Matiyu 25

Ok Pononggiꞌ pasal sok Sopuluꞌ Kotow nog Budjang

Na miksuksug na sop si nog len pononggiꞌ, ok pokpopondom dinilon bagun lolayun ilon mopodinsamaꞌ sok pokpuliꞌ in, taluꞌ in, “Ok mopononggiꞌ sok kobotang-botang nok sopuluꞌ kotow budjang nok posunguꞌ sok pokkawingan. Minalap ilon nong mga politaan bangka nilon angoy lumpakoy ok pongantim laki. 2 Og lima kotow babbal, bu og lima kotow mokopandoy. 3 Na dangan inalap nog lima kotow babbal koyon ok politaan nilon, daꞌ ilon pogoyit nog lonagas. 4 Tibuwa ong mokopandoy kituꞌ migoyit nog lonagas sok pogungodan dunut politaan nilon. 5 Dangan mianggaꞌ ok pongantim laki, mikotulug og lam nilon.

6 Sugaid sok titongaꞌ gobi, ongon ong migekes, taluꞌ in, ‘Uy! Koyon na ok pongantim laki. Angoy niyu yanin lumpak.’ 7 Tubus mitanud ok sopuluꞌ kotow budjang kituꞌ bangka nilon pahatuloy ong mga politaan nilon. 8 Na taluꞌ nog lima kotow babbal sog lima kotow nong mokopandoy, ‘Bogoyan niyu ami nog lonagas niyu, poꞌ posunguꞌ na mopalong ok politaan nami.’ 9 Tibuwa ok tabal nong mokopandoy kituꞌ, ‘Sunoy diꞌ na mokoganap sog lam ta niyu bilaꞌ pogbahagian ta, dadi angoy amu saluy song mga mogdodagang.’ 10 Na soliyan nilon mangoy sumaluy nog lonagas, minatong na ok pongantim laki. Bu ong mga togama kituꞌ sinumolod ilon sok pokoradjaan nok pokkawing dunut nok pongantim laki bangka tamboloy ok pintuan.

11 Doksuꞌ minatong na sop og duma nog lima kotow budjang kituꞌ, taluꞌ nilon, ‘Panghuꞌ, Panghuꞌ, bukaoy nu pa ami.’ 12 Sugaid ok tabal nok pongantim laki, ‘Taluan ku amu, ong motudin, ondiꞌ u amu kindanan.’ ”

13 Taluꞌ pa ni Isa, “Dadi poghalliꞌ amu, poꞌ ondiꞌ niyu kosunan og gondow bug waktu nok pokpuliꞌ u.”

Ok Pononggiꞌ pasal sok Tolu kotow nok Sosuguon

14 Miksuksug da sop si Isa nog len pononggiꞌ pasal sok Pomarinta nok Tuhan. Ok taluꞌ in, “Ongon ok solokotow nok posunguꞌ mopanow. Dadi tinawagin ong mga sosuguonin bangka nin pongandoloy dinilon og gartaꞌ in. 15 Ong monolokotow dinilon pingandolanin nok sin bulawan nog dumait sok kopandoyan nilon. Ok solokotow binogoyan lima ngibu, ok solokotow duwaꞌ ngibu bu ok solokotow songibu, bangka pa yanin panow mogdayun. 16 Na ong mikotabuk kituꞌ lima ngibu, migdagang-dagang yanin mogdayun, bu mikountung yanin lima ngibu. 17 Domikkiyan da sop og binagakanin duwaꞌ ngibu kituꞌ, mikountung da sop yanin duwaꞌ ngibu. 18 Sugaid ong mikotabuk songibu, minangoy mokkukut nog lupaꞌ bangka nin bunihoy ok sin nog gamu nin.

19 Dangan miobon na, minatong na og gamu nong mga sosuguon kituꞌ bangka ilon sayudoy nog gamu nilon. 20 Na ong mikotabuk kituꞌ lima ngibu, migoyit pa nog lima ngibu, taluꞌ in, ‘Tuwan, binogoyan nu akon lima ngibu, na kini da, mikuntungu pa lima ngibu.’ 21 Taluꞌ nog gamu nin diyanin, ‘Mobais og ininang nu, mologdonga bu kopongandolan ka nok sosuguon. Na pagga kopongandolan ka song mikaan nog gartaꞌ, wakilon ku dinika ong modakol nog gartaꞌ. Ampuꞌ a mogloliyag dunut dinakon.’

22 Minangoy da sop sog gadapanin og binagakanin nog duwaꞌ ngibu kituꞌ, taluꞌ in, ‘Tuwan, binogoyan nu akon duwaꞌ ngibu, na kini na, mikuntungu pa duwaꞌ ngibu.’ 23 Taluꞌ nog gamu nin diyanin, ‘Mobais og ininang nu, mologdonga bu kopongandolan ka nok sosuguon. Na pagga kopongandolan ka song mikaan nog gartaꞌ, wakilon ku dinika ong modakol nog gartaꞌ. Ampuꞌ a mogloliyag dunut dinakon.’

24 Minangoy da sop ong mikotabuk kituꞌ songibu sog gadapanin bangka pomolidja moktaluꞌ, ‘Tuwan, kiosunan ku nong mopipita nok tow, gumani a nok kanaꞌ ika ong mimula dun, bu mongalapa nok kanaꞌ ika ong miktiksaꞌ dun. 25 Dadi mondoku, saan na binuni u ok sin nu kituꞌ sog diyalom nog lupaꞌ, bu kinya da.’

26 Sugaid ok tabal nog gamu nin, ‘Molaata bu mololaꞌ a nok sosuguon! Tinaluꞌ nu nok kiosunan nu na ma nog gumani u nok kanaꞌ akon ong mimula dun, bu mongalapu nok kanaꞌ akon miktiksaꞌ dun. 27 Dadi bilaꞌ maꞌ niyon ok pikilan nu sumboy bosiya binotang nu sog bangku ok sin ku bagun pogdatongu moalapu puliꞌ dunut tubuꞌ in.’ 28 Dadi tinaluanin og len sosuguonin, ‘Alap niyu ok sin diyanin bangka niyu bogoy sok taga sopuluꞌ ngibu kituꞌ. 29 Poꞌ sima-sima ok tow nog ginamitin song mobais ok pingandol diyanin, dungagan pa bu miglabi-labi pa. Sugaid sima-sima og diꞌ kopongandolan bisan pa song mikaan nog binogoy diyanin, alapon da diyanin. 30 Na pilak niyu ok sosuguon kituꞌ nog daꞌdun ok polosuddahanin dituꞌ sok kodoloman. Dituꞌ mogaduy ong mga tow bu mongolongot ong ngisi nilon.’

Pasal sok Poghukum nong mga Manusiyaꞌ

31 Sog waktu nog akon og mokpuliꞌ dini moksultan sok kotasu bu dunut nong mga malaikatu, na mingkudu song mosahaya nok trunu u. 32 Limudon sog gadapan ku og lam nok kobangsa-bangsahan, bangka u ilon polenoy tidu sog duma mamaꞌ nok pokpolen nong mga bilibili tidu sok kambing. 33 Ong mga mologdong botangon ku sog dapit lintu u, bu ong mga kanaꞌ mologdong sog dapit bibang. 34 Tubus sok kopatutu nok Sultan moktaluꞌ u song mga mibotang dapit lintu u kituꞌ, ‘Alung na, amu mga binarakatan nok Tuhan, u. Tabuk niyu og lam nok kobaisan sok pomarinta nin nog ginantaꞌ in diniyu tidu pa sok koimung nog dunya. 35 Poꞌ dangan ginutomu, piokan niyu akon, bu dangan kinuwowu, piinum niyu akon. Dangan minangoyu sog bonuwa niyu, tinabuk niyu akon sog baloy niyu bisan diꞌ niyu akon kilalahan. 36 Bu dangan kiondaan ku nok ponapot, piponapotan niyu akon. Misaki u, bu inusibaꞌ niyu akon, bu sog waktu u sok pirisuhan, tinibow niyu akon.’

37 Tubus tumabal dinakon ong mga tow mologdong, ‘Panghuꞌ, konanu nami ika mitongow nok kigutoman bu kinuwow bangka nami ika pokanoy bu bogoyoy nog ginumon? 38 Konanu nami ika mitongow nong minangoya sog bonuwa nami nok tinabuk nami ika, atawa kiondaan ka nok ponapot bu piponapotan nami ika? 39 Bu konanu nami sop ika mitongow nong misaki atawa mipirisu nog binontow nami ika?’ 40 Na tabalon ku ilon sok kopatutu nok Sultan, ‘Taluan ku amu, ong motudin, pagga ininang niyu ong maꞌ niyon sok solobuk mobabaꞌ song mga pigilugan ku kini, mamaꞌ niyu da nog ininang dinakon.’

41 Doksuꞌ taluan ku sop ong mga dapit sog bibangu, ‘Pokpolayuꞌ amu dinakon mga pigmulkaan nok Tuhan. Dituꞌ amu sog gapuy nog daꞌdun ok kodoksuanin nok tinogama para sog bug mga duma nin mga soytan. 42 Poꞌ kigutoman ku, sugaid daꞌ niyu akon pokanoy. Kinuwowu, sugaid daꞌ niyu akon pinumoy. 43 Mikangoyu sog bonuwa niyu, sugaid daꞌ niyu akon tabukoy, kiondaan ku nok ponapot, sugaid daꞌ niyu akon poponapotoy, misaki u bu mipirisu u, sugaid daꞌ niyu da akon bontowoy.’

44 Doksuꞌ sumambung ilon, ‘Panghuꞌ, konanu nami ika ondaꞌ tabangoy dangan mitongow nami ika nog ginutom, kinuwow, kiondaan nok ponapot, misaki atawa mipirisu?’ 45 Na tabalon ku ilon, ‘Taluan ku amu, ong motudin, pagga daꞌ niyu koyon inangoy sok solobuk mobabaꞌ song mga pigilugan ku kini, daꞌ niyu da sop koyon inangoy dinakon.’

46 Tubus mokangoy ong mga tow koyon sok kosiksaan solama-lama, sugaid ong mga mologdong mokangoy sok kosannangan solama-lama.”