Lukas 12

Poghalliꞌ sok Kopogbaluꞌ-baluꞌ

Na soliyan ni Isa diyon, miksidakol ong mga tow mangoy moginongog diyanin sampoy song ngibuhan na ilon, dadi kindogan na tanan ong mga duma dinilon. Doksuꞌ tinaluan ni moguna ong mga mulidin, taluꞌ in, “Poghalliꞌ amu sok kopogbaluꞌ-baluꞌ nong mga ! Ondiꞌ amu moglogiling dun. 2 Poꞌ daꞌdun og dinungmaan nog diꞌ kosunan, atawa og binuni nog diꞌ tumampal. 3 Dadi olo-olo ok tinaluꞌ niyu sok kodoloman, lumuwas da sok kodolagan, bu og inilom-ilom niyu sog bilik, moposampoy da sok kodakolan nok tow.

Tuhan ok Suboy Kondokan

4 Na taluan ku amu mga supali u, diꞌ amu mondok song mga mokopatoy nog lawas niyu, poꞌ puwas niyon, daꞌdun na ong moinang nilon diniyu. 5 Tibuwa taluan ku amu bug sima ok suboy kondokan niyu, ok Tuhan, poꞌ bilaꞌ putukonin ong nyawa niyu, ongon pa ok kowasa nin lumabuꞌ diniyu song narkaꞌ. Oo, pulian ku ok taluꞌ u, ok Tuhan ok suboy kondokan niyu. 6 Pikil niyu ba ong manuk-manuk maya lima buk, duwaꞌ pilak da og halgaꞌ in, sugaid daꞌdun tanan ok kilingowan nok Tuhan bisan solobuk dinilon. 7 Na amu sooy, minsan ong monolongow nog buk niyu kiosunan nok Tuhan og dakolin, dadi diꞌ amu mondok, poꞌ mohalgaꞌ amu pa tidu song mga maya bisan pa andun og dakol nilon.

8 Taluan ku amu, Sima-sima ong mangkon sog gadapan nong mga tow nok sukuꞌ yanin dinakon, og , angkonon ku da sop yanin nok sukuꞌ u diyon song mga nok Tuhan. 9 Sugaid sima-sima ok sumonsing sog gadapan nong mga tow nok sukuꞌ yanin dinakon, sonsingan ku da sop diyon song mga malaikat nok Tuhan. 10 Sima-sima ong mogunda-unda dinakon, og Bataꞌ nong Manusiyaꞌ, ongon pa ok koampunanin. Sugaid sima-sima ong mogunda-unda sog , daꞌdun na ok koampunanin. 11 Na bilaꞌ oyiton amu song mga atawa song mga kounutan nok parinta bug mga sultan bagun hukumon sabap sok kopogunut niyu dinakon, diꞌ amu mosusa bug ponoy ok poksugut niyu bu olo ok taluon niyu. 12 Poꞌ sog waktu koyon tonduan amu da nog Ruh nok Tuhan bug olo ok taluon niyu.”

Ok Pononggiꞌ pasal sog Dayahan nog Dupangon

13 Dadi ongon ok solokotow tidu sok kodakolan koyon ong miktaluꞌ diyon ni Isa, taluꞌ in, “Tuwan Guru, taluan nu pa og gilugu nog bahagianin pa akon nok pinusakaꞌ nong mokogulang nami.” 14 Ok tabal ni Isa diyanin, “Toꞌ, daꞌdun ok kopatutu humusoy song maꞌ niyon koyon atawa momahagiꞌ nog gartaꞌ niyu.” 15 Doksuꞌ bangka poktaluꞌ si Isa sok tumpukan nong mga tow, longin, “Poghalliꞌ bug pokpotubud amu song mga ginisan nong napsu, poꞌ ong mosobonnal nok kotubuꞌ, diꞌ mosaluy nog gartaꞌ bisan ponoy ok kodaya niyu.”

16 Tubus tinaluan ni Isa ong mga tow biyan sok pononggiꞌ, taluꞌ in, “Ongon ok tow dayahan nok sinongkuan nong modakol sog lupaꞌ in. 17 Tubus mimikilan yanin, taluꞌ in, ‘Olo na og inangon ku? Daꞌdun na ok kobotangan nok songkuꞌ u.’ 18 Taluꞌ in, ‘A, maꞌ nini og inangon ku, ladakon ku na ong mga komaligu, bangka u pogimung nong mga mokosolag pa. Dituꞌ u botangoy ok songkuꞌ u bug len pa nong mga pongartaꞌ u.’ 19 Doksuꞌ taluon ku pa sog ginawa-baran ku, ‘Pali, og gartaꞌ nong mitaguꞌ nu, sumaut na bisan sanu tahun, na diꞌ a na mosusa! Pokpoduhula na tibuwa kuman, minum bu moglami-lami!’ 20 Tibuwa tinaluan yanin nok Tuhan, ‘Dupangon ka, sog gobi kini alapon na ong nyawa nu, dadi sima na ong mokohampit nong mga gartaꞌ nok tinaguꞌ nu?’ ”

21 Na taluꞌ ni Isa, “Maꞌ niyon og biyan-biyan nong mga tow nong moktaguꞌ tibuwa nog gartaꞌ para sog lawas nilon, sugaid miskinan sok ponontong nok Tuhan.”

Mogipat ok Tuhan song mga Mongandol diyanin

22 Tinaluan pa ni ong mga mulidin, “Dadi taluan ku amu nog diꞌ amu mosusa pasal sok kotubuꞌ niyu bug olo ong mokan niyu, atawa sog lawas niyu bug olo ong mosolug niyu. 23 Poꞌ ok kotubuꞌ labi pa tidu sok kan, bu og lawas labi pa tidu sok pomonapot ta. 24 Tontong niyu ba ong mga guwak, diꞌ momula bu ondiꞌ da gumani. Daꞌ ilon da sop poktaguꞌ nok kan nilon, sugaid piokan da ilon nok Tuhan. Na amu pa taꞌ nog labi pa kohalgaꞌ tidu song mga manuk-manuk? 25 Bilaꞌ moksusa amu, yumabaꞌ taꞌ buwan og gumul niyu? Ondiꞌ na dodaꞌ bisan pa mikaan tokodoy. 26 Na bilaꞌ diꞌ niyu da kosukpatan ok kotubuꞌ niyu bisan mikaan tokodoy, manu moksusa amu poma song mga duma nog logon niyu?

27 Tontong niyu ba ong mga bulak-bulak nong mitubuꞌ nok sala-sala nilon. Daꞌ ilon ponukat nok kotubuan nilon, bu ondaꞌ ilon ponobot nok ponapot nilon. Tibuwa taluan ku amu, bisan si Sultan nog landuꞌ na og daya nin, daꞌdun da ok ponapotin nong mamaꞌ kolingkat nong mga bulak-bulak kini. 28 Bilaꞌ pilingkat nok Tuhan ong mga sigbot nong mitubuꞌ ningkomun, sugaid lomaꞌ-dinglag molawos bu tutungon da, na amu pa taꞌ og diꞌ poponapotan nok Tuhan? Mikaan tokodoy ok kopongandol niyu. 29 Diꞌ amu mosusa bug olo ok kanon bug inumon niyu. 30 Yonin kini ok piktuyuan nong mga tow nog ondaꞌ pokokilala sok Tuhan. Sugaid kiosunan na asal nog niyu sok surgaꞌ nok kogunahan niyu da sop dun. 31 Dadi ong mobais pa, polabihon niyu ok pogbayaꞌ nok Tuhan, bu bogoyon da diniyu og lam nok kogunahan niyu koyon.

32 Amu mga migunut dinakon, sumboy diꞌ amu mondok minsan mikaan amu da, poꞌ kisulutan og niyu mogbogoy diniyu nok pomarinta nin. 33 Pogdagang niyu na ong mga gartaꞌ niyu bangka niyu ponodokka song mga miskin og halinin. Na mamaꞌ amu da nong miktaguꞌ nog gartaꞌ niyu sok surgaꞌ nog diꞌ motipot dituꞌ. Daꞌdun ok polonakow nong mokalap dun bu daꞌdun og gangnay mokopoglaat dun. 34 Poꞌ bug ayin mitaguꞌ og gartaꞌ niyu, dituꞌ da sop ok pongatoyan niyu.

Suboy Moksimpan lolayun para sok Pokpuliꞌ nog

35-36 Poksimpan amu para sok pokpuliꞌ u. Poligaꞌ niyu lolayun ong mga suluꞌ niyu, mamaꞌ nong mga sosuguon nong migdodama nog gamu nilon muliꞌ tidu sok pokkawingan. Dadi bisan olo waktuhoy ok kodatongin, kobukaan da mogdayun. 37 Mobarakat ong mga sosuguon nok totanud bu togama sok pogdatong nog gamu nilon. Taluan ku amu, pangoyonin ilon dituꞌ sok pokkananin, poingkudonin ilon bangka nin tolagadoy. 38 Bisan pa tongaꞌ gobi atawa doliꞌ-ondow ok kodatongin, na mobarakat ilon bilaꞌ kisautanin ong mga sosuguonin nok togama diyanin.

39 Na sabut niyu da sop kini, bilaꞌ ongon ok tow nok kosunanin bug olo waktuhoy ok pogdatong nok polonakow, na diꞌ in potiyangan mosolod og baloyin. 40 Dadi sumboy amu da sop togama, poꞌ akon, og Bataꞌ nong Manusiyaꞌ, mokpuliꞌ sog waktu nog daꞌ niyu dodamahoy.”

41 Doksuꞌ miktaluꞌ si , “Panghuꞌ, ami da taꞌ ong misugat nok pononggiꞌ nu koyon atawa kotanan?” 42 Ok taluꞌ ni , “Na sima buwan ok sosuguon nok kopongandolan bu mobais ok pikilanin? Yanin ok kowakilan nog gamu nin nog bayaꞌ song mga duma nin sosuguon bu momahagiꞌ nok kan nilon pogdopot nog waktu nin. 43 Na bilaꞌ matong og gamu nin sokaliꞌ motongowin mobais og ginang nok sosuguonin, na mobarakat ok sosuguon koyon. 44 Dadi taluan ku amu, ong motudin, wakilonin sok sosuguonin koyon og lam nog gartaꞌ in. 45 Tibuwa bilaꞌ ong niyat nok sosuguon koyon, ‘Mobon pa datong og gamu u kituꞌ.’ Dadi pominasahonin og duma nin nong mga sosuguon libun bug laki, bu duhulanin ong napsu nin kuman, moginum, bu moglangu-langu. 46 Na sunoy pa matong na og gamu nin sog waktu nog daꞌ in dodamahoy. Siksaonin ok sosuguon koyon bangka nin pampuoy song mga tow nog diꞌ kopongandolan. 47 Ok sosuguon nok kiosunanin bug olo ok kolegan nog gamu nin, sugaid ondaꞌ poksimpan bu ondaꞌ in inangoy ok piinang diyanin nog gamu nin, mokonanam yanin nog landuꞌ nok siksaꞌ. 48 Sugaid bilaꞌ ongon ok sosuguon nog daꞌdun ok sene-sabutin sok kolegan nog gamu nin, tibuwa miksallaꞌ og ginangin, mopatut da sop yanin siksaon, sugaid kanaꞌ da tokodoy moglanduꞌ. Dadi sima-sima og binogoyan nong modakol, modakol da sop og bagadan nok Tuhan dun, bug sima-sima ok pingandolan nong modakol, na modakol da sop og dodamahan tidu diyanin.”

Miglen-len ok Poktombaꞌ nong mga Tow pasal ni Panghuꞌ Isa

49 Taluꞌ pa ni Isa, “Sok kangoyu dini sog dunya, mokpoyitu nog gapuy, bu kolegan ku bosiya moglokot na mogdayun. 50 Sugaid ongon pa ong mobogat nok kobinsanaan pobiyanon dinakon, saan na diꞌ u motonaꞌ toktob kobiyanan ku koyon. 51 Baluꞌ niyu taꞌ dun nong minangoyu dini mogoyit nok kosannangan sog dunya? Na kanaꞌ, tibuwa ok pogbahagiꞌ. 52 Poꞌ tidu ningkomun mobahagiꞌ na ong mga tow pasal dinakon. Bilaꞌ ongon og lima kotow, ok tolu kotow sumaggaꞌ sog duwaꞌ kotow, atawa og duwaꞌ kotow sumaggaꞌ sok tolu kotow poꞌ og duma dinilon diꞌ tumombaꞌ dinakon. 53 Og gommaꞌ sumaggaꞌ sog bataꞌ in nog laki, bu og laki sumaggaꞌ sog gommaꞌ in. Og ginaꞌ sumaggaꞌ sog bataꞌ in nog libun, bu og libun sumaggaꞌ sog ginaꞌ in, mamaꞌ niyon da sop ok ponugangan nog libun song mimonugangan diyanin nog libun, atawa ong mimonugangan nog libun sok ponuganganin nog libun.”

Ok Pogmaana nok Timpu

54 Miktaluꞌ si Isa sok tumpukan nok tow, “Bilaꞌ motongow niyu nong mongandom tidu sok sindopan, moktaluꞌ amu nong mogdupiꞌ. Na motud ok taluꞌ niyu. 55 Bilaꞌ moyup na og guttaraꞌ, moktaluꞌ amu nok posunguꞌ na sop ok timpu podos. Na motud ok taluꞌ niyu. 56 Amu mga mogpobaluꞌ-baluꞌ. Kosunan niyu lilingon og bayuꞌ-bayuꞌ nog langit bug lupaꞌ, sugaid manu diꞌ niyu ma kosunan lilingon ok timpu sog waktu kini?

57 Na sumboy bosiya mokosun amu humukum bug olo ong mologdong inangon. 58 Na bilaꞌ ongon ong mogdangat diniyu, sumboy pogmuhut-muhutan niyu yanin suluton. Poꞌ bilaꞌ diꞌ, na guyudonin amu sok poghukuman, bu wakilon amu nok tow monghukum sok pulis bangka amu pirisuhoy. 59 Dadi taluan ku amu, diꞌ amu mokoluwas sog bon nog diꞌ niyu kobayadan og lam nok kosalaan niyu.”