Lukas 19

Si bu si Sakkiyas

Doksuꞌ sinumolod siloꞌ Isa sog bonuwa Ariha, poꞌ dituꞌ ilon biyan posunguꞌ sog . 2 Na ongon ok tow sog bonuwa koyon nok pogingalanan nok Sakkiyas. Ok kounutan yanin nong mga mogogalap nog bu dayahan yanin. 3 Meleg tokodoy yanin tumontong ni Isa, sugaid diꞌ yanin mokotontong poꞌ mopandak yanin bu modakol ok tow. 4 Dadi ginumobok yanin sog gunahan bangka ponek sok kayu bagun motongowin si Isa, poꞌ miyan da yanin dituꞌ. 5 Dangan mikotondong si Isa dituꞌ, timongal yanin bangka poktaluꞌ, “Sakkiyas, pogdaliꞌ a monog, poꞌ sumboy dituꞌ u pogulabung sog baloy nu.” 6 Dadi migdaliꞌ-daliꞌ si Sakkiyas monog bangka nin oyitoy si Isa sog baloyin dunut loliyagin.

7 Dangan mitongow nong mga tow, mikkumong-umong ilon, taluꞌ nilon, “Is, dituꞌ yanin minangoy sog baloy nok tow .” 8 Dangan dituꞌ na siloꞌ Isa sog baloy, minindog si Sakkiyas bangka poktaluꞌ ni Panghuꞌ Isa, “Panghuꞌ, tontong nu ba, bogoyon ku ok sotongaꞌ nog gartaꞌ u song mga tow miskin, bu bilaꞌ ongon ok tow nong mipodupangu, pat kalihon ku ok poguliꞌ dun.” 9 Miktaluꞌ si Isa diyanin, “Sog gondow kini, miawon na ok tow sog baloy kini, poꞌ si Sakkiyas, solobuk da sop ponupuꞌ ni Nabi . 10 Poꞌ akon, og minangoy dini sog dunya bagun monontong bu mogawon song mga tow nong mibolong sog dalan posunguꞌ sok Tuhan.”

Og Dalil pasal sok Tolu Kotow nok Sosuguon

11 Dangan minginongog pa ong mga tow sok taluꞌ in, sinuksugan pa ilon ni Isa biyan sok pononggiꞌ, poꞌ molani na ilon sog , bu ong niyat nong mga tow nong mopindog na sododuun ok . 12 Saan tinaluan ilon ni Isa, “Ongon solokotow nog bangsahan. Minangoy yanin song molayuꞌ nog bonuwa bagun moimung nok sultan, bangka yanin uliꞌ sog bonuwa nin moksultan. 13 Sugaid sog daꞌ pa yanin panow, tinawagin ok sopuluꞌ kotow nok sosuguonin. Binogoyanin ok sosolokotow dinilon nok sin bulawan, bangka nin taluoy, ‘Imung niyu nok puunan ok sin koyon sog bon nog daꞌ u dini.’

14 Tibuwa modakol nok tow og gampuꞌ bonuwa nin koyon molingit diyanin. Dadi dangan gimonat na yanin, sinuguꞌ nilon og duma nilon mokposun dituꞌ sog angoyanin nog diꞌ ilon meleg nong moksultan ok tow koyon dinilon. 15 Sugaid miimung da yanin nok sultan. Doksuꞌ minuliꞌ yanin sog bonuwa nin bangka nin potawagoy ong mga sosuguonin nog binogoyanin nok sin bagunin kosakan bug andun na og guntung nilon.

16 Na ong mikuna matong, miktaluꞌ diyanin, ‘Tuwan, ok sin bulawan nog binogoy nu mikuntung pa sopuluꞌ buk.’ 17 Tinumabal ok sultan, ‘Na mobais tokodoy! Mahatula nok sosuguon! Kopongandolan ka sog gartaꞌ nong mikaꞌ-mikaan. Dadi ningkomun, ika na ok pongandolan ku mogbayaꞌ sok sopuluꞌ siyudad.’

18 Tubus minatong og ikoduwaꞌ miktaluꞌ, ‘Tuwan, ok sin bulawan nog binogoy nu, mikuntung lima buk.’ 19 Na miktaluꞌ ok sultan diyanin, ‘Ika na ong mogbayaꞌ sog lima buk siyudad.’

20 Doksuꞌ minatong da sop ok solokotow bangka pomolidja moktaluꞌ, ‘Tuwan, kinya da ok sin nog binogoy nu dinakon, tinaguꞌ u sok panyuꞌ. 21 Miondoku dinika poꞌ mopipita. Mongalapa nok kanaꞌ ika ong miktiksaꞌ dun, bu ganihon nu nok kanaꞌ ika ong mimula dun.’ 22 Tinaluan yanin nok sultan, ‘Ika koyon, molaton ka nok sosuguon. Ok poghukumu dinika, alapon ku tidu sok tinaluꞌ nu dinakon, nok kiosunan nu nong mopipitu. Tinaluꞌ nu nong mongalapu nok kanaꞌ akon ong miktiksaꞌ dun, bu gumani u nok kanaꞌ akon ong mimula dun. 23 Dadi manu daꞌ nu ma botangoy sog bangku ok sin bulawan ku kituꞌ bagun pokpuliꞌ u, moalapu puliꞌ dunut tubuꞌ in?’

24 Tubus tinaluan nok sultan ong mga tow nong minindog dituꞌ, ‘Alap niyu ok sin bulawan diyanin bangka niyu bogoy sok tow nong mikuntung sopuluꞌ buk.’ 25 Tibuwa tinumabal ilon, ‘Tuwan, sopuluꞌ buk na og diyanin.’

26 Dadi tinaluan ilon nok sultan, ‘Na taluan ku amu, ok tow nog ginamitin song mobais ok pingandol diyanin, dungagan pa, sugaid sima-sima og diꞌ kopongandolan bisan pa song mikaan nog binogoy diyanin, alapon da dun. 27 Sugaid ong mga banta u nog diꞌ meleg nong mogbayaꞌ u dinilon, oyit niyu dini, bangka niyu patoy sog gadapan ku.’ ”

Ok Poksolod ni sog Jerusalem

28 Pokpuwas ni Isa moksuksug nok pononggiꞌ in, migdayun na ilon sog Jerusalem, bu miguna yanin song mga duma nin. 29 Dangan molani na ilon sog bonuwa nog Betpage bug Betani sog Bontud nog Jaytun, piangoy ni Isa og duwaꞌ kotow nong mulidin. 30 Taluꞌ in dinilon, “Angoy amu sog gumbaloyan koyon. Pogdatong niyu diyon, mobalak niyu og inikotan nong nati nog daꞌ pa sibon kopongudaoy. Ubadoy niyu bangka niyu oyit dini. 31 Bilaꞌ ongon ong moksak diniyu bug manu inubad niyu, taluan niyu nog ongon ok kobalan nok Panghuꞌ dun.”

32 Na mipanow na og duwaꞌ kotow nok sinuguꞌ ni Isa, bu mibalak nilon ong nati kudaꞌ himar mamaꞌ na nok tinaluꞌ ni Isa kituꞌ. 33 Na soliyan nilon mogubad nong nati kudaꞌ, sinakan ilon nong mga gapuꞌ in, “Manu inubadan niyu ma koyon?” 34 Ok tabal nilon, “Ongon ok kobalan nok Panghuꞌ dun.”

35 Dadi inoyit nilon ok kudaꞌ himar dituꞌ ni Isa. Pogdatong nilon, inanigan na nilon ok kudaꞌ nok ponapot nilon bangka nilon posakoyoy si Isa. 36 Soliyanin sumakoy song nati kudaꞌ himar koyon posunguꞌ sog Jerusalem, pingdondam nong mga tow ok ponapot nilon sog dalan nog biyananin, og gindanan nok pogaddat nilon diyanin. 37 Dangan posunguꞌ na yanin dumiksun tidu sog Bontud Jaytun, migloliyag og lam nong mulidin bu pipagas nilon ok tingog nilon mokpudji sok Tuhan pasal sog lam nong mokosobuꞌ-sobuꞌ nong mitongow nilon. 38 Taluꞌ nilon, “Mobarakat ok sultan nong matong nok kiwakilan nok Tuhan dini. Ningkomun moongon na ok kosannangan tidu sok Tuhan. Pudjihon ok Tuhan !”

39 Sokaliꞌ sok tumpukan kituꞌ, ongon ong mga tow miktaluꞌ ni Isa, “Tuwan Guru, pogbinaoy nu ong mga mulid nu nog lumotaꞌ ilon!” 40 Ok tabal ni Isa, “Tantu tokodoy, bilaꞌ lumotaꞌ ilon, sumukli ong mga batu moglosik mokpudji.”

Migaduy si pasal sok Koposunguan nog Jerusalem

41 Dangan molani na ilon sog Jerusalem, mitongow na ni Isa ok siyudad, bu migaduy yanin. 42 Taluꞌ in, “Anduꞌ, kolegan ku bosiya kosunan niyu na bisan sog gondow kini bug olo ong mokobogoy diniyu nok kosannangan, tibuwa kidungmaan na ok pikilan niyu. 43 Matong da og gondow nok poglibutan ok siyudad niyu nong mga banta niyu sobolaꞌ-posobolaꞌ, bu diꞌ amu tokodoy mokopolaguy. 44 Lubuhon nilon ok siyudad kini toktob nog daꞌdun mosamaꞌ dini nong migbangkat-bangkat nog batu. Bu buksakon nilon amu sog lupaꞌ bu patoyon nilon ong modakol diniyu poꞌ daꞌ niyu imakatoy og waktu nog binontow amu nok Tuhan.”

Piawaꞌ ni ong mga Migdagang sog Baloy nok Tuhan

45 Pogdatong nilon sog , sinumolod si Isa sog loma-lomahan sog diyalom Baloy nok Tuhan, bangka nin pomugowoy ong mga mogdodagang diyon. 46 Tinaluanin ilon, “Misulat sok Kitab, ‘Og baloyu, og baloy poksombahayangan,’ sugaid inimung niyu nok poksolobunihan nong mga molaat nok tow.”

47 Dadi mignasihat si Isa sog gondow-gondow. Sugaid ong mga kounutan nok koimaman, mga guru agama bug mga len kounutan, piksipihan nilon patoyon si Isa. 48 Tibuwa daꞌ pa ilon pokotongow nok pobiyan dun, poꞌ mosolag og leg nong mga tow monginongog sok ponaluon ni Isa.