Inoyit si Panghuꞌ Isa dituꞌ ni Gubernur Pilatu
15
Pogdoli ondow na,
miktopuk ong mga kounutan nok koimaman,
mga migmokogulang,
mga guru agama bug len nong mga monghuhukum nog bangsa Yahudi,
bangka pogisun bug olo og inangon nilon.
Inikotan nilon si Isa bangka oyitoy bu wakiloy dituꞌ ni Pilatu,
og gubernur.
2 Dadi sinakan yanin ni Pilatu,
“Ika taꞌ ok sultan nong mga Yahudi?”
Tinumabal yanin,
“Tinaluꞌ nu na.”
3 Na modakol ok sumbungan nong mga kounutan nok koimaman pasal ni Isa.
4 Dadi sinakan na sop yanin ni Pilatu,
“Daꞌdun taꞌ og ikotabal nu?
Tontong nu ba,
modakol ok sumbungan nilon pasal dinika.”
5 Sugaid daꞌdun na ok tabal ni Isa.
Na misobuꞌ tokodoy si Pilatu.
Hinukuman si Panghuꞌ Isa nok Patoyon
6 Na kilayaman nog gubernur bilaꞌ Halilaya Pogliyus,
mokpoluwas yanin solobuk pinirisu bug sima ok pingoni nong mga tow nok poluwason.
7 Sog waktu koyon ongon ok pinirisu diyon,
ong ngalanin Barabbas.
Mipirisu yanin dunut kodumahanin poꞌ mimunuꞌ ilon pasal sok pongatu nilon sok parinta.
8 Dadi modakol ong mga tow nong minangoy dituꞌ ni Pilatu,
bagun pongonihon nilon nok poluwasonin ok solokotow nong mipirisu mamaꞌ nok kilayamanin inangon.
9 Dadi sinakan ni Pilatu ong mga tow,
“Meleg amu taꞌ nok poluwason ku diniyu ok sultan nong mga Yahudi?”
10 Poꞌ kiosunan ni Pilatu nog inuwakil nong mga kounutan nok koimaman si Isa diyanin,
sabap sog jongki nilon dun.
11 Sugaid piktungihan nong mga kounutan nok koimaman ong mga tow nok pongonihon nilon nok poluwason si Barabbas,
gabaꞌ ni Isa.
12 Tibuwa miksak mokpuliꞌ si Pilatu song mga tow,
“Dadi olo ma og inangon ku sok tow nok tinawag niyu ok sultan nong mga Yahudi?”
13 Migekes ong mga tow,
taluꞌ nilon,
“Lansang nu yanin sok kayu!”
14 Tibuwa ok taluꞌ ni Pilatu dinilon,
“Manu ma,
olo buwan og dusa nong miinangin?”
Sugaid labi pa ilon migekesan,
“Lansang nu yanin!”
15 Dadi pagga ok kolegan ni Gubernur Pilatu nok sulutonin ong mga tow,
na piluwasin si Barabbas dinilon.
Doksuꞌ pilanogin si Isa bangka wakiloy song mga sundalu bagun lansangon sok kayu.
Pigunda-undahan si Panghuꞌ Isa nong mga Sundalu
16 Na inoyit na nong mga sundalu si Isa sog gastanaꞌ nog gubernur bangka potawagoy og lam nok sundalu.
17 Pisolugan nilon si Isa nog juba bayuleta,
mamaꞌ nog juba nok sultan.
Tubus sinulapid nilon ok kayu-kayu dugihon,
doksuꞌ binuligtus baasa kuruna bangka botangoy sog gulu nin.
18 Puwas nituꞌ baasa soginahon nilon si Isa,
long nilon,
“Bantugon ok sultan nong mga Yahudi!”
19 Doksuꞌ piksoksag nilon yanin nok tungkod sog gulu bu dinulaan,
bangka pa ilon sudjud baasa mokpudji diyanin.
20 Dangan midoksuꞌ na nilon pogunda-undahon,
linuwas nilon og juba nin kituꞌ,
bangka posolugoy dun puliꞌ ok ponapotin.
Tubus inoyit nilon sog luwasan nok siyudad bagun lansangon sok kayu.
Linansang si Panghuꞌ Isa sok Kayu
21 Soliyan nilon mopanow,
milumpak nilon ok tow Kirene nog iningalanan nok Simun nok posunguꞌ sok siyudad.
Og gommaꞌ yanin niloꞌ Aleksander bug Rupus.
Tinogol yanin nong mga sundalu popisan ok kayu poglansangan ni Isa.
22 Inoyit nilon si Isa sog bonuwa nok pogingalanan nog Golgota,
ong maana nin bonuwa bakuk.
23 Doksuꞌ binogoyan nilon yanin nok tubig anggul sinagotan nog bulung mira,b
sugaid daꞌ yanin inum dun.
24 Na linansang nilon si Isa sok kayu bangka nilon bahagioy ong mga ponapotin biyan sok pogbunut-bunut bug sima taꞌ ong mokalap dun.
25 Lisag siyam nok sisolom ok kolansang nilon ni Isa sok kayu.
26 Ongon ok sulat nok sumbungan nilon sok tas nog gulu ni Isa,
“OK SULTAN NONG MGA YAHUDI.”
27 Ongon duwaꞌ kotow molaat nog linansang da sop nilon dunut ni Isa.
Ok solokotow sog lintu bu ok solokotow sog bibangin.
28 Na miunut tokodoy ok sinulat sok Kitab,
“Miitung yanin song mga tow nong mikodugtul sok saraꞌ.”
29 Ong mga tow nong miniyan diyon pigunda-undahan nilon si Isa dunut pokkising-ising,
taluꞌ nilon,
“Pweh!
Ika og lumadak nog Baloy nok Tuhan bangka imungoy puliꞌ sok solod nok tolu ondow,
30 na tabang nu og lawas nu,
ponoga sok kayu koyon!”
31 Domikkiyan da sop pigunda-undahan yanin nong mga kounutan nok koimaman bug guru agama.
Taluꞌ nok kokoniya,
“Mitabangin og duma,
tibuwa diꞌ in motabang og lawasin.
32 Tontongon ta bug mokoponog sok kayu og Al-Masih,
ok sultan nog Israel.
Bilaꞌ motongow ta niyu,
na tumombaꞌ ita diyanin.”
Bu ong mga tow nong milansang dunut diyanin,
migunda-unda da sop diyanin.
33 Dangan misaut na nog lotu-ondow,
dinumolom na ok koliwagan nog bonuwa toktob lisag tolu nog lolabung.
34 Poglisag tolu nog lolabung,
miktaluꞌ si Isa nong monamal,
longin,
“Eloi,
Eloi,
lama sabaktani,”c
ong maana nin,
U Tuhan ku,
u Tuhan ku,
manu pisagadan nu ma akon?d
35 Na dangan midongog koyon nog duma nong mga tow nong migindog diyon,
taluꞌ nilon,
“Poginongog amu,
tinawagin si Nabi Elyas.”
36 Sakaliꞌ ongon og ginumobok malap nok kokanaꞌ bangka doluoy sog ginuman nong mosom,
bangka botangoy sok sosugget.
Tubus tinoyoꞌ in ni Isa bagun mosoksopin bangka poktaluꞌ,
“Potiyangan ta yanin!
Tontongon ta bug tabangon taꞌ yanin ni Nabi Elyas monog sok kayu.”
37 Doksuꞌ miglosik si Isa nong mopagas bangka na yanin kotoktus.
38 Na migodit tongaꞌ tidu sok tas posunguꞌ sok silung ong modikpol nok kurtina nok pigdonding sog lot nog Bilik Mahasutsi bug Bilik Sutsi sog Baloy nok Tuhan.e
39 Na ongon ok solokotow nok kapitan minindog sog gadapan ni Isa.
Dangan mitongowin bug ponoy ok kotoktusin,
taluꞌ in,
“Motud dodaꞌ,
ok tow kini,
og Bataꞌ nok Tuhan.”
40 Ongon sop mga kolibunan nong mikotongow sok kolayuan.
Og duma dinilon,
si Mariam,
ok tow Magdala,
si Salome,
bu si Mariam,
og ginaꞌ ni Yoses bu ni Yaꞌkub,
ok komongudan.
41 Mikopogunut bu miktolagad ilon ni Isa nog dituꞌ pa yanin sog Jalil.
Modakol da sop og duma nok kolibunan diyon nong migunut ni Isa mangoy sog Jerusalem.
Ok Pokkubul ni Panghuꞌ Isa
42 Minatoy si Isa sog lolabung nog gondow poktogama nok poglomaon na og Gondow Pogogulali.
43 Na ongon ok tow Arimati,
ngalanin si Yusup.
Solobuk yanin monghuhukum pogogaddatan sog bangsa Yahudi,
bu migbagad da sop yanin sok Pomarinta nok Tuhan.
Miktowakkal yanin mangoy dituꞌ ni Gubernur Pilatu pongonihon og bangkoy ni Isa.
44 Pogdongog ni Pilatu nong minatoy na si Isa,
misobuꞌ yanin.
Pitawagin ok kapitan nong mga sundalu moksak bilaꞌ motud taꞌ.
45 Dangan kiosunanin nong minatoy na si Isa,
kinumboyin na diyon ni Yusup malap nog bangkoyin.
46 Dadi simaluy si Yusup nok kokanaꞌ putiꞌ bangka nin piponog og bangkoy ni Isa tidu sok kayu.
Sinaputin og bangkoy,
tubus inoyitin sog langub linuwangan nog inimung kubulan.
Doksuꞌ linigidin og batu poktambol sog bongowan nok kubulan.
47 Na si Mariam,
ok tow Magdala bu ok sangoyin si Mariam nog ginaꞌ ni Yoses,
mitongow nilon bug ayin kinubul si Isa.