Ong mga Moktolisodaꞌ nong Miimung nong Mulid ni Panghuꞌ Isa
5
Na ongon solobuk gondow mignasihat si Isa sok tumpukan nok tow dituꞌ sok kilid linow nog Genesaret.
Migogot na ong mga tow poꞌ meleg moginongog nok Parman nok Tuhan.
2 Mitongow ni Isa og duwaꞌ buk bolangoy sog doksaan.
Binilin nong mga moktolisodaꞌ poꞌ migugas pa ilon nok pokot.
3 Dadi sinumakoy si Isa sok solobuk bolangoy nog gapuꞌ in si Simon,
bangka nin pongonihoy nog dondolonin mikaan tidu sog doksaan.
Doksuꞌ miningkud si Isa bangka pognasihat song mga tow.
4 Dangan midoksuꞌ yanin mognasihat,
tinaluanin si Simon,
“Mokpodalom ita bangka niyu labuꞌ ok pokot niyu bagun mokalap amu nok sodaꞌ.”
5 Ok tabal ni Simon,
“Tuwan,
sumogobi ami na moktiksaꞌ momokot,
sugaid daꞌdun da og galap nami.
Tibuwa bug taluꞌ nu,
na momokot ami mokpuliꞌ.”
6 Na inunut nilon ok taluꞌ in,
bangka nilon na labuoy sog linow ok pokot nilon.
Pogbotong nilon modakol tokodoy nok sodaꞌ ong mialap,
bu posunguꞌ na bosiya mogodit ok pokot nilon.
7 Dadi kinamboyan nilon ong mga duma nilon dituꞌ sok solobuk bolangoy bagun ilon tumabang.
Pogdatong nilon,
pinonuꞌ nilon og duwaꞌ buk bolangoy,
bu agon-agon na ilon molonod.
8 Poktongow ni Simon nok tinawag da sop nok Petros og ininang ni Isa,
simudjud yanin sog gadapanin bangka yanin poktaluꞌ,
“Pokpolayuꞌ a dinakon Panghuꞌ,
poꞌ baldusa u da.”
9 Maꞌ niyon ok tinaluꞌ in poꞌ misobuꞌ yanin bug mga duma nin sog dakol nok sodaꞌ nong mialap nilon.
10 Domikkiyan da sop ong mga duma ni Simon nok siloꞌ Yaꞌkub bug Yahiya,
og gumbataꞌ ni Sebede.
Na tinaluan ni Isa si Simon,
“Diꞌ a mondok!
Tidu ningkomun ok tow na ok pogalapon nu.”
11 Dangan dinumongguꞌ na ilon,
dinek nilon na ong mga bolangoy sok kotasan,
bangka nilon bagakoy og lam nituꞌ.
Tubus migunut ilon ni Isa.
Kiulian ni Panghuꞌ Isa ok Tow taga Saki Pomolongon
12 Na soliyan ni Isa diyon sok solobuk nog lungsud,
ongon og laki nong milokop og lawasin nog gipul.
Dangan mitongowin si Isa,
simudjud yanin mogdayun bangka pokpokilolat ni Isa,
taluꞌ in,
“Tuwan,
bilaꞌ kolegan nu,
mobulung nu akon bangka u kolissin.”
13 Dadi dinoponan yanin ni Isa,
bangka poktaluꞌ “Oo,
melegu da,
kulian ka na!”
Sododuun kiulian og gipulin.
14 Doksuꞌ sinuguꞌ yanin ni Isa,
“Diꞌ a monuksug bisan sima pasal nini,
sugaid angoya sog gimam mokpotongow diyanin bagun mopomotudin nok kiulian ka na.
Tubus pokkurban ka para sok kopoglissin dinika mounut sok suguan ni Nabi Musa gantaꞌ pokposaksiꞌ song mga tow.”a
15 Bisan maꞌ nituꞌ,
mikanat da og dongogan pasal ni Isa,
bu miktumpuk og landuꞌ kodakol nok tow moginongog nong nasihatin bu bagun sop kulian ong mga saki nilon.
16 Tibuwa lolayun mawaꞌ si Isa sok kodakolan nok tow bangka angoy sog bonuwa nog daꞌdun ok towin mongoni-ngoni.
Kiulian ni Panghuꞌ Isa og Daday
17 Solobuk gondow soliyan ni Isa mognasihat sog diyalom baloy,
ongon ong mga Parisi bug mga guru saraꞌ agama tidu sog len-len kowman nok sakup nog Jalil bug Yahudiya bu tidu sog Jerusalem poloingkud diyon.
Na ok kowasa nok Tuhan diyon ni Isa bagun kulian ong mga taga saki.
18 Na ongon ong mga tow nong minatong diyon migoyit nok tow daday sok tanggunganin.
Sinuloyan nilon posolodon sog diyalom baloy bagun nilon mobotang sog gadapan ni Isa.
19 Tibuwa diꞌ ilon mokosolod poꞌ migogot na ong mga tow sog diyalom baloy.
Dadi minenek ilon sok tas gatopb bangka nilon awaoy ok sobahagiꞌ nog gatopin.
Doksuꞌ tinontun nilon og daday dunut tanggunganin dituꞌ sog gadapan ni Isa.
20 Dangan mitongow ni Isa nong mopagas ok kopongandol nilon,
tinaluanin og daday,
“Pali,
inampun na ong mga dusa nu!”
21 Dadi ong mga guru agama bug mga Parisi miksak-sinakoy ilon,
taluꞌ nilon,
“Sima towoy koyon nok pibatukin og ginawa-baranin sok Tuhan?
Ponglaat koyon!
Daꞌdun mokoampun nog dusa luwal da ok Tuhan.”
22 Na kiosunan ni Isa bug olo og diyalom pikilan nilon,
dadi tinaluanin ilon,
“Manu mokpikil amu ma nong mamaꞌ niyon?
23 Ayin buwan ong molomu taluon,
‘Inampun na ong mga dusa nu,’
atawa ‘Pogbuwata bangka a na panow?’c
24 Tibuwa tulikan niyu bagun kosunan niyu nok taga kopatut og Bataꞌ nong Manusiyaꞌ dini sog dunya mongampun nog dusa.”
Tubus tinaluanin ok tow daday,
“Pali,
pogbuwata,
alap nu og gikam nu bangka a uliꞌ!”
25 Na sododuun migbuwat og daday kituꞌ sok kodakolan nok tow bangka nin alapoy og gikamin.
Doksuꞌ minuliꞌ yanin dunut pokpotasin sok Tuhan.
26 Misobuꞌ tokodoy og lam nok tow,
bu piotas nilon ok Tuhan dunut gondok,
bu taluꞌ nilon,
“Mokosobuꞌ-sobuꞌ tokodoy ong mitongow ta sog gondow kini.”
Miimung nong Mulid ni Panghuꞌ Isa ok Solobuk Mogogalap nog Buwis
27 Puwas nituꞌ linumuwas si Isa,
bangka nin kotongow ong mogogalap nog buwis nok pogingalanan Lebid miningkud sok pogogalapan nog buwis.
Tinaluan yanin ni Isa,
“Pogunuta dinakon!”
28 Dadi minindog si Lebi,
binagakin og lam nituꞌ bangka yanin pogunut ni Isa.
29 Doksuꞌ mikpojamu nong mosolag si Lebi dituꞌ sog baloyin para ni Isa.
Bu modakol ok tow mogogalap nog buwis bug mga duma pa og limuduk bu minampuꞌ kuman diyon dinilon.
30 Tibuwa ondaꞌ tokodoy kosulutoy ong mga Parisi bug mga guru agama,
dadi pinaluꞌ-naluan nilon ong mga mulid ni Isa,
taluꞌ nilon,
“Manu minampuꞌ amu ma kuman dunut song mga mogogalap nog buwis bug mga baldusa?”
31 Na si Isa ok tinumabal dinilon,
taluꞌ in,
“Ong mga tow mokolasig,
daꞌdun balan nilon nok polomulung,
sugaid ong mga misaki da.
32 Daꞌ u angoy dini mongonggat nong mga tow nong mingniyat nong mologdong ilon,
sugaid minangoyu dini mongonggat nong mga tow baldusa bagun moktowbat na ilon.”
Ong mga Pononggiꞌ ni Panghuꞌ Isa pasal sok Puwasa bug Bogu ponintuluꞌ in
33 Na ongon ong mga tow dituꞌ miktaluꞌ ni Isa,
long nilon,
“Ong mga mulid ni Yahiyae sigi-sigi mokpuwasa bu mongoni-ngoni,
domikkiyan da sop bug mga mulid nong mga Parisi.
Sugaid ong mga mulid nu kuman bu minum hadja.”
34 Na pinonggian ni Isa ong mga mulidin sok tow nog lumuduk sok pokkawingan,
bangka nin tabaloy,
“Popuwasahon niyu taꞌ buwan ong mga tow nog linumuduk sok pokkawingan sog bon nog diyon pa ok pongantim laki?
Ondiꞌ na dodaꞌ!
35 Tibuwa matong da og waktu nog alapon da dinilon ok pongantim lakif,
na bangka pa ilon sop pokpuwasa.”
36 Bu tinaluan pa ilon ni Isa nok pononggiꞌ pasal sok pononduꞌ masa tagnaꞌ bu og bogu nok pononduꞌ in.
Taluꞌ in,
“Daꞌdun ok tow nog gumodit nok ponapot nog bogu bagun poktilob sog dogdoy nog dan.
Poꞌ bilaꞌ inangonin,
piglaatanin tibuwa og bogu ponapotin,
bu kanaꞌ sop dumait ok poktilobin koyon sog dan.
37 Domikkiyan da sop,
daꞌdun ong mogungod nog bogu tubig anggul sog dan nog gungodan panit binatang poꞌ ondiꞌ na mobitad.
Dadi bilaꞌ mogbulaꞌ ok tubig anggul,
tumibul og inungod bangka kobogdak og gungodan.
Na mobunag og gungodin bu mogasta og gungodan panit koyon.
38 Tibuwa ok tubig anggul nog bogu,
sumboy ungodon na dodaꞌ sog gungodan nok panit nog bogu.
39 Daꞌdun ok tow meleg minum nog bogu tubig anggul bilaꞌ kilayamanin moginum og dan,
poꞌ moktaluꞌ yanin,
‘Mobais pa ong nanam nog dan.’ ”g