Ok Tow nong Mingoyongkong Komotin
3
Na sinumolod na sop mokpuliꞌ si Isa sog baloy poksumbahan,
bu ongon og laki diyon mingoyongkong ok komotin.
2 Pasal waktu niyon Gondow Pogogulali,
tinulikan pahatul si Isa nong mga Parisi.
Poꞌ mongalap-sabap ilon bagun mosumbung nilon si Isa bilaꞌ bulungonin taꞌ ok tow koyon bisan sog Gondow Pogogulali.
3 Tubus tinaluan ni Isa ok tow nong mingoyongkong ok komotin,
“Angoya indog dini sog gunahan.”
4 Doksuꞌ sinakanin ong mga Parisi,
taluꞌ in,
“Ayin ok sumugat sok saraꞌ sog Gondow Pogogulali:
Moginang nong mobais atawa moginang nong molaat?
Mokotabang sok pokasi ta atawa mokomula dinilon?”
Tibuwa daꞌdun og gonek nilon.
5 Tinontong ilon ni Isa dunut lingit,
poꞌ misusa tokodoy yanin kobalan nok kotogas nok pongatoyan nilon.
Doksuꞌ tinaluanin ok tow nong mingoyongkong ok komotin,
“Pologdong nu ok komot nu!”
Na linogdongin bu kiulian na ok komotin.
6 Linumuwas ong mga Parisi,
bangka ilon pogisun mogdayun dunut nong mga ponindog ni Datuꞌ Heroda bug ponoy ok pokpatoy nilon ni Isa.
Mibantug si Panghuꞌ Isa
7-8 Na minawaꞌ si Isa bug mga mulidin,
bangka ilon angoy sog Linow Jalil.
Migunut sop og landuꞌ kodakol nok tow tidu sok probinsiya nog Jalil,
siyudad nog Jerusalem bug mga len bonuwa sok probinsiya nog Yahudiya bug Idumeya.
Modakol sop ong mga tow miktidu sog bonuwa dapit sok silangan nok Subaꞌ Jordan,
sampoy sog lumibut nong mga lungsud nok Tirus bug Sidon.
Landuꞌ kodikpol nong mga tow minangoy diyanin poꞌ midongog nilon ong mga miinangin.
9 Dadi tinaluan ni Isa ong mga mulidin nong mokpodinsamaꞌ nog bangkaꞌ bagun ongon ok koingkudanin bilaꞌ mogigot na ong mga tow diyanin.
10 Modakol saan ong mga tow nok kiulianin sog gondow niyon,
dadi migigot ong mga misaki sok polibutin,
poꞌ meleg kumimal diyanin.
11 Na kada motongow yanin nong mga tow nok sinolodan nok soytan,
moktolibuksak ilon sog gadapan ni Isa bangka poglosik,
ok taluꞌ nilon,
“Ika og Bataꞌ nok Tuhan”
12 Sugaid pigbinaan tokodoy ni Isa ong mga soytan nog diꞌ monuksug pasal diyanin.
Ok Sopuluꞌ bu Duwaꞌ kotow Mokpoposampoy ni Panghuꞌ Isa
13 Na doksuꞌ nituꞌ tinumukad si Isa sog bontud,
bangka nin tawagoy sima-sima ok koleganin,
bu minangoy ilon diyanin.
14 Bu piniliꞌ in ok sopuluꞌ bu duwaꞌ kotow bagun mogunut-unut diyanin bu bagun mosuguꞌ in mokposampoy.
15 Binogoyan ilon ni Isa nok kowasa mokobugow nong mga soytan.
16 Yonin kini ong mga ngalan nok sopuluꞌ bu duwaꞌ kotow nong mipiliꞌ in,
si Simon,
og iningalananin nok Petros,
17 si Yaꞌkub bug gilugin nok si Yahiya,
yonin na ong mga gumbataꞌ ni Sebede,
bu iningalanan ilon ni Isa nog Buanerges,
ong maana nin og Gumbataꞌ nog Lugung,
18 tubus si Andariyas,
si Pilip,
si Bartolomi,
si Matiyu,
si Tomas,
si Yaꞌkub,
yonin na og bataꞌ ni Alpa,
si Tadiyus,b
bu si Simon og ginollalan nok Selot,
ong maana nin ong momologbog,
19 bu si Yudas Iskariyot,
ong minipu ni Isa.
Sinila ok Kowasa ni Panghuꞌ Isa
20 Tubus nituꞌ minuliꞌ na siloꞌ Isa sog baloy nok pigdukonan nilon.
Na miktopuk na sop ong modakol nong mga tow boyaan daꞌdun na tanan og waktu niloꞌ Isa kuman.
21 Dangan midongog nok tolianak ni Isa ok kobotang-botangin,
inangoy nilon dituꞌ alapoy,
poꞌ taluꞌ nong mga tow,
“Kanaꞌ mobais ok pikilanin.”
22 Ongon ong mga guru agama nong mikangoy diyon tidu sog Jerusalem,
taluꞌ nilon pasal ni Isa,
“Sinolodan yanin nok kounutan nong mga soytan,
bu biyan sok kowasa nog binogoy diyanin,
mopoluwasin ong mga soytan nok sinumolod sog lawas nong mga tow.”
23 Saan pipolani ni Isa ong mga tow bangka poktaluꞌ biyan sok pononggiꞌ,
“Ponoyon nok kounutan nong mga soytan pogbugow og duma nin soytan?
24 Bilaꞌ ok solobuk bonuwa mogunoy-unoy,
na og bonuwa koyon moglaat da.
25 Bu bilaꞌ diꞌ moksulut ok solobuk moktolianak,
na diꞌ da sop mobon,
moksuwoy bu moladak da.
26 Na bilaꞌ ok kounutan nong mga soytan mogunoy-unoy bu moksinaggaoy bug mga bataanin,
na diꞌ da yanin mogobon.
Diyon na ponoktob ok poglokounutanin.
27 Ok kounutan nong mga soytan sopantun nok tow mokowasa.
Daꞌdun ong mokosolod sog baloyin bangka pongalap nog gartaꞌ in,
luwal dona bilaꞌ koikotanin poguna,
bangka pa yanin pokalap nog gartaꞌ in.c
28 Taluan ku amu,
ong motudin,
og lam nog dusa bug taluꞌ nong molaat,
ongon pa ok koampunanin.
29 Sugaid sima-sima ong mogunda-unda sog Ruh nok Tuhan,
daꞌdun ok koampunanin.
Og dusa nin koyon,
diꞌ mobolong solama-lama.”
30 Tinaluan ilon ni Isa nong mamaꞌ niyon poꞌ miktaluꞌ ilon nok sinolodan yanin nok soytan.
Og Ginaꞌ bu ok Koilugan ni Panghuꞌ Isa
31 Puwas nituꞌ minatong og ginaꞌ bug koilugan ni Isa nog laki.
Dituꞌ ilon migbagad sog luwasan bangka ilon pokposun nong meleg ilon moktongow ni Isa.
32 Na modakol ok tow nong miningkud sok polibut ni Isa,
bu tinaluan nilon yanin,
“Og ginaꞌ nu bug mga koilugan nu diyon sog luwasan minontong dinika.”