Ong mga Kolibunan nok Timabang ni Panghuꞌ Isa
8
Dadi pogdoksuꞌ nituꞌ,
pingangoy ni Isa ong mga lungsud bug mga kowman bagun mokposampoy bug mongnasihat nong Mobais nok Suksugan pasal sok Pomarinta nok Tuhan.
Migunut diyanin ok sopuluꞌ bu duwaꞌ kotow nong mokpoposampoyin,
2 bu og duma nok kolibunan nok kiulianin nong mga misaki bu nog bakas sinolodan nok soytan.
Ok solokotow dinilon yonin na si Mariam,
ok tow Magdalaa,
yanin ok kipoluwasan ni Isa nok pitu buk soytan sog lawasin,
3 bu si Yohanna og libun ni Kusi.
Si Kusi kini,
yonin na ok pingandolan ni Datuꞌ Herodb sog Gastanaꞌ in.
Migunut sop ok solobuk libun ong ngalanin si Susana bu modakol pa og duma nok kolibunan.
Ok kolibunan kini ok tinumabang gumastu ni Isa bug mga mulidin.
Ok Pononggiꞌ pasal song Miksibwag nog Boniꞌ
4 Na modakol nok tow tidu sog diya-diya kobonuwahan ong minangoy moktopuk diyon ni Isa,
bangka ilon nasihatoy ni Isa biyan sok pononggiꞌ.
Ok taluꞌ in,
5 “Ongon solokotow minibwag nog boniꞌ in sog guma nin.
Na soliyanin monibwag,
mitonaꞌ og duma nog boniꞌ sok kilid dalan,
dadi kididjakan nong mga miniyan,
bu tinipot toktukoy nong mga manuk-manuk.
6 Og duma nog boniꞌ,
mitonaꞌ sog batuhan.
Poktubuꞌ in,
milawos da poꞌ migangu og lupaꞌ in.
7 Og duma sop nog boniꞌ,
mitonaꞌ sog lupaꞌ nok taga sigbot dugihon.
Na poktubuꞌ nog boniꞌ,
milomos nong mga sigbot.
8 Sugaid og duma nog boniꞌ mitonaꞌ sog lupaꞌ nong mobais,
na tinumubuꞌ bangka pomunga nong modakol,
sok solobuk boniꞌ,
sogatus og bunga nin.”
Tubus niyon taluꞌ ni Isa,
“Dadi sima-sima ong mikodongog,
sabut niyu pahatul.”
9 Doksuꞌ miksak ong mga mulidin bug ponoy ok poksabut nok pononggiꞌ in koyon.
10 Taluꞌ ni Isa dinilon,
“Amu koyon,
pisabut na diniyu ong mibuni kituꞌ pasal sok Pomarinta nok Tuhan.
Tibuwa song mga duma nog diꞌ meleg mogunut sok pognasihatu,
taluon ku biyan sok pononggiꞌ bagun ‘Bisan tumontong ilon,
diꞌ da ilon mokotongow,
bu bisan monginongog ilon,
diꞌ da ilon mokosabut.’c
11 Na yonin kini ong maana nok pononggiꞌ kituꞌ:
Og boniꞌ,
yonin na ok Parman nok Tuhan.
12 Na ok kilid dalan kituꞌ nok kitonaan nog boniꞌ,
yonin na ong mga tow nong mikodongog nok Parman nok Tuhan.
Tibuwa minatong og Iblis bangka awaoy sok pongatoyan nilon ok Parman nok Tuhan bagun diꞌ nilon tombaan,
bu diꞌ ilon na moawon nok Tuhan.
13 Na og batuhan nok kitonaan nog boniꞌ,
yonin na ong mga tow nok tinumabuk nok Parman nok Tuhan dunut loliyag nilon,
sugaid daꞌ ponginggamut sok pongatoyan nilon.
Tinumombaꞌ ilon podaliꞌ,
sugaid sog waktu nok sinuloyan ilon,
podaliꞌ nilon da lukatan ok pongandol nilon.
14 Og lupaꞌ nok taga sigbot dugihon kituꞌ nok kitonaan nog boniꞌ,
yonin na ong mga tow nong minginongog nok Parman nok Tuhan.
Tibuwa dinag ilon sok kosusahan nilon,
sok pongartaꞌ bug kokayaan sog dunya.
Dadi ondaꞌ da pogjatu og bunga nok Parman sok kotubuꞌ nilon.
15 Na og lupaꞌ nong mobais kituꞌ nok kitonaan nog boniꞌ,
yonin na ong mga tow nong minginongog nok Parman nok Tuhan bangka nilon ungodoy bu bologbogoy song mobais nok pongatoyan nilon.
Ong mga tow koyon nong mokotiggol sok kotombaꞌ,
mamaꞌ hantang nok pomulan nong mitubuꞌ bangka pogbunga nong modakol.”
Sumboy Monginongog Mahatul bu Tumombaꞌ sok Parman nok Tuhan
16 Doksuꞌ miktaluꞌ na sop si Isa biyan sok pononggiꞌ,
“Daꞌdun ok tow nong moktutud nok politaan bangka nin dungmaoy nog banggaꞌ atawa botangon sok silung nok katri.
Sugaid botangonin sok pogbotangan dun bagun kodolagan ong mga tow nok sumolod.
17 Poꞌ og lam nog binuni tumampal da sok sosunguon,
bu olo-olo og dinungmaan,
kosunan da bu mokangoy da sok kodolagan lomaꞌ-dinglag.
18 Dadi pokpotubud amu monginongog,
poꞌ ong mga tow nong monginongog mahatul bangka nilon unutoy,
na dungagan pa tokodoy ok kokosun nilon.
Tibuwa ong mga tow nog diꞌ mokpotubud monginongog,
bisan pa song niyat nilon ongon na ok kokosun nilon,
na alapon da dinilon.”
19 Tubus minatong og ginaꞌ bug koilugan ni Isa nog laki,
sugaid diꞌ ilon mokopolani dituꞌ ni Isa kobalan nok kodakol nok tow.
20 Na ongon ong miksuksug ni Isa,
taluꞌ in,
“Og ginaꞌ bug mga koilugan nu nog laki,
dituꞌ sog luwasan meleg moktongow dinika.”
21 Ok taluꞌ ni Isa dinilon,
“Sima-sima ong moginongog nok Parman nok Tuhan bangka nilon unutoy,
moitung ilon koyon og ginaꞌ u bug pigilugan ku.”
Pilotaꞌ ni Panghuꞌ Isa og Bagyu
22 Dadi solobuk gondow,
simakoy si Isa bug mga mulidin sog bangkaꞌ,
bu tinaluanin ilon,
“Alung,
tumolipag ita sog dipag linow.”
Dadi timulak ilon.
23 Dangan miglayag na ilon sog linow,
mikotulug si Isa.
Sunoy pa minoyup og galuꞌ nong mopagas bangka koungodoy nok tubig og bangkaꞌ nilon.
Dadi sog diyalom tokodoy ilon nok komulahan.
24 Na inangoy nilon si Isa tanudoy,
taluꞌ nilon,
“Guru,
Guru,
molonod ita niyu na!”
Na mitanud si Isa bangka nin pogbinaoy og galuꞌ bug nabok lumotaꞌ.
Na sododuun tinumoddoꞌ.
25 Doksuꞌ tinaluanin ilon,
“Ayin na ok kopongandol niyu?”
Tibuwa kisobuan bu kiondokan ong mga mulidin,
bu taluꞌ nok kokoniya,
“Sima bayuꞌ ok tow kini nog bisan ong nabok bug galuꞌ tumombaꞌ ma diyanin bilaꞌ suguonin?”
Kiulian ni Panghuꞌ Isa ok Tow nok Sinolodan nok Soytan
26 Tubus miglayag na si Isa bug mga mulidin posunguꞌ sog bonuwa Gerasa,
yonin na og bonuwa sog dipag nog Linow Jalil.
27 Na pokponog ni Isa sog bangka,
linumpak yanin nog laki tidu sog lungsud koyon nok sinolodan nok soytan.
Ok tow kini miobon na moglobas-lobas bu diꞌ na motonaꞌ sog baloy.
Dituꞌ na yanin migonong sog diyalom nong mga langub pongubulan.
28-29 Modadan tokodoy yanin binsanaoy nok soytan.
Bisan lolayun yanin ikotan nok kodina,
ponggotusonin da,
bu bisan pa jagahan yanin,
moboluy da,
bangka yanin oyitoy nong mga soytan sok talunan.
Dangan mitongowin si Isa,
miglosik yanin nong monamal bangka yanin poktolibuksak sog lupaꞌ diyon sog gunan ni Isa,
taluꞌ in,
“Isa,
og Bataꞌ nok Tuhan Mahatinggi,
olo og inangon nu dinakon?
Pongonihon ku dinika,
diꞌ nu akon siksaon!”
Mamaꞌ niyon ong mitaluꞌ in poꞌ sinuguꞌ na asal ni Isa ok soytan nong mawaꞌ sog diyalom nog lawas nok tow koyon.
30 Taluꞌ ni Isa diyanin,
“Sima ong ngalan nu?”
Tinumabal yanin,
“Ong ngalan ku si Laksaꞌ.”
Poꞌ modakol ok soytan nok sinumolod sog diyalom nog lawasin.
31 Dadi pingoni nong mga soytan nog diꞌ pa ilon pangoyon sog luwang nog diꞌ motokkad.
32 Na ongon diyon ong modakol nog babuy nong minungat sok kilid nog bontud.
Dadi pingoni nong mga soytan nog dituꞌ ilon na pangoyoy sog diyalom lawas nong mga babuy.
Na kinumboy ilon ni Isa.
33 Dadi limuwas ong mga soytan tidu sog lawas nok tow koyon bangka ilon solod song mga babuy.
Sododuun mimolebes gumobok ong mga babuy koyon sog bilidan tokodoy posunguꞌ sog linow bangka ilon kosigbow bu milomos ilon kotanan.
34 Dangan mitongow nong mga mogogipat nong mga babuy nong maꞌ nituꞌ,
ginumobok ilon mogdayun sog lungsud bug gumbaloyan sog lumibutin minuksug pasal song miinang koyon.
35 Dadi minangoy ong mga tow dituꞌ ni Isa bagun tumontong song miinang koyon.
Pogdatong nilon,
mitongow nilon ok tow nog bakas sinolodan nok soytan miningkud sog gadapan ni Isa,
mimonapot na bu mobais na ok ponayu nin.
Dadi kiondokan tokodoy ilon.
36 Na ong mga tow nong mikotongow song miinang koyon,
minuksug ilon song mga duma nilon bug ponoy kiulian ma ok tow nok sinolodan nok soytan.
37 Dadi og lam nok tow nong migonong sok koliwagan nog bonuwa nog Gerasa,
pingoni nilon nong mawaꞌ si Isa poꞌ landuꞌ tokodoy og gondok nilon.
Saan na sinumakoy siloꞌ Isa sog bangkaꞌ nilon,
kaliꞌ ilon awaꞌ.
38 Sugaid sog daꞌ pa ilon tulak,
ok tow kituꞌ nok kipoluwasan ni Isa nong mga soytan,
mikpokilolat diyanin nok podunuton yanin.
Tibuwa piuliꞌ yanin ni Isa,
bu sinuguꞌ in,
39 “Uliꞌ a na dituꞌ diniyu bangka nu ponuksug song mga gusba-waris nu bug ponoy kobais og ininang nok Tuhan dinika.”
Na inulitin suksugoy ong mga tow sog lungsud koyon pasal sog ininang ni Isa diyanin.
Og Libun nong Misaki, bu og Bataꞌ ni Jayrus nong Minatoy
40 Dangan mikopuliꞌ siloꞌ Isa sog dipag nog linow koyon,
linumpak yanin nong mga tow dunut loliyag nilon poꞌ asal na ilon migdodama diyanin.
41 Na ongon ok tow nok pogingalanan nog Jayrus,
ok kounutan sok poksumbahan,
minangoy diyon sumudjud song molani nog botis ni Isa.
Mikpokilolat yanin nong mangoy pa si Isa dituꞌ sog baloyin,
42 poꞌ posunguꞌ na matoy ok tunggal nog bataꞌ in nog libun.
Migumul yanin sopuluꞌ bu duwaꞌ tahun.
Dangan inangoy ni Isa,
migigot diyanin ong mga tow nong mogunut.
43 Na ongon sop diyon solokotow nog libun nok pogduguꞌ-duguon sog bon nok sopuluꞌ bu duwaꞌ tahun.
Ayin-ayin na yanin mikosaut mokpobulung,
bu mitipot na og gartaꞌ in pogbayad,
sugaid daꞌdun bisan solokotow ong mikokuliꞌ dun.
44 Dadi limimugoy yanin diyon tidu sok tolikudan ni Isa nong migigot na ong mga tow bangka nin kimaloy ok sung-sung nog juba ni Isa,
bu sododuun linumotaꞌ ok pogluwas nog duguꞌ in.
45 Na miktaluꞌ si Isa,
“Sima ok kinumimal dinakon?”
Na mimolilu og lam nok tow,
dadi miktaluꞌ si Petros,
“Panghuꞌ,
modakol ong mga tow nong migdoksol diyon dinika.”
46 Tibuwa miktaluꞌ si Isa,
“Ongon na dodaꞌ ok kinumimal dinakon poꞌ mibatiku nog ongon og limuwas nok kowasa tidu nakon.”
47 Na dangan kiosunan nog libun koyon nog diꞌ na mobuni og ininangin,
mikpolani yanin dunut pongongkogin bangka na sudjud diyanin.
Tinaluꞌ in sok kodakolan nok tow bug manu kinimalin si Isa nok sododuun mikokuliꞌ dun.
48 Taluꞌ ni Isa diyanin,
“Buweꞌ,
ok pongandol nu ong mikokuliꞌ dinika,
uliꞌ a na nong mosannang.”
49 Dadi soliyanin moktaluꞌ sog libun koyon,
sunoy pa ongon ok solokotow minangoy diyon tidu sog baloy ni Jayrus,
ok kounutan diyon sog baloy poksumbahan.
Piosunanin si Jayrus,
“Og bataꞌ nu minatoy na.
Diꞌ nu na sasowon og Guru.”
50 Tibuwa midongog ni Isa,
dadi tinaluanin si Jayrus,
“Diꞌ a mondok,
pongandola hadja,
bu kulian da yanin.”
51 Pogdatong niloꞌ Isa sog baloy ni Jayrus,
daꞌdun ok kinumboyin mogunut diyanin sumolod muwal da niloꞌ Petros,
Yahiyad,
Yaꞌkub bu og ginaꞌ-ommaꞌ nog bataꞌ.
52 Ong mga tow diyon migaduy bu og lam nilon mikkorukkaan,
dadi tinaluan ilon ni Isa,
“Diꞌ amu mogaduy,
poꞌ og bataꞌ ondaꞌ da patoy,
sugaid mitulug hadja yanin.”
53 Na pikkotawahan yanin nong mga tow diyon,
poꞌ kiosunan nilon nong minatoy na dodaꞌ og bataꞌ.