Markus 12

Ok Pononggiꞌ pasal song mga Saup

Dadi tinaluan ni ong mga kounutan koyon biyan song mga pononggiꞌ, taluꞌ in, “Ongon ok solokotow nong mimula nog sog lupaꞌ in. Inaladin bangka pokkukut bagun imungonin ok nog anggul. Pokpuwas nituꞌ migimung sop yanin nog lokow-lokow pogalungan. Doksuꞌ pisaupin ok kabbunin koyon bangka yanin panow sog len bonuwa. 2 Dangan minatong na ok timpu pongupuꞌ nog bunga anggul, piangoy nog gapuꞌ lupaꞌ ok solokotow nok sosuguonin dituꞌ song mga saupin mogalap nog gantaꞌ nog bahagiꞌ in. 3 Tibuwa pogdatong nok sosuguon dituꞌ, binombal nilon bangka pulioy nog daꞌdun ong mioyit-oyitin. 4 Puwas nituꞌ piangoy na sop nog gapuꞌ lupaꞌ og len sosuguonin song mga saupin. Sugaid binombal nilon yanin sog gulu bangka pa posipogoy. 5 Piangoy na sop mokpuliꞌ nog gapuꞌ lupaꞌ og len nok sosuguonin, sugaid pinatoy nilon. Modakol pa ong mga sosuguon nok piangoy nog gapuꞌ lupaꞌ, sugaid og duma binombal og duma sop pinatoy. 6 Na solobuk dona ong misamaꞌ diyanin, og bataꞌ in nok kolasahanin. Dadi sok kodoksuan, og bataꞌ in koyon ok piangoyin dituꞌ sok saupin, poꞌ ok taluꞌ in, ‘Pogaddatan nilon na dodaꞌ og bataꞌ u.’

7 Sugaid dangan mitongow yanin nong mga saupin, miksitaluꞌ ilon, ‘Koyon na ok kopusakaan nok kabbun kini. Alung, patoyon ta yanin, dadi dinita na ok pusakaꞌ in.’ 8 Dadi sinaggow nilon og bataꞌ nog gapuꞌ lupaꞌ bangka patoyoy, bu tinikpuꞌ nilon og bangkoyin sog luwasan nok kabbunan.”

9 Ok sak ni Isa song mga kounutan koyon, “Na olo sok pikilan niyu og inangon nog gapuꞌ lupaꞌ song mga saupin? Angoyonin ilon patoyoy, bangka nin posaupoy nog len. 10 Ondaꞌ niyu taꞌ buwan kobasta ok sinulat sok Kitab nog,

‘Og batu nog binolong nong mga pandoy,

og batu tokodoy kituꞌ ong migoyit nok pagon nog baloy.

11 Ininang kini nok Tuhan,

bu mokosobuꞌ-sobuꞌ kini dinita niyu.’ ”

12 Na misabut nong mga kounutan koyon nog ilon tokodoy ok pinonggian ni Isa. Dadi kolegan nilon yanin saggowon, tibuwa mondok ilon song mga tow, saan na minawaꞌ na ilon.

Ok Sak pasal sok Pogbayad nog Buwis

13 Ondaꞌ kobon sinuguꞌ nong mga kounutan og duma nong mga bug mga piktowan ni Datuꞌ Herod bagun mosaggow nilon si Isa sok ponaluonin. 14 Dangan mikangoy ilon dituꞌ ni Isa, taluꞌ nilon, “Tuwan Guru, kiosunan nami nong motud ong mga ponaluon nu, bu diꞌ a momiliꞌ nok tow bisan ponoy ok kowasa nin, sugaid mosobonnal ok ponintuluꞌ nu nog dalan posunguꞌ sok Tuhan. Dadi bilaꞌ ika, kumboy taꞌ sok saraꞌ ta mga mogbayad nog dituꞌ sok sultan nog bangsa atawa kanaꞌ?” 15 Tibuwa kiosunan ni Isa nong migbaluꞌ-baluꞌ ilon, taluꞌ in dinilon, “Manu suloyan niyu ma akon? Oyitan niyu akon nok sin pogbayad nog buwis bangka u tontongoy.” 16 Dangan inoyitan nilon si Isa nok sin, sinakanin ilon, “Sima ok pattaꞌ bug ngalan sok sin kini?” Na tinumabal ilon, “Ok sultan sog bonuwa Rum.” 17 Dadi taluꞌ ni Isa, “Pagga maꞌ niyon, bogoy niyu sok sultan ok sukuꞌ in, bu bogoy niyu sop sok Tuhan og olo-olo nok sukuꞌ in.” Misobuꞌ ilon sok tabal ni Isa.

Ok Sak pasal sok Kotubuꞌ puliꞌ nong mga Patoy

18 Na ongon ong mga tow sok tumpukan Yahudi nok pogingalanan nok ong mikpolani ni Isa. Ong mga towanan kini ondiꞌ tumombaꞌ nog ongon ok kotubuꞌ pogdoksuꞌ nok kopatoy. Sinakan nilon si Isa, taluꞌ nilon, 19 “Tuwan Guru, ongon ok saraꞌ nong misulat ni Nabi Musa dinita niyu nog bilaꞌ og laki mokopoglibun, doksuꞌ matoy yanin nog daꞌdun og bataꞌ in, na sumboy poglibunon nog gilugin ong mibalu. Dadi bilaꞌ mokopogbataꞌ ilon, moitung og bataꞌ koyon nog bataꞌ nog gilug kituꞌ nong minatoy. 20 Na ongon ok pitu kotow nog laki mogilug. Miglibun og gulang bataꞌ nilon, sugaid minatoy nog daꞌdun og bataꞌ in. 21 Piglibun nok sumunuꞌ diyanin og libun koyon, sugaid minatoy da sop nog daꞌdun og bataꞌ in. Domikkiyan da sop og ikotolu nog gilug. 22 Dadi miksunud-sunud ilon miglibun dun mangoy sog ikopitu nog gilug nilon, bu minatoy og lam nilon nog daꞌdun da sop og bataꞌ nilon. Sok kodoksuanin minatoy da sop og libun kituꞌ. 23 Dadi bilaꞌ motubuꞌ puliꞌ ong mga manusiyaꞌ sog Gondow , sima na bayuꞌ in og laki nog libun kituꞌ, poꞌ mipoglibun ma yanin nok pitu kotow mogilug kituꞌ?”

24 Tinaluan ilon ni Isa, “Misayup amu, poꞌ daꞌ niyu kosunoy ong misulat sog diyalom Kitab bu ok kowasa nok Tuhan. 25 Poꞌ sog waktu nok potubuon na mokpuliꞌ ong mga tow tidu sok kopatoy, diꞌ na ilon moglibun bu moglaki, mamaꞌ na ilon nong mga malaikat sok surgaꞌ. 26 Tibuwa pasal song mga minatoy nok potubuon ilon mokpuliꞌ, daꞌ niyu taꞌ kobasta sok Kitab ni Nabi Musa ok tinaluꞌ nok Tuhan diyanin tidu song miksuliyab nok kayu dugihon? Longin, ‘Akon ok Tuhan niloꞌ , bug Yaꞌkub.’ ” 27 Na taluꞌ pa ni Isa, “Song masa koyon minatoy na ilon, dadi motampal nog ongon ok kotubuꞌ puliꞌ pogdoksuꞌ nok kopatoy poꞌ kanaꞌ yanin ok Tuhan nong mga tow patoy, sugaid song mga totubuꞌ. Dadi misayup tokodoy ok pikilan niyu.”

Ong Mohalgaꞌ nok Suguan

28 Na ongon diyon solokotow nog guru agama ong mikodongog nok pigabit-abitan nilon, bu kisulutan yanin nok kotabal ni Isa. Dadi mikpolani yanin bangka poksak, “Tuwan, ayin song mga suguan nok Tuhan ok kinotasan?” 29 Tinumabal si Isa, “Ok kinotasan kini: ‘Poginongog amu mga tow ! Ok Pogbayaꞌ-bayaꞌ, ok Tuhan ta niyu, solobuk-lobuk da. 30 Lasa niyu ok Tuhan Pogbayaꞌ-bayaꞌ nog ikhlas sog diyalom pongatoyan bug nyawa niyu, bu sok pomikil niyu sampoy sog lam nok pagas niyu.’

31 Og ikoduwaꞌ, kini, ‘Kolasahoy niyu ok kodumahan niyu mamaꞌ nog lasa niyu sog ginawa-baran niyu.’ Daꞌdun na og lumabi tidu sog duwaꞌ suguan koyon.”

32 Dadi tinaluan nog guru agama si Isa, “Motud ok taluꞌ nu Tuwan Guru nok solobuk-lobuk da ok Tuhan bu daꞌdun na muwal. 33 Bu sumboy lumasa ok tow sok Tuhan nog ikhlas sog diyalom pongatoyanin bu sog lam nok kokosunin bug pagasin, bu sumboy yanin lumasa sok kodumahanin mamaꞌ nog lasa nin sog ginawa nin. Ong mga suguan kini og labi mobais tidu sog lam nong mga atawa olo-olo nog bogoyon sok Tuhan.”

34 Dangan midongog ni Isa nong mobais ok tabalin, miktaluꞌ yanin, “Posunguꞌ a na mosakup sok .” Doksuꞌ nituꞌ daꞌdun na ong mokotowakkal moksak ni Isa.

Ok Tinaluꞌ ni Sultan pasal sog Al-Masih

35 Puwas nituꞌ mignasihat si dituꞌ sog , bu miksak yanin, “Ponoy kotaluꞌ nong mga guru agama nog og Al-Masih solobuk ponupuꞌ ni Sultan Daud? 36 Poꞌ tinaluꞌ nog biyan ni Sultan Daud, longin,

‘Miktaluꞌ ok Pogbayaꞌ-bayaꞌ sok Panghuꞌ u,

Ingkuda dini sog dapit lintu u

toktob dagon ku ong mga banta nu dinika, bu moimung ilon mamaꞌ nog gontudan nog botis nu.’ ”

37 Na taluꞌ ni Isa, “Ok poktawag ni Sultan Daud sog Al-Masih, ok Panghuꞌ. Dadi manu tinawagin ma ok Panghuꞌ in bilaꞌ solobuk da yanin ponupuꞌ in?”

Migloliyag ong mosolag nok tumpukan nok tow monginongog diyon ni Isa.

Pasal song mga Guru Agama

38 Dangan mignasihat si Isa, taluꞌ in, “Poghalliꞌ amu song mga guru agama. Kolegan nilon mokpanow-panow dunut juba nilon, bu soginahon nong mga tow sok tabuꞌ. 39 Loliyagon ilon mingkud song mga gingkudan para song mga mokotas nok tow sog diyalom bu sok pogjamuhan. 40 Sugaid pongagowon nilon ok pongartaꞌ nong mga balu libun bu mokpotongow-tongow ilon song mga tow biyan song mokopayat nok pongoni-ngoni nilon sok Tuhan. Na sabap diyon, mobogat tokodoy og hukuman nok Tuhan dinilon.”

Ok Sodokka nog Balu Libun

41 Dadi miningkud si Isa sog molani sok tuung pogbobotangan nok sin, bu tinontongin ong mga tow nong miglabuꞌ nong mga sin nilon diyon, bu modakol sop ong mga tow dayahan ong migbogoy nong mosolag nog halgaꞌ. 42 Na ongon solobuk balu libun miskinan nong mikpolani bangka poglabuꞌ nog duwaꞌ sinsilyu diyon. 43 Na tinawag ni Isa ong mga mulidin, taluꞌ in dinilon, “Taluan ku amu, ong motudin, modakol pa ong mibogoy nog balu libun nong miskinan koyon tidu sog lam nok tow nong migbogoy sok tuung-tuung. 44 Poꞌ og lam nilon koyon, og binogoy nilon, og labi da nok sin nilon. Tibuwa og balu libun miskinan kini, tinipotin bogoyoy ok kotanan nok sinin.”