Markus 5

Piluwas ni ok  sok Tow

Dadi minatong siloꞌ Isa bug mga mulidin sog dipag nog linow diyon sog bonuwa Gerasa. 2 Dangan minonog si Isa sog bangkaꞌ, linumpak yanin nog laki nok sinolodan nok soytan nok tidu sog langub pongubulan. 3 Og laki kini migonong sok pongubulan, bu diꞌ na tokodoy yanin koikotan nok tow bisan pa ok kodina. 4 Lolayun na yanin ikotan, sugaid ponggotusonin bu ladakonin ok kodina nog inikot diyanin. Daꞌdun ok tow nong mokatu sok pagasin. 5 Gobi-gondow diyon na hadja yanin sok pongubulan bu sok kobukidan moglosikan, bu pongangolanin og lawasin nong mga batu. 6 Dangan mitongowin si Isa sok kolayuan, gimobok yanin posunguꞌ dituꞌ bangka yanin poktolibuksak sog lupaꞌ sog gadapan ni Isa. 7-8 Tinaluan ni Isa ok soytan, “Luwasa soytan sok tow koyon!” Dadi miglosik ok soytan nong monamal, taluꞌ in, “Olo og inangon nu dinakon, Isa, og Mahatinggi? Pongonihon ku dinika song ngalan nok Tuhan nog diꞌ nu akon binsanaon.”

9 Na sinakan yanin ni Isa, “Sima ong ngalan nu?” Tinumabal yanin, “Ong ngalan ku si Laksaꞌ, poꞌ modakol ami tokodoy.” 10 Dadi pingoni nin tokodoy ni Isa nog diꞌ ilon pawaon sog bonuwa koyon.

11 Na ongon diyon ong modakol nog babuy minungat sok kilid bontud. 12 Dadi pingoni tokodoy nong mga soytan dituꞌ ni Isa, “Pangoy nu ami song mga babuy, bagun sumolod ami sog lawas nilon.”

13 Na kinumboy ilon ni Isa. Limuwas na ong mga soytan tidu sog lawas nok tow koyon bangka ilon solod song mga babuy. Sododuun mimolebes gumobok ong mga babuy koyon sog bilidan tokodoy posunguꞌ sog linow bangka ilon kolomos kotanan. Og dakol nong mga babuy koyon, ongon mga duwaꞌ ngibu.

14 Dadi ong mga mogogipat nong mga babuy, ginumobok ilon mogdayun bangka poksuksug sog lungsud bug gumbaloyan sog lumibutin pasal song miinang koyon. Na minangoy dituꞌ tumontong ong mga tow. 15 Pogdatong nilon dituꞌ ni Isa, mitongow nilon ok tow bakas sinolodan nong mga soytan. Miningkud yanin, mimonapot na bu mobais na ok ponayu nin. Dadi kiondokan tokodoy ilon. 16 Na ong mga tow nong mikotongow song miinang koyon, minuksug ilon song mga duma nilon bug olo ong miinang sok sinolodan nok soytan bu song mga babuy. 17 Dadi pingoni tokodoy nong mga tow dituꞌ ni Isa nong mawaꞌ yanin sog bonuwa nilon.

18 Dangan posunguꞌ na sumakoy si Isa sog bangkaꞌ, mikpokilolat ok tow nog bakas sinolodan nok soytan nong mogunut yanin. 19 Na diꞌ meleg si Isa, bu sinuguꞌ in, “Uliꞌ a na, bangka nu suksug song mga gusba-waris nu bug salu bonuwa nu og ininang nok Tuhan dinika bu pasal sog lolatin dinika.” 20 Na minawaꞌ na yanin bangka nin ponuksugoy sok Sopuluꞌ Lungsud pasal sog lam nog ininang ni Isa diyanin, bu misobuꞌ tokodoy ok kotanan nok tow.

Kiulian og Libun Misaki bu Mitubuꞌ puliꞌ og Bataꞌ Libun

21 Dangan timolipag na sop siloꞌ Isa sog linow, na piktopukan yanin nong mga tow, bu diyon yanin dunut dinilon sok kilid nog linow. 22 Na minangoy diyon ok solokotow nok kounutan sog nog iningalanan Jayrus. Poktongowin ni , sinumudjud yanin 23 bangka pokpokilolat, taluꞌ in, “Tuwan, og bataꞌ u nog libun posunguꞌ na matoy. Alung, pogunuta dinakon dituꞌ bangka nu pa doponoy bagun kulian yanin bu motubuꞌ pa.” 24 Na migunut si Isa diyanin, bu miktuyuk da sop og landuꞌ kodakol nok tow toktob migigot ilon diyanin.

25 Na ongon ok solokotow nog libun nok pogduguꞌ-duguon sog bon nok sopuluꞌ bu duwaꞌ tahun. 26 Modakol ok kolossahianin song mga polomulung, bu mitipot na og gartaꞌ in pogbulung dun, sugaid daꞌ da yanin kulioy. Migdodungag tibuwa ok saki nin. 27 Na mikodongog yanin pasal ni Isa, dadi limimugoy yanin diyon tidu sok tolikudan nong migigot na ong mga tow bangka nin kimaloy og juba ni Isa. 28 Poꞌ ong niyatin, “Bilaꞌ mokimalu tibuwa nog juba nin, kulian ku na dodaꞌ.” 29 Dadi linumotaꞌ mogdayun ok pogduguꞌ-duguꞌ in bu mibatikin nok kiulian na yanin. 30 Na kiosunan mogdayun ni Isa nog ongon og linumuwas diyanin nok kowasa, dadi sinumunguꞌ yanin sok tolikudanin bangkaꞌ poktaluꞌ, “Sima ok kinumimal nog juba u?” 31 Tinumabal ong mga mulidin, “Mitongow nu na nong migigot ok tow diyon dinika, sokaliꞌ moksaka pa bug sima ok kinumimal dinika?” 32 Sugaid miglengeꞌ-lengeꞌ da si Isa sok polibutin monontong bug sima ok kinumimal diyanin. 33 Na kiosunan nog libun koyon bug olo ong miinang diyanin. Mikpolani yanin ni Isa mingongkog nog gondok bangka yanin sudjud, bu sinuksugin ok kosobonnalan. 34 Tinaluan yanin ni Isa, “Buweꞌ, ok pongandol nu ong mikokuliꞌ dinika. Panowa na nong mosannang. Kiulian ka na sok saki nu.”

35 Soliyan ni Isa moktaluꞌ sog libun koyon, ongon ong mga tow mikangoy diyon tidu sog baloy ni Jayrus, ok kounutan diyon sog baloy poksumbahan. Tinaluan nilon si Jayrus, “Og bataꞌ nu minatoy na. Diꞌ nu na sasowon og guru mangoy sog baloy nu.” 36 Tibuwa daꞌ pogmasi si Isa sok taluꞌ nilon, bu tinaluanin si Jayrus, “Diꞌ a mondok, pongandola hadja!” 37 Dadi daꞌ podunutoy ni Isa ong mga tow dinilon muwal hadja si Petros bu og duwaꞌ kotow mogilug nok si Yaꞌkub bu si Yahiya. 38 Pogdatong nilon sog baloy ni Jayrus, mitongow ni Isa nog ongon ok sasow, bu midongogin ong monamal nok pogaduy bug pogdukkaꞌ nong mga tow. 39 Na sinumolod yanin sog diyalom nog baloy bangka nin taluoy ong mga tow, “Manu mosasow amu ma bu migaduy? Og bataꞌ, ondaꞌ patoy, mitulug hadja yanin.” 40 Pikkotawahan yanin nong mga tow pasal sok taluꞌ in. Tibuwa piluwasin ilon, bangka nin oyitoy og ginaꞌ bug gommaꞌ nog bataꞌ bug mga mulidin koyon sog diyalom bilik nok kibotangan nog bataꞌ. 41 Doksuꞌ inonggaydanin ok komot nog bataꞌ bangka yanin poktaluꞌ sog bahasa nilon, “Talita kumi,” ong maana nin, Buweꞌ, pogbuwata na. 42 Na migbuwat mogdayun og bataꞌ koyon bangka pokpanow-panow. Og gumulin sopuluꞌ bu duwaꞌ tahun na. Misobuꞌ tokodoy ong mga mikotongow dun. 43 Na mingamoy-amoy si Isa dinilon nog diꞌ ilon monuksug sog bisan sima. Doksuꞌ tinaluan ilon ni Isa nog bogoyan nilon og bataꞌ nong mokanin.