Markus 4

Ok Pononggiꞌ pasal song Miksibwag nog Boniꞌ

Mingnasihat na sop mokpuliꞌ si dituꞌ sok kilid nog , bu modakol tokodoy nok tow minangoy moktopuk diyanin. Dadi simakoy yanin sog bolangoy, bangka ingkud, bu ok tumpukan nong mga tow, dituꞌ ilon sok kilid linow minginongog diyanin. 2 Na modakol ong mitintuluꞌ in dinilon biyan song mga pononggiꞌ, taluꞌ in, 3 “Poginongog amu! Ongon solokotow minibwag nog boniꞌ sog guma nin. 4 Na soliyanin monibwag, mitonaꞌ og duma nog boniꞌ sok kilid dalan, bu minangoy diyon ong mga manuk-manuk tinipot nilon toktukoy. 5 Bu og duma nog boniꞌ mitonaꞌ sog batuhan nog daꞌdun tantu og lupaꞌ in. Na podaliꞌ da tinumubuꞌ ong mga boniꞌ koyon poꞌ sukul-sukul na og lupaꞌ in. 6 Tibuwa dangan kiinitan hadja nok podos, milawos poꞌ mobabow da og gamutin. 7 Og duma nog boniꞌ mitonaꞌ sog lupaꞌ nok taga sigbot dugihon. Na linumabung ong mga sigbot koyon bu milomosin ok pomulan kituꞌ nong mitubuꞌ, bu daꞌdun na og bunga nin. 8 Og duma nog boniꞌ mitonaꞌ sog lupaꞌ nong mobais. Na mitubuꞌ bangka pogjatu og bunga nin. Ok solobuk boniꞌ mimunga tolu puluꞌ longow, og len nom puluꞌ, bu og duma sop sogatus longow.” 9 Dadi taluꞌ ni Isa, “Na sima-sima ong mikodongog, sabut niyu pahatul.”

Ong Maana nok Pononggiꞌ pasal song Minibwag nog Boniꞌ

10 Dangan mikawaꞌ hadja ong mga tow, sinakan yanin nong mga mibagak sok polibutin dunut nok sopuluꞌ bu duwaꞌ kotow mokpoposampoyin bug olo ong maana nok pononggiꞌ in kituꞌ. 11 Taluꞌ ni Isa, “Amu koyon, pisabut na diniyu ong mibuni kituꞌ pasal sok . Tibuwa song mga duma nog diꞌ meleg mogunut sok pognasihatu, ok kotanan nok tinaluꞌ u dinilon biyan sok pononggiꞌ 12 bagun mounut ok sinulat,

‘Lolayun ilon tumontong,

sugaid diꞌ da ilon mokotongow,

monginongog ilon,

sugaid diꞌ da ilon mokosabut,

bagun diꞌ ilon mokpuliꞌ dinakon

bangka ampunoy.’ ”

13 Na tinaluan ilon ni Isa, “Bilaꞌ diꞌ niyu mosabut ok pononggiꞌ kituꞌ, na ponoy niyu na kosabut og duma nok taluon ku biyan sok pononggiꞌ? 14 Ong minibwag kituꞌ, yonin na ong mokposampoy nok Parman nok Tuhan. 15 Ok kilid dalan kituꞌ nok kitonaan nog boniꞌ, yonin na ong mga tow nong mikodongog nok Parman nok Tuhan. Tibuwa tinumuwaꞌ ok kounutan nong mga soytan bangka nin awaoy ok Parman nok Tuhan nog inungod dinilon. 16 Og batuhan nok kitonaan nog boniꞌ, yonin na ong mga tow nong mikodongog ilon nok Parman nok Tuhan, bu tinabuk nilon mogdayun dunut loliyag nilon. 17 Tibuwa diꞌ monginggamut ok Parman sok pongatoyan nilon, dadi podaliꞌ da ok kotombaꞌ nilon. Bilaꞌ datongan ilon nok sigpit atawa kobinsanaan pasal sok Parman nok Tuhan, lukatan nilon mogdayun ok pongandol nilon sok Tuhan. 18 Na og lupaꞌ nok taga sigbot dugihon kituꞌ nok kitonaan nog boniꞌ, yonin na ong mga tow nong minginongog nok Parman nok Tuhan. 19 Sugaid ok kosusahan sog dunya bug napsu sog daya bug mga len nog olo-olo, yonin na ong mikolomos nok Parman sok pongatoyan nilon, dadi ondaꞌ da pogjatu. 20 Na og lupaꞌ nong mobais nok kitonaan nog boniꞌ, yonin na ong mga minginongog nok Parman nok Tuhan bu tinolimaꞌ nilon. Dadi migjatu mahatul ok Parman sok kotubuꞌ nilon mamaꞌ sopantun nok pomulan nong migbunga. Sog duma tolupuluꞌ kalihon, sog duma sop nompuluꞌ bu sog len sogatus kalihon.”

Ok Pononggiꞌ pasal sok Politaan

21 Doksuꞌ tinaluan ilon ni Isa, “Ok politaan ondaꞌ tutudoy bagun dungmaan nog gantangan atawa botangon sok silung nok katri, sugaid tutudan bagun botangon sok pogbotanganin. 22 Poꞌ og lam nog binuni tumampal da, bu olo-olo og dinungmaan, mokangoy da sok kodolagan lomaꞌ-dinglag. 23 Sima-sima ong mikodongog, sabut niyu pahatul.” 24 Tinaluan pa ilon ni Isa, “Potosop niyu sok pikilan niyu og olo-olo nong midongog niyu. Bilaꞌ mogmuhut-muhut amu monginongog sok pononduꞌ u, bogoyan amu nok kokosun bug ponabut, bu polabihan pa tanan diniyu. 25 Poꞌ sima-sima ong monginongog mahatul, dungagan ok kokosunin, sugaid sima-sima og diꞌ monginongog, bisan ok kokosunin nong mikaan, alapon da diyanin.”

Ong mga Pononggiꞌ pasal sok

26 Bu taluꞌ pa ni Isa, “Ok Pomarinta nok Tuhan mamaꞌ hantang nok tow minibwag nog boniꞌ sog guma nin. 27 Soliyanin moginang nog len ginangin gondow-gondow bu sok poktulugin gobi-gobi, monolinsing ong mga boniꞌ bangka solag. Sokaliꞌ daꞌ in kosunoy bug ponoy ok kotubuꞌ nong mga boniꞌ koyon. 28 Poꞌ tidu sog lupaꞌ, tumubuꞌ ong mga boniꞌ sala-sala nin. Monolinsing poguna, doksuꞌ mogbodos bangka pomunga. 29 Na bilaꞌ minug na ong mga bunga nin, ganihon na nog gapuꞌ in poꞌ timpu ponggani na.”

30 Miktaluꞌ si Isa, “Olo ok pobatuk ta sok Pomarinta nok Tuhan? Olo ok pononggian ta bagun mopotampal? 31 Ok Pomarinta nok Tuhan mamaꞌ hantang nog boyaan nok pimula sog lupaꞌ. 32 Og boyaan koyon landuꞌ kobeteꞌ, sokaliꞌ diꞌ mobon, tinumubuꞌ bu mosolag pa tidu song mga len pomulan bangka koimung nok pun kayu. Mokoluksang ong mga panga nin, saan na koapunan bu kopoksalagan nong mga manuk-manuk diyon.”

33 Na modakol pa nong miglologinis nok pononggiꞌ nok tinaluꞌ ni Isa nog gantaꞌ mosabut nong mga tow. 34 Ondiꞌ yanin mognasihat song mga tow nok kanaꞌ biyan sok pononggiꞌ. Sugaid bilaꞌ ilon-ilon dona bug mga mulidin, potampalonin dinilon og lam nok pinonggianin.

Pilotaꞌ ni ong Mopagas nog Galuꞌ bug Nabok

35 Dangan miglogobi na sog gondow koyon, tinaluan ni Isa ong mga mulidin, “Alung, tumolipag ita niyu sog dipag.” 36 Dadi ginumonat na ong mga mulidin sok tumpukan nong mga tow diyon. Si Isa diyon na asal miningkud sog bangkaꞌ, dadi inoyit nilon yanin tumulak. Ongon da sop ong mga len nog bangkaꞌ nong migunut dinilon.

37 Soliyan nilon moglayag, sunoy pa minoyup ong mopagas nog galuꞌ, bu misibukak ong nabok bangka koungodoy nok tubig og bangkaꞌ nilon. 38 Tibuwa si Isa, dituꞌ mitulug sog dapit binayaꞌ nog bangkaꞌ dunut gulunanin. Tinanud yanin nong mga mulidin, bu tinaluan yanin, “Guru, diꞌ a taꞌ mosusa nok posunguꞌ ita niyu na molonod?” 39 Dadi mitanud si Isa bangka nin pogbinaoy og galuꞌ bug nabok, taluꞌ in, “Lotaꞌ a! Toddoꞌ a!” Na linumotaꞌ mogdayun og galuꞌ bu tinumoddoꞌ tokodoy og linow. 40 Taluꞌ ni Isa dinilon, “Manu miondok amu ma? Daꞌdun pa taꞌ ok pongandol niyu?” 41 Na miondok tokodoy ong mga mulid ni Isa, bu taluꞌ nilon kokoniya, “Sima bayuꞌ ok tow kini nog bisan og galuꞌ bug nabok tumombaꞌ ma diyanin.”