Markus 7

Ok Pongaddatan nong Minokogulang atawa ok Suguan nok Tuhan

Na ongon og gondow minatong diyon ni ong mga bug duma nog guru agama tidu sog . 2 Sokaliꞌ mitongow nilon og duma nong mulidin kinuman nog daꞌ pongugas nok komot nilon mounut song mga gaddat kolissin nong mga bilaꞌ kuman. 3 Poꞌ ong mga Parisi bug lam nog duma nog Yahudi, diꞌ ilon kuman bilaꞌ diꞌ nilon kougasan ok komot nilon mounut song mga gaddat nong mga mokogulang nilon. 4 Bu bilaꞌ muliꞌ ilon tidu sok tabuꞌ, diꞌ ilon kuman nog olo-olo bug diꞌ kougasan poguna. Bu modakol pa og ginang nong minokogulang nog hallian nilon, mamaꞌ na nok pogugas nog basu, taguan nog ginumon, kondiꞌ bug mga duma panyap poglutuan.

5 Dadi ong mga Parisi bug mga guru agama, sinakan nilon si Isa, “Manu daꞌ ma tombaꞌ ong mga mulid nu nong mga gaddat nong mga mokogulang ta niyu? Kuman ilon nog daꞌ pongugas nok komot nilon.” 6 Dadi tinumabal si Isa dinilon, “Motud tokodoy mamaꞌ nok pidinsamaꞌ tumaluꞌ sok Kitab ni Nabi pasal diniyu mga ,

‘Ong mga tow kini, piotas nilon akon toktob tibuwa sok taluꞌ nilon,

sugaid molayuꞌ ok pongatoyan nilon dinakon.

7 Mogasta ok poksumba nilon dinakon

poꞌ ok ponintuluꞌ nilon, ong mga suguan da nong manusiyaꞌ.’

8 Poꞌ tinolikudan niyu ok suguan nok Tuhan, sugaid og inunutan niyu ong mga gaddat nog batuk niyu manusiyaꞌ.”

9 Bu taluꞌ pa ni Isa dinilon, “Kosunan niyu tokodoy tumolikud ong mga suguan nok Tuhan bagun niyu mounut og gaddat nong mokogulang niyu. 10 Poꞌ miktaluꞌ si Nabi Musa, ‘Pogaddatoy niyu og gommaꞌ bug ginaꞌ niyu,’ bu ‘Sima-sima ong monaluꞌ nong molaat sog ginaꞌ atawa gommaꞌ in, potiyangan yanin matoy.’ 11 Sugaid mounut sok ponintuluꞌ niyu, mogdadi taluon nok solokotow song mokogulangin nog daꞌdun na ong motabangin dinilon, poꞌ ok tabangin bosiya kituꞌ dinilon, binogoyin na sok Tuhan, inimung na nok kurban. 12 Dadi ong mamaꞌ nituꞌ kituꞌ, kinumboy niyu nog ondiꞌ ilon tumabang song mokogulang nilon. 13 Ong maana nin, binolong niyu ok Parman nok Tuhan bagun mounut niyu hadja og gaddat niyu. Kanaꞌ hadja koyon, sugaid modakol pa ong maꞌ niyon nog len nok ponginangon niyu.”

Ong Mokosammal sok Tow

14 Doksuꞌ pitawag mokpuliꞌ ni Isa ok tumpukan nong mga tow diyon diyanin, taluꞌ in, “Inongogoy niyu bu sabut niyu ok taluon ku kini. 15 Ondiꞌ mosammal ok tow sog olo-olo ok sumolod sog babaꞌ in, sugaid ong mokosammal dun og olo-olo nog lumuwas tidu sok pongatoyanin. 16 Na sosuku nong mikodongog, sabut niyu pahatul.”

17 Pogawaꞌ ni Isa sok kodakolan nok tow bangka solod sok solobuk baloy, sinakan yanin nong mga mulidin pasal sok pinonggiꞌ in kituꞌ. 18 Na taluꞌ ni Isa dinilon, “Daꞌ amu pa taꞌ sop pokosabut? Daꞌ niyu taꞌ kosunoy nog bisan olo-olo ong moungod sog babaꞌ niyu diꞌ da mokosammal diniyu? 19 Poꞌ ok kinan niyu, ondaꞌ da pokosolod sok pongatoyan, sugaid sok tiyan da, doksuꞌ lumuwas da koyon sog lawas niyu.” Dadi tidu sok taluꞌ ni Isa koyon, pitampalin nog halal og lam nok kan.

20 Dinungaganin pa ok taluꞌ in, “Kotanan nong molaton nog linumuwas tidu sok pongatoyan nong manusiyaꞌ, yonin na ong mokosammal dinilon. 21 Poꞌ lumuwas ong molaat nok pikilan tidu sok pongatoyan nong manusiyaꞌ, bangka koongon ok pogjina, pokponakow, pokpatoy, poktungkag, 22 pognapsu, pongakkal, pogjongki, pogbais, pogima, pokkulibot, pogabbu bug ginang nok kodupangan. 23 Og lam nong mga ginang molaton koyon linumuwas tidu sok pongatoyan nong manusiyaꞌ, bu yonin na koyon ong mokosammal dinilon.”

Ok Kopongandol nog Libun nok kanaꞌ Yahudi

24 Doksuꞌ minawaꞌ na si dituꞌ bangka yanin angoy song mga bonuwa nok Tirus bug Sidon. Sinumolod yanin sok solobuk baloy diyon, bu koleganin bosiya nog daꞌdun ong mokokosun diyanin, sugaid ondaꞌ da koyon kobuni. 25 Na ongon ok solokotow nog libun nok taga bataꞌ nog libun nok sinolodan nok soytan. Pogdongogin pasal ni Isa, minangoy yanin diyon bangka sudjud sog gadapan ni Isa. 26 Og libun kini, bangsa Ponikiya tidu sog bonuwa Siriya, kanaꞌ yanin Yahudi. Mikpokilolat yanin ni Isa nok poluwasonin ok soytan sog bataꞌ in nog libun. 27 Tinaluan yanin ni Isa, “Pobosugon ta poguna ong mga gumbataꞌ poꞌ kanaꞌ mobais awion dinilon ok kan bangka bogoyoy song mga gitok.” 28 Tibuwa tinumabal og libun, “Tuwan, ong mga gitok sooy kuman da sop nong mga mumu nong mga gumbataꞌ sok silung nog lomisahan.”

29 Dadi tinaluan yanin ni Isa, “Sabap sok tabal nu koyon, uliꞌ a na. Miawaꞌ na ok soytan sog bataꞌ nu.” 30 Na minuliꞌ na og libun koyon. Dangan dituꞌ na yanin sog baloy, mitongowin og bataꞌ in dituꞌ sog bolilidan, bu miawaꞌ na ok soytan diyon sog lawasin.

Binulung ni ok Solokotow nog Bongol bu Goteꞌ

31 Dadi tidu sog bonuwa Tirus, miniyan si Isa sok Sidon bu sog lambul nok Sopuluꞌ Lungsud bangka na yanin pokpuliꞌ sog . 32 Na ongon ong mga tow migoyit diyanin nok solokotow laki nog bongol bu goteꞌ. Mikpokilolat ilon ni Isa nog doponanin ok tow koyon bagun kulian. 33 Dadi pilayuꞌ yanin ni Isa tidu sok kodakolan nok tow bangka nin losukoy og duwaꞌ kuyamoyin sog duwaꞌ tolinga nok tow koyon, doksuꞌ dinulaanin ok kuyamotin bangka kimal sog dilaꞌ nok tow koyon. 34 Doksuꞌ tinumongal si Isa sog langit bangka ginawa nong mosolag bangka nin taluoy sog bahasa nilon, “Eppata!” Ong maana nin Kobukaꞌ a! 35 Na sododuun mokodongog na bu mokopoktaluꞌ na yanin pahatul.

36 Puwas nituꞌ pingintugunin dinilon nog diꞌ monuksug bisan sima. Sugaid dangan pigondianin nog diꞌ monuksug, labi pa ok pokponuksug nilon pasal dun. 37 Misobuꞌ tokodoy ong mga tow nong mikodongog nong miinangin kituꞌ, bu miktaluꞌ ilon, “Landuꞌ tokodoy kobais ong miinangin. Bisan og bongol mikodongog na bu og goteꞌ mikopoktaluꞌ na mahatul.”