Pikuliꞌ ni Panghuꞌ Isa ok Tow Misaki sog Gondow Pogogulali
14
Dadi ongon og gondow Sabtuꞌ,
inonggat si Isa nok kounutan nok tow Parisi kuman dituꞌ sog baloyin.
Tinulikan tokodoy nong mga tow dituꞌ ong mga lilowin.
2 Na ongon ok tow dituꞌ mimagaꞌ og botis bug komotin.
3 Sinakan ni Isa ong mga guru saraꞌ agama bug mga Parisi,
taluꞌ in,
“Mogdadi taꞌ sog agama ta momulung sog Gondow Pogogulali atawa ondiꞌ?”
4 Daꞌdun og gonek nilon,
dadi inonggaydan ni Isa ong misaki bangka nin bulungoy,
doksuꞌ pipanowin.
5 Doksuꞌ miktaluꞌ na sop si Isa dinilon,
“Bilaꞌ soupama og bataꞌ niyu atawa ok sapiꞌ niyu molabuꞌ sok timbaꞌ sog Gondow Pogogulali,
diꞌ niyu taꞌ alapon mogdayun?”
6 Na ondaꞌ ilon pokotabal dun.
Suboy Mobabaꞌ og Goyitan
7 Na mitongow ni Isa ong mga tow nog linumuduk mimiliꞌ nog gingkudan nok para song mga motas nok tow.
Dadi sinuksugan ilon ni Isa nok pononggiꞌ.
Taluꞌ in,
8 “Bilaꞌ posunan amu lumuduk sok kawing,
diꞌ amu mingkud sog gingkudan nok para bosiya song mga pigogaddatan,
poꞌ insunoy ongon ok piosunan nong motas pa tidu diniyu.
9 Na bilaꞌ matong pa ok tow nok pigogaddatan,
mangoy na diyon ok tow nong mikpoluduk diniyu,
bangka poktaluꞌ,
‘Bogoy niyu diyanin og gingkudan koyon.’
Dadi kosipogan amu tibuwa,
bu mokingkud amu na sog binayaan.
10 Saan na bilaꞌ poludukon amu,
ingkud amu sog binayaan,
bagun bilaꞌ motongow amu nok tow mikpoluduk diniyu,
angoyonin amu taluoy,
‘Angoy amu dini,
pali!
Ingkud amu sog gunahan.’
Dadi pogaddatan amu sog gadapan nog lam nok tow diyon.
11 Poꞌ sosukuꞌ mokpotas nog ginawa nin,
pobabaon da,
bu sima-sima ong mokpobabaꞌ,
potason da.”
12 Tubus tinaluan ni Isa ok tow nong mikpoluduk,
longin,
“Bug mokpojamu amu,
kanaꞌ hadja ok poludukon niyu ong mga supali niyu,
gilug niyu,
kampung niyu,
bu ok kilani baloy niyu nog dayahan.
Poꞌ kalu-kalu mogjamu sop ilon bangka nilon amu poludukoy,
na mikotumbas na ilon diniyu.
13 Tibuwa bilaꞌ mokpojamu amu,
poluduk niyu ong mga miskin bug mga taga sallaꞌ,
mamaꞌ na nok pingkaꞌ bug buta.
14 Na mobarakat amu poꞌ diꞌ ilon koyon mokotumbas diniyu,
sugaid ok Tuhan da ok tumumbas diniyu sog gondow nok potubuonin puliꞌ ong mga mologdong nok tow.”
Ok Pononggiꞌ pasal song Mosolag nok Pogjamu
15 Ongon ok solokotow nog linumuduk diyon.
Dangan midongogin ok tinaluꞌ ni Isa,
tinumabal yanin,
“Mobais ok sukud nok tow mokosalu mogjamu dituꞌ sok Pomarintahan nok Tuhan.”
16 Ok tabal ni Isa diyanin,
“Ongon ok solokotow nong mikpojamu nong mosolag,
bu modakol ok tow nok piosunanin.
17 Dadi sog waktu nok pogjamu na,
sinuguꞌ in ok solokotow sosuguonin song mga tow nok piosunan na asal.
Taluꞌ in dinilon,
Angoy amu na dituꞌ poꞌ migbotang na.
18 Sugaid kokoniya dimaawa,
taluꞌ nok solokotow,
‘Bogu u da pokosaluy nog lupaꞌ,
dadi sumboy angoyon ku dituꞌ.
Maap nu dona akon.’
19 Taluꞌ sop nok solokotow,
‘Bogu u da pokosaluy nok sopuluꞌ buk sapiꞌ,
dadi posunguꞌ u laꞌ kini dituꞌ,
poꞌ suloyan ku bug mogdadi taꞌ pogbadjaan.
Maap nu dona akon.’
20 Taluꞌ sop nok solokotow,
‘Bogu u da kinawing,
saan na diꞌ u pa mokangoy dituꞌ.’
21 Na minuliꞌ na ok sosuguon bangka nin suksugoy sog gamu nin.
Dadi milingit tokodoy og gamu nin koyon,
taluꞌ in,
‘Pogdaliꞌ a mangoy dituꞌ sok kodalan-dalanan nog lungsud ta.
Oyit nu dini ong mga miskin bug mga taga sallaꞌ,
mamaꞌ na nong mga daday bug mga buta.’
22 Daꞌ kobon minatong na ok sosuguonin,
taluꞌ in sog gamu nin,
‘Tuwan,
miinangu na ok suguan nu,
sugaid modakol pa og daꞌ kingkudoy.’
23 Dadi tinaluan yanin nog gamu nin,
‘Angoya song mga kodalan-dalanan bug mga pogbiyanan bangka nu onggat tokodoy ong mga tow posunguꞌ dini bagun moponuꞌ og baloyu.’
24 Na taluan ku amu,
og lam nok tow nog inonggatu kituꞌ tagnaꞌ,
sokaliꞌ daꞌ tuwaꞌ,
na diꞌ na ilon mokinam nok kan nok pidinsamaꞌ dinilon.”
Pasal sok Pogmulid
25 Tubus miglandan na si Isa sok panowin bu modakol ok tow migunut diyanin.
Simunguꞌ yanin song mga tow bangka poktaluꞌ,
26 “Sima-sima ong meleg mogunut dinakon,
na sumboy moglabi og lasa nin dinakon tidu sog lasa nin sog gommaꞌ in bug ginaꞌ in,
sog libun bug bataꞌ in,
gilugin,
bu bisan pa sok kotubuꞌ in.
Na bilaꞌ diꞌ niyu koyon moinang,
diꞌ amu moimung nong mulidu.
27 Bu sima-sima og diꞌ mokosandal nok kobinsanaan bisan sampoy sok kopatoy pasal sok pogunutin dinakon,
diꞌ moitung nong mulidu.
Poꞌ ong mulidu sumboy mamaꞌ sopantun nok tow mokpisan nok kayu nok poglansangan diyanin,
bangka moktuyuk dinakon.
28 Ok tow nong meleg mogunut dinakon,
mamaꞌ hantang nok tow mokpoindog nog baloy.
Na sog ondiꞌ pa pindogon,
suboy pikil-pikilonin poguna bug mokojukup taꞌ ok sinin pogimung nog baloy.
29 Poꞌ bilaꞌ mikopindog na nong mga gugdok nog baloy,
sokaliꞌ diꞌ na modoksuꞌ poꞌ kulang na ok sin,
na poksudian na hadja yanin nong mga tow.
30 Moktaluꞌ ilon,
‘Uy,
ok tow kini migimung pogusoy nog baloy,
sokaliꞌ diꞌ da modoksuꞌ.’ ”
31 Bu taluꞌ pa ni Isa,
“Domikkiyan,
mamaꞌ hantang nok sultan taga sundalu sopuluꞌ ngibu nong mogbunuꞌ sog len sultan nok taga sundalu duwaꞌ puluꞌ ngibu.
Na sumboy momikilan yanin poguna bilaꞌ mokatu taꞌ yanin atawa ondiꞌ.
32 Bilaꞌ ondiꞌ,
pangoyonin ong mga sosaliganin dituꞌ sog banta nin nok sultan soliyan molayuꞌ pa bagun moksak bug ponoy ok kopoksulut nilon.”
33 Doksuꞌ taluꞌ pa ni Isa,
“Na amu sooy,
bilaꞌ meleg amu moimung nong mulidu,
suboy tolikudan niyu og olo-olo nituꞌ nog ongon diniyu,
poꞌ bilaꞌ ondiꞌ,
diꞌ amu moimung nong mulidu.