Kiulian ni Panghuꞌ Isa og Daday
2
Na dangan mikobiyan ong mga sanu ondow,
mikpuliꞌ si Isa sok Kapernaum,
bu midongog nong mga tow nong mikuliꞌ na yanin.
2 Dadi miglimud ong mga tow sog baloy pigdukonanin boyaan migigot ilon bisan sog bongowan,
bu mignasihat si Isa dinilon pasal sok Parman nok Tuhan.
3 Doksuꞌ ongon ong mga tow minatong.
Miktanggung ok pat kotow dinilon nog daday posunguꞌ dituꞌ ni Isa.
4 Na diꞌ ilon mokopolani diyanin poꞌ migigot na ong mga tow sog diyalom baloy.
Dadi minenek ilon sok tas bangka nilon awaoy ok sobahagiꞌ nog gatopin.
Doksuꞌ tinontun nilon na sog gadapan ni Isa og daday koyon dunut tanggunganin.
5 Dangan mitongow ni Isa nong mosolag ok kopongandol nok pat kotow kini diyanin,
tinaluanin og daday,
“Toꞌ,
inampun na ong mga dusa nu!”
6 Na ongon ong mga guru agama miningkud diyon,
bu miksak-sinakoy ilon sog diyalom pongatoyan nilon,
7 “Manu maꞌ niyon ma ok taluꞌ in?
Pibatukin og ginawa-baranin sok Tuhan.
Ponglaat koyon!
Daꞌdun mokoampun nog dusa,
luwal da ok Tuhan!”
8 Sododuun kiosunan ni Isa bug olo ok pikilan nilon,
dadi miktaluꞌ yanin,
“Manu mokpikil amu ma nong mamaꞌ niyon?
9 Ayin buwan ong molomu taluon sok tow daday kini,
‘Inampun na ong mga dusa nu,’
atawa,
‘Pogbuwata,
oyit nu ok tanggungan nu bangka a panow?’
10 Tibuwa tulikan niyu bagun kosunan niyu nok taga kopatut og Bataꞌ nong Manusiyaꞌ mongampun nog dusa dini sog dunya.”
Tubus tinaluan ni Isa og daday,
11 “Toꞌ,
taluan ku ika,
pogbuwata,
alap nu ok pigbolilidan nu bangka a uliꞌ.”
12 Dadi migbuwat og daday koyon.
Inalapin mogdayun ok pigbolilidanin bangka luwas sog gadapan nok kodakolan boyaan misobuꞌ og lam nilon,
bu piotas nilon ok Tuhan.
Taluꞌ nilon,
“Daꞌ ita sibon pokotongow nong maꞌ nini!”
Tinawag ni Panghuꞌ Isa si Lebi
13 Na minangoy mokpuliꞌ si Isa sok kilid Linow Jalil.
Piktopukan yanin nong mga tow bangka nin ilon tintuluoy.
14 Tubus nituꞌ miglandan pa si Isa,
bu mitongowin ong mogogalap nog buwis,
ong ngalanin si Lebi,a
og bataꞌ ni Alpa.
Dituꞌ yanin miningkud sok pogogalapan nog buwis.
Tinaluan yanin ni Isa,
“Pogunuta dinakon.”
Dadi minindog si Lebi bangka pogunut diyanin.
15 Na ongon og waktu nok kinuman siloꞌ Isa sog baloy ni Lebi.
Modakol ong mga mogogalap nog buwis bug mga baldusa ong minampuꞌ kuman dunut ni Isa bug mga mulidin,
poꞌ modakol ilon migunut diyanin.
16 Na ongon diyon ong mga guru agama nok Parisi.b
Mitongow nilon nong minampuꞌ yanin kuman song mga baldusa bug mga mogogalap nog buwis.
Dadi tinaluan nilon ong mga mulidin,
“Manu minampuꞌ ma yanin kuman song mga mogogalap nog buwis bug mga baldusa?”
17 Dangan midongog koyon ni Isa,
tinaluanin ong mga guru agama koyon,
“Ong mga tow mokolasig daꞌdun balan nilon nok polomulung,
sugaid ong mga misaki da.
Domikkiyan akon sooy,
minangoyu dini kanaꞌ mongonggat nong mga tow nong mingniyat nong mologdong ilon,
sugaid bagun mongonggat nong mga mingaku nog baldusa ilon.”
Ok Sak pasal sok Pokpuwasa
18 Sog waktu nong mikpuwasa ong mga mulid ni Yahiya Mongliliguꞌ bug mga Parisi,
ongon og gondow nong minangoy ong mga tow diyon ni Isa bangka poksak,
“Manu mikpuwasa ma ong mga mulid ni Yahiya bug mga mulid nong mga Parisi,
sugaid ong mga mulid nu,
ondiꞌ ma?”
19 Pinonggian ni Isa dinilon,
ok tabalin,
“Mokopuwasa taꞌ buwan ong mga pondala nok pongantim laki sok pokkawingan soliyan nog diyon pa yanin dinilon?
Na sog bon nog diyon pa ok pongantim laki,
ondiꞌ ilon na dodaꞌ mokopuwasa.
20 Tibuwa matong da og waktu nog alapon da dinilon ok pongantim laki bangka pa ilon sop pokpuwasa.”c
Ok Pononggiꞌ pasal sog Bogu Pononduꞌ ni Panghuꞌ Isa
21 Tubus nituꞌ miksuksug si Isa nok pononggiꞌ dinilon pasal sok pononduꞌ masa tagnaꞌ bu og bogu nok pononduꞌ in.
Taluꞌ in dinilon,
“Daꞌdun ok tow nog gamitonin ok kokanaꞌ bogu poktilobin sog dan ponapot.
Poꞌ bilaꞌ doktakan ok ponapot koyon,
kumoloꞌ ok tilobin,
bu lumiwag pa og godit nok ponapotin.
22 Domikkiyan da sop,
daꞌdun ong mogungod nog bogu tubig anggul sog dan gungodan panit nog binatang,d
poꞌ ondiꞌ na mobitad.
Dadi bilaꞌ mogbulaꞌ ok tubig anggul,
tumibul og inungod bangka kobogdak og gungodan panit koyon.
Na mogasta hadja ok tubig anggul bug gungodanin.
Tibuwa ok tubig anggul nog bogu,
sumboy ungodon na dodaꞌ sog gungodan panit nog bogu.”
Ok Sak pasal sog Gondow Pogogulali
23 Na solobuk waktu nog gondow Sabtuꞌ,
yonin na og gondow Pogogulali,
miniyan siloꞌ Isa sog gumahan mamaꞌ nok paloyan taga pomulan nok tirigu.
Soliyan nilon miyan diyon,
mingotuꞌ ong mga mulidin nong mga bunga.
24 Dadi tinaluan yanin nong mga Parisi,
“Tontong nu ba,
manu mingotuꞌ ilon ma sog Gondow Pogogulali nok pigondiꞌ ma koyon sok saraꞌ?”e
25 Tinabal ilon ni Isa,
“Ondaꞌ niyu taꞌ kobasta sog diyalom Kitab og ininang ni Nabi Daud dangan kigutoman yanin bug mga duma nin?
26 Sinumolod yanin sog diyalom Langgal sog waktu nok si Abyatar ok kinotasan nog gimam,
bangka nin kanoy ok pan sutsif nog inuwakil tagnaꞌ sok Tuhan,
bu binogoyanin da sop ong mga duma nin.g
Na og ginangin kituꞌ pigondiꞌ sok saraꞌ poꞌ ok patut bosiya kuman dun,
ong mga gimam da.”
27 Doksuꞌ tinaluan ilon ni Isa,
“Miongon og Gondow Pogogulali para sok kobaisan nong mga tow,
kanaꞌ miongon ong mga tow para sok kobaisan nog Gondow Pogogulali.
28 Dadi akon og Bataꞌ nong Manusiyaꞌ ong mokopogbayaꞌ bug olo ong mopatut inangon bisan pa sog Gondow Pogogulali.”