Ondaꞌ Tolimaoy si Panghuꞌ Isa sog Bonuwa nin
6
Pogdoksuꞌ nituꞌ minawaꞌ na si Isa sog bonuwa koyon bangka uliꞌ sog bonuwa nin nong Nasaret.
Migunut diyanin ong mga mulidin.
2 Dangan minatong og gondow nok Sabtuꞌ,
yonin na og gondow poksumba bu pogogulali,
miktagnaꞌ yanin mognasihat dituꞌ sog baloy poksumbahan.
Modakol ok tow nong misobuꞌ sok pognasihatin,
bu taluꞌ nok kokoniya,
“Ayin bayuꞌ mialap nok tow kini ok pononduꞌ in kini bu kokosunin?
Landuꞌ ok kokowasa nin monginang nong mokosobuꞌ-sobuꞌ!
3 Kanaꞌ taꞌ yanin koyon ok polomandoy,
og bataꞌ ni Mariam bu ok pigiluganin siloꞌ Yaꞌkuba,
Yusupb,
Yahudc bug Simon?
Kanaꞌ taꞌ dini dinita og gilugin nog libun?”
Dadi mosakit ok pongatoyan nilon,
bu daꞌ ilon na tombaꞌ ni Isa.
4 Taluꞌ ni Isa dinilon,
“Ong nabi,
pogaddatan bisan ayin,
luwal sog bonuwa nin,
sog gusba-warisin bu sog baloyin.”
5 Bu daꞌ pokoinang si Isa nong mga mokosobuꞌ-sobuꞌ diyon.
Binulungin tibuwa ok sanu kotow milongkoꞌ nog dinoponanin.
6 Misobuꞌ tokodoy si Isa song mga tow diyon poꞌ diꞌ ilon tumombaꞌ diyanin.
Puwas nituꞌ linumibut si Isa song mga kowman mongnasihat.
Pipanow ni Panghuꞌ Isa ong mga Mulidin Mognasihat
7 Doksuꞌ tinawag ni Isa ok sopuluꞌ bu duwaꞌ kotow mulidin bangka nin pangoyoy doduwaꞌ kotow popognasihaton sok kobonuwahan,
bu binogoyanin ilon nok kowasa mokpoluwas nok soytan.
8 Tinaluanin ilon nog daꞌdun og oyiton nilon sok popanowan nilon mamaꞌ na nok kan,
gabot bug sin sok pitaka nilon,
muwal da ok tungkod nilon.
9 Taluꞌ in pa,
“Solug niyu ok tolumpaꞌ,
sugaid diꞌ niyu oyiton ok salinan niyu.
10 Bilaꞌ mokangoy amu sok solobuk baloy,
diyon amu pa soliyan sog bon nog diꞌ amu pa gumonat.
11 Na bilaꞌ mokangoy amu sog bonuwa nong mga tow nog diꞌ tumolimaꞌ diniyu bu diꞌ monginongog diniyu,
na awaꞌ amu diyon bangka niyu pokpasoy og bogombun sog botis niyu pokpomotud dinilon nog diꞌ amu na motaksil nok Tuhan pasal dinilon.”
12 Dadi mipanow na ong mga mulidin bangka ilon pognasihat song mga tow nok sumboy ilon moktowbat song mga dusa nilon.
13 Modakol sop ong mga soytan nog binugow nilon,
bu pinunasan nilon nog lana ong modakol nong mga tow nong misaki,
bu kiulian ilon.
Ok Kopatoy ni Yahiya Mongliliguꞌ
14 Na misaut og dongogan pasal ni Isa diyon ni Datuꞌ Herodd poꞌ mibantug na ong ngalanin.
Ongon ong mga tow miktaluꞌ,
“Mitubuꞌ na mokpuliꞌ si Yahiya Mongliliguꞌ tidu sok kopatoy,
saan na ongon ok kowasa nin moginang nong mokosobuꞌ-sobuꞌ.”
15 Sugaid taluꞌ sop nog duma pasal ni Isa,
“Yanin na koyon si Nabi Elyas.”
Og duma sop miktaluꞌ,
“Solobuk yanin ong nabi,
mamaꞌ nong nabi tagnaꞌ.”
16 Dangan midongog koyon ni Datuꞌ Herod,
taluꞌ in,
“Si Yahiya Mongliliguꞌ nog bakasu piputukan nog gulu,
mitubuꞌ puliꞌ.”
17-18 Maꞌ niyon ok tinaluꞌ in,
poꞌ sok totubuꞌ pa si Yahiya Mongliliguꞌ,
inagow ni Datuꞌ Herod si Herodiya,
og libun nog gilugin nok si Pilip.
Saan da piktaluan yanin ni Yahiya nog,
“Haram dinika nok piglibun nu si Herodiya,
poꞌ og libun nog gilug nu.”
Dadi pisaggow ni Datuꞌ Herod si Yahiya,
bangka nin piikot sok pirisuhan.
19 Na milingit si Herodiya ni Yahiya,
bu ok koleganin popatoy,
sugaid diꞌ in moinang,
20 poꞌ mondok si Datuꞌ Herod ni Yahiya.
Kiosunanin nok si Yahiya ok tow nong mologdong bu sutsi,
dadi pitubudanin.
Migloliyag si Herod monginongog song mga nasihat ni Yahiya,
bisan ong mga modongogin mokosasow sok pikilanin.
21 Na minatong ong mobais nog waktu nok pigbagadan ni Herodiya,
yonin na og gondow nok kobataꞌ ni Datuꞌ Herod.
Migjamu yanin para song mga ponindogin,
mga kounutan nong mga sundalu nin,
bug mga tow nong motas sog bonuwa Jalil.
22 Soliyan nilon mogjamu,
sinumolod og bataꞌ ni Herodiya nog budjang bangka sayow.
Kisulutan tokodoy si Datuꞌ Herod bug mga tow nog limuduk sok sayowin.
Dadi tinaluan ni Herod og budjang koyon,
“Pongoni a bisan olo-olo ok kolegan nu,
bu bogoyon ku dinika.”
23 Bu sinumapa tokodoy yanin sog budjang,
taluꞌ in,
“Olo-olo ok pongonihon nu dinakon,
bogoyon ku dinika,
bisan pa sotongaꞌ nog gartaꞌ u.”
24 Dadi limuwas og budjang bangka nin sakoy og ginaꞌ in,
“Olo ok pongonihon ku?”
Ok tabal nog ginaꞌ in,
“Pongoni nu og gulu ni Yahiya Mongliliguꞌ.”
25 Na migdaliꞌ-daliꞌ mokpuliꞌ og budjang dituꞌ sog datuꞌ bangka yanin pongoni,
taluꞌ in,
“Ok kolegan ku bogoyon nu sododuun dinakon og gulu ni Yahiya Mongliliguꞌ botangon sog bondiha.”
26 Misusa tokodoy og datuꞌ,
sugaid pasal mikosapa ma yanin sog gadapan nong mga tow nog limuduk,
diꞌ in kolegan bawion og jinanjiꞌ in sog budjang koyon.
27 Na sododuun pitawag nog datuꞌ ok sundalu nin bangka poksuguꞌ nog oyiton dituꞌ diyanin og gulu ni Yahiya.
Dadi minangoy na dituꞌ sok pirisuhan ok sundalu koyon bangka nin putukoy si Yahiya nog gulu.
28 Tubus inoyitin dituꞌ sog budjang koyon og gulu ni Yahiya nong mibotang sog bondiha,
bu binogoy sop nog budjang dituꞌ sog ginaꞌ in.
29 Dangan midongog nong mga mulid ni Yahiya,
minangoy ilon dituꞌ mogalap nog bangkoyin bangka nilon kubuloy.
Piokan ni Panghuꞌ Isa ong Ngibuhan nok Tow
30 Na ong mga mokpoposampoy ni Isa minatong na tidu sok panow nilon mongnasihat bangka nilon na suksugoy ni Isa ok kotanan nong miinang bu mitintuluꞌ nilon song mga tow.
31 Na miktaluꞌ si Isa dinilon,
“Mangoy ita sog bonuwa nong mohinok bangka amu ulali dituꞌ.”
Modakol saan ong mogangoy bu mongawaꞌ diyon,
bu diꞌ na tanan ilon mokoluhaya kuman.
32 Dadi sinumakoy na ilon sog bangkaꞌ posunguꞌ sog bonuwa nong mohinok.
33 Sugaid mitongow ilon nong mga tow dangan tinumulak na ilon,
bu kiindanan ilon.
Dadi ginumobok ong modakol nong mga tow tidu song mga lungsud minangoy sog bonuwa nog gangoyan niloꞌ Isa.
Minatong pa ilon poguna tidu niloꞌ Isa.
34 Pogdongguꞌ niloꞌ Isa,
mitongowin ong mga tow nog landuꞌ kodakol.
Milolat yanin dinilon,
poꞌ mamaꞌ ilon nong mga bilibili nog daꞌdun ong mogogipat dun.
Dadi miktagnaꞌ yanin monintuluꞌ dinilon,
bu modakol ok pignasihatin.
35 Dangan posunguꞌ na og gobi,
minangoy na dituꞌ ni Isa ong mga mulidin,
taluꞌ nilon,
“Panghuꞌ,
posunguꞌ na moglogobi bu mohinok og bonuwa kini.
36 Pangoy nu na ong mga tow kini song mga gumahan bug gumbaloyan sog lumibut ta bagun ilon mokosaluy nong mokan nilon.”
37 Sugaid tinabal ilon ni Isa,
“Amu na ong mogbogoy dinilon nok kan.”
Na tinaluan nilon si Isa,
“Totu?
Mangoy ami taꞌ sumaluy nok pan halgaꞌ duwaꞌ gatus dinare para sok kan nilon?”
38 Taluꞌ ni Isa dinilon,
“Sanu buk ok panf nog inoyit niyu?
Tontong niyu!”
Na poktontong nilon,
taluꞌ nilon,
“Ongon lima buk nok pan bu duwaꞌ buk sodaꞌ.”
39 Tubus piingkudin ong mga tow moglumpuk-lumpuk sok sigbotan.
40 Dadi miglumpuk-lumpuk ilon mingkud.
Og linumpukan nilon,
ongon na sogatus kotow,
bu ongon sop lima puluꞌ kotow.
41 Na inalap ni Isa og lima buk nok pan bug duwaꞌ buk nok sodaꞌ,
bangka yanin tongal sog langit miksukul sok Tuhan.g
Doksuꞌ pikpitak-pitakin ok pan bangka nin dituoy song mga mulidin bagun bogoyon song mga tow,
bu pipogbahagiꞌ in da sop ok sodaꞌ song mga tow kotanan.
42 Dadi mikokan og lam nilon bu mibosug ilon.
43 Pokpuwas nituꞌ,
mikotimud pa ong mga mulidin nok kan bu miponuꞌ nilon ok sopuluꞌ bu duwaꞌ ambung nok samaꞌ nok pan bug sodaꞌ.
44 Og dakol tibuwa nok kolakihan nong mikokan dun,
lima ngibu kotow.
Mipanow si Panghuꞌ Isa sog Dibabow Tubig
45 Puwas nituꞌ pisakoy mogdayun ni Isa ong mga mulidin sok tas nog bangkaꞌ.
Piuna nin ilon sok sobolaꞌ nog linow,
sog bonuwa Betsayda,
soliyanin pogonaton ong mga tow.
46 Dangan miksuwoy na ilon,
tinumukad si Isa sog bontud bagun mongoni-ngoni.
47 Poglogobi,
mikosaut na ong mga mulid ni Isa sok titongaꞌ nog linow,
bu si Isa sala-sala nin da dituꞌ sog ginlupaan.
48 Mitongow ni Isa nok kilogonan ong mga mulidin sok pomolula nilon,
poꞌ misonsang nilon og galuꞌ.
Pogdoliꞌ-ondow,
mipanow si Isa sog dibabow nok tubig posunguꞌ dituꞌ song mga mulidin,
bu biyananin bosiya ilon.
49 Sugaid dangan mitongow yanin nong mga mulidin nong mipanow sog dibabow tubig,
og baluꞌ nilon og lutow.
Dadi miglosik ilon,
50 poꞌ og lam nilon,
mikotongow ilon ni Isa,
bu landuꞌ og gondok nilon.
Tibuwa miktaluꞌ mogdayun si Isa dinilon,
“Akon kini.
Diꞌ amu mondok.
Popagon niyu ok pongatoyan niyu.”
51 Doksuꞌ sinumakoy yanin sog bangkaꞌ,
bu linumotaꞌ og galuꞌ.
Misobuꞌ tokodoy ong mga mulidin diyanin.
52 Poꞌ bisan kisaksian nilon ong mokosobuꞌ-sobuꞌ nong miinangin sok pan,
daꞌ pa ilon pokosabut bug sima tokodoy yanin,
poꞌ motogas ilon tintuluan.
Kiulian ni Panghuꞌ Isa ong mga Tow Misaki sog Genesaret
53 Dangan mikotolipag na ilon,
dituꞌ ilon dinumongguꞌ sog bonuwa Genesaret.
54 Pokponog nilon sog bangkaꞌ,
kiindanan mogdayun nong mga tow si Isa.
55 Saan na migdaliꞌ-daliꞌ ilon momosun song mga tow sog liwag nok kobonuwahan koyon.
Dadi inoyit nilon ong mga misaki dunut nog gikam nilon bug ayin bonuwahoy nong midongog nilon diyon si Isa.
56 Bu bisan ayin-ayin yanin posunguꞌ,
song mga gumbaloyan,
song mga lungsud,
atawa sok kobukidan,
oyiton da nong mga tow ong mga milongkoꞌ sok tabuan,
bu pongonihon nilon ni Isa nok pokikaponin pa ong mga misaki bisan dona sok sung-sung nog juba nin.
Dadi og lam nok kinumikap diyanin,
kiulian.