Mitubuꞌ Puliꞌ si Panghuꞌ Isa
16
Pogbiyan nog Gondow Pogogulali,
sinumaluy siloꞌ Mariam,
ok tow Magdala,
Salome bug Mariam nog ginaꞌ ni Yaꞌkub nok pokpomut bagun pokpunas sog bangkoy ni Isa.
2-4 Dangan doliꞌ-ondow nog Gahad,
minangoy ilon sok kubulan.
Soliyan nilon mopanow sog dalan,
miksak-sinakoy ilon,
“Sima na bayuꞌ in ong mokolilid nok tambol nog batu sok kubulan para dinita?”
Poksilak nog gondow,
minatong na ilon sok kubulan,
sugaid poktontong nilon,
mitongow nilon nong miligid na og batu nog landuꞌ kosolag kituꞌ.
5 Dadi sinumolod na ilon sog diyalom kubulan,
bu mitongow nilon ok subul migjuba nok putiꞌ miningkud sog dapit lintu,
bu miondok ilon tokodoy.
6 Tinaluan ilon nok subul,
“Diꞌ amu mondok,
kiosunan ku nok pinontong niyu si Isa,
ok tow Nasaret nog linansang sok kayu.
Daꞌ na yanin dini.
Mitubuꞌ na yanin mokpuliꞌ!
Tontong niyu,
ok kibotangan nilon dun.
7 Sugaid angoy niyu suksugoy ong mga mulidin bu si Petros nong moguna yanin diniyu dituꞌ sog Jalil.
Dituꞌ niyu yanin kotongow mamaꞌ na nok tinaluꞌ in diniyu.”
8 Dadi limuwas na ong mga kolibunan tidu sok kubulanin bangka gobok.
Landuꞌ ok kosobuꞌ nilon bu mingongkog ilon nog gondok.
Ondaꞌ nilon pa suksugoy sog bisan sima,
poꞌ miondok ilon.
Mikpotongow si Panghuꞌ Isa song mga Mogogunut diyanin
9 Dangan mitubuꞌ mokpuliꞌ si Isa sog doliꞌ-ondow nog Gahad,
mikpotongow yanin poguna ni Mariam,
ok tow Magdala,
nog yonin na ok kipoluwasanin pitu buk soytan.
10 Na minangoy yanin mokposun song mga mogogunut ni Isa,
bu kidatonganin ilon nong migaduy bu migdukka.
11 Dangan tinaluanin ilon nong mitubuꞌ si Isa bu mitongow nog duwaꞌ mata nin,
daꞌ ilon tombaꞌ diyanin.
12 Puwas nituꞌ mikpotongow na sop si Isa sog duwaꞌ kotow nong mulidin nok soliyan mokpanow sog luwasan nok siyudad.
Mikpotongow yanin dinilon sok selen nog bayuꞌ-bayuꞌ.
13 Dadi mikpuliꞌ ilon sog Jerusalem bangka suksugoy ong mga duma nin,
sugaid daꞌ ilon da sop tombaꞌ.
14 Doksuꞌ nituꞌ mikpotongow yanin sok sopuluꞌ bu sala nong mga mulidin solabu nilon kuman.
Piktaluan ilon ni Isa poꞌ kulang ok pongandol nilon bu motogas og gulu nilon,
poꞌ daꞌ ilon tombaꞌ sok suksugan nong mga mikotongow diyanin nong mitubuꞌ puliꞌ.
15 Taluꞌ ni Isa dinilon,
“Angoy amu sog lam nok kobonuwahan dini sog dunya bangka niyu posampoy ong Mobais nok Suksugan sog lam nong manusiyaꞌ.
16 Sima-sima ok tumombaꞌ bangka pokpoliguꞌ,a
moawon yanin,
bu sima-sima og diꞌ tumombaꞌ,
mosugat nog hukuman nok Tuhan.
17 Bu ongon ong motongow nog gindanan sok sima-sima nok tumombaꞌ,
poꞌ biyan song ngalan ku mokobugow ilon nok soytan,
bu mokopoktaluꞌ ilon nok kanaꞌ nilon ponaluon.
18 Bu bilaꞌ mimud ilon nong mamak atawa minum nog laksun,
diꞌ da ilon moolo.
Doponan nilon ong mga tow misaki,
bu kulian ilon.”
Inoyit si Panghuꞌ Isa sok Surgaꞌ
19 Dangan midoksuꞌ si Panghuꞌ Isa moktaluꞌ dinilon,
inoyit na yanin posunguꞌ sok surgaꞌ bangka yanin ingkud sog dapit lintu nok Tuhan.
20 Dadi minangoy na ong mga mulid ni Isa song mga kobonuwahan mokposampoy nong Mobais nok Suksugan ayin-ayin.
Tinabangan ilon ni Panghuꞌ Isa sog ginang nilon,
bu pisobonnalin ok pokposampoy nilon dunut nong mga gindanan.
Wassalam