Lukas 15

Ok Pononggiꞌ pasal sog Bilibili nong Mibolong

Na modakol ong mga tow nong mogogalap nog bug mga tow miglumpuk monginongog song nasihat ni Isa. 2 Sugaid mikkumong-umong ong mga bug mga guru agama, taluꞌ nilon, “Ok tow kini tumolimaꞌ song mga tow baldusa bu sumalu pa dinilon.”

3 Dadi tinaluan ilon ni biyan sok pononggiꞌ. 4 Taluꞌ in, “Sowpama ongon diniyu ok tow nok taga sogatus buk nog , doksuꞌ mibolong ok solobuk. Kanaꞌ taꞌ nog bagakonin ok siyam puluꞌ bu siyam sok talunan bangka nin ponontongoy ok solobuk nong mibolong kituꞌ sampoy song mobalakin? 5 Bu bilaꞌ mobalakin na, mogloliyag tokodoy yanin bangka nin pisanoy muliꞌ. 6 Pogdatongin sog baloy, tawagonin ong mga supali nin bug kilani baloyin, taluonin, ‘Ampuꞌ amu mogloliyag dunut dinakon poꞌ mitongowu na og bilibili u nong mibolong.’ 7 Domikkiyan da sop, taluan ku amu, landuꞌ og loliyag nilon dituꞌ sok surgaꞌ pasal sok solokotow baldusa nong miktowbat tidu sok siyam puluꞌ bu siyam nong migniyat nong mologdong ilon bu daꞌdun ok kogunahan nilon moktowbat.”

Ok Pononggiꞌ pasal sok Sin Plata nong Mibolong

8 Taluꞌ pa ni Isa, “Domikkiyan sop og libun nok taga tibuk sopuluꞌ buk, sokaliꞌ mibolong ok solobuk. Kanaꞌ taꞌ nok tutudanin ok politaan bangka nin siligoy og baloyin, tubus ponontongonin mahatul sampoy song motongowin? 9 Na bilaꞌ motongowin, mogloliyag tokodoy yanin bangka nin tawagoy ong mga supali nin bu moktaluꞌ yanin, ‘Angoy amu dini og lam niyu! Ampuꞌ amu mogloliyag dunut dinakon, poꞌ mibalaku na ok sin ku kituꞌ nong mibolong.’

10 Na taluan ku amu, mamaꞌ da sop niyon ong mga nok Tuhan, mogloliyag da sop ilon bilaꞌ moktowbat bisan ok solokotow .”

Og Gommaꞌ nong Molilolatoy bu Moliampunoy

11 Taluꞌ ni Isa, “Ongon ok tow taga bataꞌ nog laki duwaꞌ kotow. 12 Miktaluꞌ ong mongud sog gommaꞌ in, ‘Ommaꞌ, bogoy nu na dinakon og gartaꞌ nog gantaꞌ bahagiꞌ u.’ Na binahagiꞌ na nog gommaꞌ nilon og gartaꞌ in sog duwaꞌ kotow nog bataꞌ in koyon. 13 Mga sanu-sanu ondow pigdagang nog bataꞌ in nong mongud og gartaꞌ nok pinusakaꞌ diyanin, bangka awaꞌ sog baloy nilon. Pigbulaugin tibuwa ok sinin song molayuꞌ nog bonuwa.

14 Dangan mitipot na ok sinin, minatong ok ponggutom sog bonuwa koyon. Na kisigpitan tokodoy yanin. 15 Dadi minangoy yanin moginang sok tow sog bonuwa koyon. Sinuguꞌ yanin mogipat nog babuy dituꞌ sog guma nin. 16 Na ginutom na tokodoy yanin, bu meleg na bosiya yanin kuman nok kan nog babuy, poꞌ daꞌdun na tokodoy ong mogbogoy diyanin nok kan.

17 Tidu diyon, mipikilin og lam nok kodupanganin. Dadi mikopoktaluꞌ yanin sog ginawa nin, ‘Og lam nong mga tow nok tinindanan dituꞌ ni Ommaꞌ miglabi-labi ok kan nilon, sugaid akon, agon ku na matoy nog gutom. 18 Golom pa muliꞌ u na dituꞌ ni Ommaꞌ, bangka u yanin taluoy, “Ommaꞌ, mikodusa u sok Tuhan bu dinika. 19 Diꞌ u na tolopon nok tawagon nog bataꞌ nu. Tibuwa imung nu na hadya akon nok solobuk sosuguon nu.” ’

20 Dadi minuliꞌ yanin sog gommaꞌ in. Tibuwa dangan molayuꞌ pa yanin sog baloy nilon, mitongow na yanin nog gommaꞌ in, bu limolat tokodoy yanin sog bataꞌ in. Saan na gimobok yanin posunguꞌ dituꞌ sog bataꞌ in bangka nin kokopoy bu pongalokoy. 21 Tinaluꞌ in sog gommaꞌ in, ‘Ommaꞌ, mikodusa u sok Tuhan bu dinika. Kanaꞌ u na tolopon tawagon nog bataꞌ nu.’ 22 Tibuwa ondaꞌ maling-malingoy nog gommaꞌ in ok tinaluꞌ nog bataꞌ in. Tinaluanin ong mga sosuguonin, ‘Pogdaliꞌ amu, oyitan niyu yanin nog juba nong molingkat tokodoy, bangka posolugoy diyanin. Posolugoy niyu sop yanin nok pinolok bangka niyu potolumpaoy. 23 Doksuꞌ alap niyu ong nati sapiꞌ nok pisubuk ta kituꞌ bangka niyu sumbalioy poꞌ mogjamu ita. 24 Poꞌ ong niyatu nong minatoy na og bataꞌ u kini, sokaliꞌ totubuꞌ doma saan. Bakas yanin mibolong, sugaid mikotuwaꞌ da suusa.’ Dadi migjamu ilon.

25 Na sok kodatongin kituꞌ, dituꞌ pa og gulang bataꞌ in sog guma. Dangan minuliꞌ na og gulang bataꞌ koyon, midongogin na og gagung bug kulintang bu poksayaw nong mga tow sog baloy nilon. 26 Saan na sinabi nin ok solokotow nok sosuguon bangka nin sakoy, ‘Migolo amu sog baloy?’ 27 Taluꞌ nok sosuguon, ‘Og gilug nu minatong na. Dadi pisumbaliꞌ na nog gommaꞌ nu ong mosubuk nong nati sapiꞌ, poꞌ minatong yanin nong mobais.’

28 Na milingit og gulang bataꞌ, bu diꞌ yanin meleg menek sog baloy, dadi inangoy nog gommaꞌ in bangka nin amuꞌ-amuoy. 29 Sugaid taluꞌ in sog gommaꞌ in, ‘Ommaꞌ, tontong nu ba, sanu tahun ku na miginang dinika, bu daꞌdun bisan solobuk nok suguan nu og ondaꞌ u tombaoy. Tibuwa daꞌ nu tanan akon kobogoyoy bisan solobuk nati nok kambing para pogjamuhan nami nong mga supali u. 30 Sokaliꞌ pogdatong nog bataꞌ nu koyon nong mikotipot nok pongartaꞌ nu song mga libun tungkagon, yanin pa tokodoy ok sinumbalian nu nong nati sapiꞌ nok pisubuk ta.’

31 Na tinumabal og gommaꞌ in, ‘Toꞌ, lolayun ka da dini sog diyaloman ku. Og lam nog gartaꞌ u, dinika og gapuꞌ in. 32 Sugaid sumboy ita mogjamu bu mogloliyag poꞌ og gilug nu nong mibolong tagnaꞌ, mikuliꞌ na yanin ningkomun. Ong niyatu minatoy na, sokaliꞌ totubuꞌ doma saan.’ ”