mikpoduduꞌ nog bataꞌ in sog waktu niyon,
poꞌ mosolag tokodoy nong mulkaꞌ ong matong song mga tow dini.
24 Og duma nong mga tow,
tigbason nok kalis,
bu og duma mosaggow,
imungon nog gulipon,
bu oyiton sog len-len bonuwa.
Og Jerusalem kini pogbayaan na nok kobangsa-bangsahan.
Dodjak-dodjakan nong mga len bangsa ok siyudad kini bug mga towin sog bon nog diꞌ modoksuꞌ og waktu nog binogoy dinilon nok Tuhan.
Ok Pokpuliꞌ nog Bataꞌ nong Manusiyaꞌ sog Dunya
25 Na ongon ong mga gindanan nong mokosobuꞌ-sobuꞌ nok sumugat sog gondow,
bulan bug mga bitun.
Mosolag nok kosusahan ong matong dini sog dunya bu landuꞌ og gondok nong mga tow pasal sog dogus nong mosolag nong nabok.
26 Punungon ong mga tow pasal sog gondok nilon song minatong nok kobinsanaan sog dunya pasal mokuyung na og olo-olo sok tas langit.
27 Na motongow nok kotanan nok tow ok pokponog nog Bataꞌ nong Manusiyaꞌ sog gabun dunut landuꞌ kowasa bug sahaya.
28 Na bilaꞌ tumagnaꞌ na mounut ong mga tinaluꞌ u koyon,
tongal amu sok tas,
bu polasig niyu ok pongatoyan niyu poꞌ molani na ok pogawon diniyu.”
29 Doksuꞌ tinaluan ilon ni Isa biyan sok pononggiꞌ,
longin,
“Tulikoy niyu ok kayu nog higera bug mga duma nok kayu.
30 Bilaꞌ mongigbus na,
kosunan niyu na nok posunguꞌ na ok timpu pomodos.
31 Maꞌ niyon da sop,
sog waktu nong motongow niyu nong miunut ong mga pinaluꞌ u kini,
kosunan niyu na nok posunguꞌ na mopotindog ok Pomarinta nok Tuhan.
32 Na taluan ku amu,
mounut na dodaꞌ og lam nok tinaluꞌ u kini diniyu sog diꞌ pa motipot matoy ok pangkatan nong mga tow kini.b
33 Og langit bug lupaꞌ mobolong da,
sugaid ok taluꞌ u,
diꞌ mobolong solama-lama.
34 Dadi pokpotubud amu bagun diꞌ amu moyit mogbulaug,
moglangu-langu,
bu moksusa nog olo-olo sog dunya.
Poꞌ bilaꞌ maꞌ niyon sunoy kotokkowan amu nog gondow nok pokpuliꞌ u mamaꞌ sopantun nong mitaban amu nog giman nog daꞌ niyu dodamahoy.
35 Pasal ok Kiyamat matong na dodaꞌ sok kotanan nong manusiyaꞌ dini sog dunya.
36 Poghalliꞌ amu,
bu pongoni-ngoni amu nog ongon ok pagas niyu moksandal nog olo-olo nong mga matong posunguꞌ,
bagun diꞌ amu mosipog madap dinakon,
og Bataꞌ nong Manusiyaꞌ bilaꞌ matong na.”